ރާއްޖެ ވަޑައިގަތުމަށް މޯދީއަށް ރައީސް ދައުވަތު ދެއްވައިފި

ރާއްޖެ އާއި އިންޑިއާގެ ޚާރިޖީ ގުޅުމަށް 60 އަހަރު ފުރުން ފާހަގަ ކުރުމަށްޓަކައި އަންނަ އަހަރު ރާއްޖެއަށް ވަޑައިގަތުމަށް އިންޑިއާގެ ބޮޑުވަޒީރު ނަރެންދުރަ މޯދީއަށް ރައީސް ޑރ. މުހައްމަދު މުއިއްޒު މިއަދު ދައުވަތު ދެއްވައިފި އެވެ.

ރައީސް މުއިއްޒު، މޯދީއަށް މި ދައުވަތު ދެއްވިކަން އިއުލާން ކުރެއްވީ އިންޑިއާއަށް ރައީސް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން ރައީސާއި މޯދީއާ ބައްދަލު ކުރެއްވުމަށްފަހު ބޭފުޅުން އެކުގައި މިއަދު މެންދުރުފަހު ބޭއްވި މީޑިއާ ބްރީފިންގައި ދެއްކެވި ވާހަކަފުޅުގަ އެވެ.

"ރާއްޖެ އާއި އިންޑިއާއާ ދެމެދުގައި ޚާރިޖީ ގުޅުން ގާއިމްކުރިތާ 60 އަހަރު އަންނަ އަހަރު ފުރޭނެ. އަޅުގަނޑު ބޮޑުވަޒީރު މޯދީއަށް ދައުވަތު ދެއްވައިފިން، މި މުނާސަބަތު ފާހަގަ ކުރުމަށްޓަކައި ރަސްމީ ދަތުރުފުޅެއްގައި ރާއްޖެ ވަޑައިގަންނަވަން،" ރައީސް ވިދާޅުވި އެވެ.

ރާއްޖެ އާއި އިންޑިއާ ދެމެދުގައި ޚާރިޖީ ގުޅުން ގާއިމްކުރީ ނޮވެމްބަރު 1، 1965 ގަ އެވެ.

މިއީ ރައީސް މުއިއްޒު އިންޑިއާއަށް ކުރައްވާ ރަސްމީ ފުރަތަމަ ދަތުރުފުޅެވެ.

މޯދީ ވަނީ ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަމުގައި ދެ ފަހަރެއްގެ މަތިން ރާއްޖެއަށް ވަޑައިގެންފަ އެވެ. އެއީ ނޮވެމްބަރު، 2018 ގައި އިބޫ ހުވާ ކުރެއްވުމުގެ ރަސްމިއްޔާތުގައި ބައިވެރިވެ ވަޑައިގަތުމަށް ކުރެއްވި ދަތުރުފުޅާއި އޭގެފަހުން ކުރެއްވި ރަސްމީ ދަތުރުފުޅެވެ.

ރައީސް މުއިއްޒުގެ ވާހަކަފުޅުގައި ވަނީ އިންޑިއާ އާއި ރާއްޖޭގެ ތަރައްގީ އާއި ރައްކާތެރިކަން ކަށަވަރުކުރުމަށްޓަކައި އިންޑިއާގެ ހަގީގީ އެކުވެރިއެއްގެ ގޮތުގައި ރާއްޖެ އަބަދުވެސް ދެމިއޮންނާނެ ކަމުގެ ޔަގީންކަން ވެސް ދެއްވައިފަ އެވެ.

އިންޑިއާއަކީ ރާއްޖޭގެ އިޖުތިމާއީ އަދި އުމްރާނީ ތަރައްގީގެ މުހިންމު ބައިވެރިއެއް ކަމަށާއި ދެ ގައުމުގެ މުސްތަގުބަލް ބައްޓަންކުރާނެ މަގުޗާޓަކާ މެދު މޯދީއާ އެކު ވަރަށް ފުޅާ ދާއިރާއެއްގައި މަޝްވަރާ ކުރެވި، އެއްބަސްވެފައިވާ ކަމަށް ވެސް ރައީސް ވިދާޅުވި އެވެ.