ސަލްމާންގެ "ކިކް 2" އިއުލާންކޮށްފި

ބޮލީވުޑްގެ ސުޕަސްޓާރު ސަލްމާން ހާންގެ އެކްޝަން ކޮމެޑީ ފިލްމް "ކިކް"ގެ ދެވަނަ ބައި އިއްޔެ އިއުލާންކޮށްފި އެވެ.

ސަލްމާން ވަނީ ސޯޝަލް މީޑިއާ މެދުވެރިކޮށް "ކިކް 2" އިއުލާންކޮށްފަ އެވެ. އަދި އެއީ 2014 ވަނަ އަހަރު ގެނެސްދިން "ކިކް"ގެ ސީކުއެލްއެއްކަން ވެސް ވަނީ ހާމަކޮށްފަ އެވެ.

"ކިކް 2"ގައި ވެސް ސަލްމާންއާ އެކު ލީޑު ރޯލު ކުޅޭނީ ފުރަތަމަ ފިލްމުގައި ވެސް އުޅުނު ޖެކޮލިން ފެނާންޑޭޒެވެ. އަދި މި ފިލްމު ޑައިރެކްޓުކުރަނީ ވެސް ފުރަތަމަ ފިލްމު ގެނެސްދިން ސާޖިދު ނާދިއަދުވާލާ އެވެ.

ސަލްމާން މިހާރު ވެސް އަންނަނީ ސާޖިދުގެ އަމިއްލަ ޕްރޮޑަކްޝަން ހައުސް ކަމަށްވާ ނާދިއަދުވާލާ ގްރޭންޑްސަން އެންޓަޓެއިންމަންޓުން ޕްރޮޑިއުސްކުރާ ފިލްމެއްގައި މަސައްކަތް ކުރަމުންނެވެ. އެއީ އަންނަ އަހަރު ބޮޑު އީދުގައި ގެނެސްދޭ "ސިކަންދަރު" އެވެ.

"ކިކް" އަކީ 2014 ވަނަ އަހަރު ބޮލީވުޑްގައި އެންމެ ބޮޑު އާމްދަނީއެއް ލިބުނު ފިލްމުތަކުގެ ތެރޭގައި ހިމެނޭ ފިލްމެކެވެ. އެ ފިލްމަށް ވަނީ 402 ކްރޯޑް ރުޕީސް (47.8 މިލިއަން ޑޮލަރު) ލިބިފަ އެވެ.

ސަލްމާންއާ އެކު ޖެކޮލިން އާއި ރަންދީޕް ހޫޑާ އަދި ނަވާޒުއްދީން ސިއްދިގީ މުހިންމު ރޯލުތައް ކުޅުނު "ކިކް" އަކީ 2009 ވަނަ އަހަރު ހަމަ އެ ނަމުގައި ނުކުތް ތަމަޅަ ފިލްމެއްގެ ރީމޭކްއެކެވެ.

"ކިކް 2" ސިނަމާތަކަށް ގެންނަ ތާރީހެއް އަދި ނޭނގެ އެވެ.