ގަދަރުވެރިކަމާ އެކު ދުވަސްވުން

ކޮންމެ އަހަރެއްގެ އޮކްޓޯބަރު މަހުގެ 1 ވަނަ ދުވަހަކީ ދުނިޔޭގެ ދޮށީ އުމުރުގެ މީހުންގެ ދުވަހުގެ ގޮތުގައި ޔޫއެން އިން ކަނޑައަޅައި އެ އުމުރުފުރައިގެ މީހުންނަށް ހާއްސަ ކޮށްގެން ފާހަގަކުރާ ދުވަހެކެވެ. އެ ދުވަހަށް ހާއްސަ ޝިއާރެއް ކަނޑައަޅަ އެވެ. މި އަހަރުގެ ޝިއާރަކީ "ގަދަރުވެރިކަމާއެކު ދުވަސްވުން" (Ageing with Dignity) އެވެ.

ކޮންމެ އިންސާނަކު ވެސް އުފަންވަނީ ނަފުސު އިއްޒަތާ އެކުގަ އެވެ. އެހެންކަމުން ކޮންމެ ޖިންސަކަށް ވެސް، ކޮންމެ ހާލަތެއްގައި ވެސް، އަދި ކޮންމެ އުމުރުފުރައެއްގައި ވެސް ނަފުސު އިއްޒަތް ހައްގުވެ އެވެ. އެކަމަކީ އަޅުގަނޑުމެން އެންމެން ދަންނަންޖެހޭ އަދި ގަބޫލުކުރަން ހަގީގަތެކެވެ. އަޅުގަޑުމެންގެ ދިރިއުޅުމުގައި ގެންގުޅޭ އުސޫލުތަކާއި އަމަލުތަކުގައި އެކަން ދައްކަންޖެހެ އެވެ. ތިމާއަކީ އަގު ހުރި އަދި އެހެން މީހުން އިހުތިރާމްކުރާ މީހެއް ކަމުގެ އިހުސާސް ކުރެވެންޖެހެ އެވެ. މިކަމަށްޓަކައި ތިމާގެ އަމިއްލަ ނަފުސާ މެދު އެހެން މީހުންގެ ކިބައިން ދެކެން ބޭނުންވާ ގޮތް ފަށަން ޖެހޭނީ ހަމަ ތިމާއާ ހަމައިން، ތިމާގެ އާއިލާގެ ތެރެއިންނެވެ. ކޮންމެހެން އެންމެން އެއްގޮތަކަށް ކަންކަމުގައި އެއްބަސްވާކަށް ނުޖެހެ އެވެ. ނަމަވެސް އަނެކާގެ ހިޔާލަށް އިހުތިރާމް ކުރުމުގެ އާދަ ޅަފަތުން ފަށައިގެން ދަސްކޮށްދީ، އަށަގަންނުވަން ބާރު އަޅަން ޖެހެ އެވެ.

އެއްވެސް ޝައްކެއް ނެތް ގޮތުގައި އުމުރު މައްޗަށް ދާ ދިޔުމުގައި ޖިސްމާނީ ގޮތުންނާއި ނަފުސާނީ ގޮތުން ނުހިފެއްޓޭނެ ބަދަލުތަކެއް ކޮންމެ މީހަކަށް ވެސް އަންނާނެ އެވެ. ދުވަސްވަމުންދާ ދިއުމާ މެދު ހިތާމަކޮށް، މާޔޫސްވުމުގެ ބަދަލުގައި، ދިގު އުމުރެއްގައި ދިރި ހުރުމުގެ ނަސީބު ލިބެމުން ދާތީ އެކަމަށް ޝުކުރުކޮށް، ހަޔާތުގެ ފަހު ދުވަސްތައް ރަނގަޅު ގޮތުގައި ހޭދަކުރެވޭތޯ މަސައްކަތް ކުރަން ޖެހެ އެވެ. ހަށިގަނޑާ މެދު އަޅާލައި ވީހާ ވެސް ހަރަކާތްތެރިކޮށް އުޅެވޭތޯ މަސައްކަތް ކުރަން ޖެހެ އެވެ. އާއިލާ އާއި ދޭދޭ މީހުނާ މެދު އޮންނަން ވާނެ ގުޅުން ދަމަހައްޓަން ޖެހެ އެވެ. އެ މީހެއްގެ އިއްޒަތާއި ގަދަރު ހިފަހައްޓަން އެދޭ ނަމަ މީހުންގެ ތެރެއަށް ނުކުމެ އުޅޭއިރު ހުންނަ ގޮތަށާއި އުޅޭ އުޅުމާ މެދު ވިސްނަން ޖެހެ އެވެ.

ގަދަރާއި އިއްޒަތް ދަމަހައްޓަން އެދުނަސް އަޅުގަޑުމެންގެ ލޯމަތިން މިހާރު ގިނައިން ފެންނަނީ ތަފާތު މަންޒަރުތަކެކެވެ. ހާއްސަކޮށް ވަޒީފާއެއް އަދާކޮށްފައިވާ މީހަކު ނަމަ އެކަމުން ދުރުވުމުން ވަރަށް ބޮޑަށް މާޔޫސްވެ، ތިމާއަކީ އަގެއް ނެތް މީހެއްގެ ގޮތުގައި އިހުސާސް ކުރެވި، ތިމާގެ އަމިއްލަ ނަފުސާ މެދު ފަރުވާ ކުޑަކުރެވެ އެވެ. ބަލިވެ އުޅޭ މީހަކު ނަމަ ތިމާ އާއި އަދި ތިމާގެ އާއިލާ އިން ވެސް ދެކެނީ އެއީ އަގެއް ނެތް މީހެއްގެ ގޮތުގަ އެވެ. އެއީ ބަސް ނުވިކޭ އޮޑިއެއްގައި ހުންނަ މީހަކަށް ވެގެން ދެއެވެ.

ކުރީގައި ނުލާހިކު ނަލަކޮށް އުޅުނު ބައެއް މީހުން ވެސް މިހާރު ސޯޓުބުރިއެއް ލައިގެން، ނުވަތަ މުންޑެއް އަނދެގެން، ހުސްގަޔާ މީހުންގެ ތެރެއަށް ނުކުމެ ތިބޭ ތަން ފެނެ އެވެ. ނުވަތަ މާބޮޑު ނިވާކަމެއް ނެތް ނިދާ ހެދުމެއްގައި ތިއްބައި ފެނެ އެވެ. އެނދުމަތިވެފައިވާ މީހުން، ވަރަށް ދިމާލަށް ތިބޭ ތަން ފެނެ އެވެ. މިގޮތުން، ވަކި ޙާލަތަކަށް ދިޔުމުން، ނުވަތަ ވަކި އުމުރަކަށް ދިޔުމުން، އަމިއްލަ ކަންކަމާ މެދު ތިމާ އެދޭ ގޮތް ހިޔާރު ކުރުމުގެ މިނިވަންކަން އާއިލާގެ ތެރޭގައި ވެސް ގެއްލިގެން ދެ އެވެ. އެހެންކަމުން ތިމާގެ އަގެއް ނެތް ކަމާއި ގަދަރެއް ނެތްކަން އިހުސާސް ކުރެވެން ފަށަ އެވެ.

ދުނިޔޭގައި ހުރުމުގެ ނަސީބު ލައްވާ ނަމަ ދުވަހުން ދުވަހަށް މީހާ ދާނީ ދުވަސްވަމުންނެވެ. އެހެންކަމުން ކޮންމެ މީހަކަށް ވެސް ހުރިހާ އިރެއްގައިމެ ގަދަރާއި އިއްޒަތް ހައްގުވާކަން ހަދާން ކުރާން ވާނެ އެވެ. ވަކި މީހަކު އިސްތިސްނާ ނުވެމެ އެވެ.

އެޑިޓަރުގެ ނޯޓު:

ޑރ. އައިމިނަތު ޖަމީލަކީ އުމުރުން ދުވަސްވީ މީހުންގެ ސިއްހަތަށް އަމާޒު ކޮށްގެން ވަރަށް ކުރިއްސުރެ އަމިއްލަ ޖަމިއްޔާއެއް ހައްދަވައިގެން އިސްވެ މަސައްކަތް ކުރައްވާ ބޭފުޅެކެވެ. މަންފާ ސެންޓަ އޮން އޭޖިންއަކީ މިހާރު ވެސް އެ ކަމުގައި އެންމެ ހަރަކާތްތެރި އަމިއްލަ ޖަމިއްޔާ އެވެ. ކުރިން ހެލްތު މިނިސްޓަރުކަން ކުރެއްވި އައިމިނަތު ޖަމީލަކީ އުމުރުން ދުވަސްވީ މީހުންގެ ކަންކަމާ މެދު ވިސްނަވާ އަދި އެއީ ހަރަކާތްތެރި ބަޔަކަށް ހެދުމަށް އަމަލީ ގޮތުން މަސައްކަތް ކުރައްވާ ބޭފުޅެކެވެ. އޭނާ ވަނީ ނަރުހެއްގެ ގޮތުގައި ވެސް ކުރިން މަސައްކަތް ކުރައްވައިފަ އެވެ.