އިންޑިއާގެ ސަލާމަތަށް ނުރައްކާވާ ފަދަ ކަމެއް ރާއްޖެއަކުން ނުކުރާނެ: ރައީސް މުއިއްޒު

އިންޑިއާގެ ސަލާމަތާއި ރައްކާތެރިކަން ހީނަރުވާ ފަދަ އެއްވެސް ކަމެއް ދިވެހި ސަރުކާރުން ނުކުރާނެ ކަމުގެ ޔަގީންކަން ރައީސް ޑރ. މުހައްމަދު މުއިއްޒު ދެއްވައިފި އެވެ.

އިންޑިއާގެ ރައީސް ދުރުޕަދީ މުރުމޫގެ ދައުވަތަކަށް ރައީސް މުއިއްޒުގެ ދެކަނބަލުން މިއަދު ފެއްޓެވި ފުރަމާނަ ދަތުރުފުޅުގެ ތެރެއިން "ޓައިމްސް އޮފް އިންޑިއާ" ނޫހަށް ދެއްވި އިންޓަވިއުއެއްގައި އެ މަނިކުފާނު ވިދާޅުވި ގޮތުގައި، ރާއްޖެ އާއި އިންޑިއާއާ ދެމެދު އޮތީ ޒަމާނުއްސުރެ ގާއިމުވެފައިވާ ރަހުމަތްތެރިކަމާއި އިހުތިރާމްގެ މައްޗަށް ބިނާވެފައިވާ އޮތް ގާތް ގުޅުމެކެވެ.

އިންޑިއާގެ ކަނޑުގެ ވާދަވެރިކަމުގެ ތެރެއިން އެ މަނިކުފާނުގެ ވެރިކަމުގައި، ޗައިނާ އަށް ރާއްޖެ ދީލާލާފައިވާ ކަމުގެ ތުހުމަތު ކުރެވުނަސް، މި ސަރުކާރުގެ އެންމެ އިސްކަމެއް ދެނީ މި ސަރަހައްދުގެ ސަލާމަތާއި ހަމަޖެހުން ގާއިމުވެފައި އޮތުމުގެ މައްޗަށް ކަމަށް ރައީސް މުއިއްޒު ވިދާޅުވި އެވެ.

"އެކި ދާއިރާތަކުން އެހެން ގައުމުތަކާ އެކު އަޅުގަނޑުމެންގެ ގުޅިގެން މަސައްކަތް ކުރުން އިތުރު ކުރަމުންދާއިރު، ރާއްޖޭން ކުރާ ކަމެއްގެ ސަބަބުން މި ސަރަހައްދުގެ ސަލާމަތާއި ހަމަޖެހުމަށް ގެއްލުމެއް ނުލިބޭނެ ކަން ރާއްޖޭން ޔަގީން ކުރާނެ،" މަގާމާ ހަވާލުވެވަޑައިގެންނެވި ފަހުން ރައީސް މުއިއްޒު އިންޑިއާ އަށް ކުރައްވާ ފުރަތަމަ ފުރަމާނަ ދަތުުފުޅާ ގުޅުވައިގެން ދެއްވި އިންޓަވިއުގައި އެ މަނިކުފާނު ވިދާޅުވި އެވެ.

"އިންޑިއާއާއެކު އޮތް ޒަމާންވީ އަދި ވަރުގަދަ ގުޅުމަށް އިސްކަންދެމުން ގެންދާނަން. އެހެން ގައުމުތަކާ އެކު އަޅުގަނޑުމެން ދަމަހައްޓައި ގުޅުންތަކުން، އިންޑިއާގެ ސަލާމަތީ މަސްލަހަތަށް ބުރޫނާރާނެ ކަމުގެ ޔަގީންކަން އަޅުގަނޑުމެންނަށް އެބައޮތް."

ރައީސް މުއިއްޒުގެ ދަތުރުފުޅަށް ރާއްޖެ އާއި އިންޑިއާގެ ސަމާލުކަން އެންމެ ބޮޑަށް ހުއްޓިފައިވަނީ މި ވެރިކަމުގެ ކުރީކޮޅު ދެ ގައުމުގެ ގުޅުން ވަރަށް ބޮޑަށް ގޯސްވެ، އެއް ގައުމުން އަނެއް ގައުމަށް އެކި ލެވެލްތަކުގައި ބަހުގެ ހަމާލަތައް ބަދަލުކޮށްފައި ވާތީ އެވެ.

ރާއްޖޭގައި ތިބި އިންޑިއާގެ ސިފައިން ފޮނުވައިލުމަކީ ރައީސް މުއިއްޒުގެ ރިޔާސީ ވައުދެއް ކަމަށް ވާއިރު، އެ އަށް އަމަލު ކުރަން ނިންމުމަކީ ވެސް ގުޅުމަށް އަސަރުކުރި ކަމެކެވެ.

އެކަމާ ގުޅުވައި އަމާޒުވި ސުވާލަށް ޖަވާބު ދެއްވަމުން ރައީސް ވިދާޅުވި ގޮތުގައި، އެ މަނިކުފާނުގެ ސަރުކާރުން ދަމަހައްޓާނީ "މޯލްޑިވްސް ފަސްޓް ޕޮލިސީ" އެކެވެ. އެއީ ރައީސް މުއިއްޒުގެ ރިޔާސީ ކެމްޕެއިން ދުވަސްވަރުން ފެށިގެން ވަކާލާތު ކުރައްވަމުން ގެންދަވާ ސިޔާސަތެވެ.

އެކަން ހާސިލުކުރުމަށްޓަކައި ކުރަންޖެހޭ ކަންކަން، ދުނިޔޭގެ އެންމެ ބޮޑު ޑިމޮކްރަސީގެ ހައިސިއްޔަތުން އިންޑިއާ އަށް ވަރަށް ރަނގަޅަށް ފަހުމްވާނެކަން ރައީސް ފާހަގަކުރެއްވި އެވެ.

އެއާ އެކު، އެ މަނިކުފާނު ވިދާޅުވި ގޮތުގައި، މިހާރު ރާއްޖެ އާއި އިންޑިއާ އިން ވެސް އެއް ގައުމުން އަނެއް ގައުމުން ހިއްސާކުރާ ކަންބޮޑުވުންތަކާއި އިސްކަންދޭ ކަންކަން ވަނީ ރަނގަޅަށް އެނގި ދަސްވެފަ އެވެ.

އެހެންކަމުން، މި ދަތުރުފުޅުގެ ތެރެއިން ދެ ގައުމުގެ ގުޅުން އާ ހަރުފަތަކަށް ގެންދާނެ ޔަގީންކަން އެބަ އޮތް ކަމަށް ރައީސް މުއިއްޒު ވިދާޅުވި އެވެ.

ރައީސްގެ މި ދަތުރުފުޅުގައި މިއަދު އެންމެ ފުރަތަމަ ބައްދަލުކުރެއްވީ އިންޑިއާގެ އެކްސްޓާނަލް އެފެއާޒް މިނިސްޓަރު ސުބްރަމަނިއަމް ޖައިޝަންކަރާ އެވެ. ރައީސް އާއި ބޮޑުވަޒީރު ނަރެންދުރަ މޯދީއާ އެކު ރަސްމީ ވާހަކަތަކާއި އެއްބަސްވުންތަކުގައި ސޮއިކުރުން އޮތީ މާދަމާ އެވެ.

މިއީ ރައީސް މުއިއްޒު މިދިޔަ ނޮވެމްބަރު މަހުގެ 17 ގައި މަގާމާ ހަވާލުވެވަޑައިގެންނެވި ފަހުން އެ ގައުމަށް ކުރައްވާ ފުރަތަމަ ފުރަމާާނަ ދަތުރުފުޅެވެ. އެކަމަކު، ބޮޑުވަޒީރު ނަރެންދުރަ މޯދީ ތިންވަނަ ދައުރަކަށް މަގާމުގެ ހުވާކުރެއްވުމުގެ ރަސްމިއްޔާތުގައި ބައިވެރިވެވަޑައިގަތުމަށް މިދިޔަ ޖޫން މަހު ވެސް ރައީސް މުއިއްޒު އިންޑިއާ އަށް ވަޑައިގަތެވެ. އެ ދަތުރުފުޅުގައި މޯދީއާ ބައްދަލުކުރައްވައި ދެ ގައުމުގެ ގުޅުން ހަރުދަނާ ކުރުމުގެ މަޝްވަރާތައް ދެ ބޭފުޅުން ކުރެއްވި އެވެ.