އިންޑިއާގެ އިތުރު ޓޫރިސްޓުންނަށް މަރުހަބާ ކިޔަން: ރައީސް

ރާއްޖެ އާއި އިންޑިއާއާ ދެމެދު އޮތް ގާތް ގުޅުމާ އެކު، އެ ގައުމުން އިތުރަށް ޓޫރިސްޓުން ރާއްޖެ އަށް ދާން މަރުހަބާ ކިޔާ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެ، އެކަމަށް އެދިވަޑައިގެންފި އެވެ.

އެ މަނިކުފާނު އެކަމަށް އެދިވަޑައިގަތީ މިހާރު އިންޑިއާ އަށް ކުރައްވަމުން ގެންދަވާ ފުރަމާނަ ދަތުރުފުޅުގައި ދެއްވި މީޑިއާ ސްޓޭޓްމަންޓުގަ އެވެ.

އިންޑިއާގެ ބޮޑުވަޒީރު ނަރެންދުރަ މޯދީއާ ދެ ބޭފުޅުން އެކުގައި މީޑިއާ ކުރިމަތީގައި ދެއްވި މީޑިއާ ސްޓޭޓްމަންޓުގައި ރައީސް މުއިއްޒު ފާހަގަކުރެއްވި ގޮތުގައި، އިންޑިއާއަކީ ރާއްޖޭގެ ޓޫރިޒަމް ސިނާއަތުގައި މުހިންމު ދައުރެއް އަދާކުރާ ގައުމެއް ކަމަށެވެ. އެހެންވެ، އެ ގައުމުން އިތުރު ޓޫރިސްޓުން ރާއްޖެ އަށް ޒިޔާރަތް ކުރުމަށް މަރުހަބާ ކިޔާ ކަމަށް ރައީސް ވިދާޅުވި އެވެ.

ރާއްޖޭގެ ކުރިއެރުމަށްޓަކައި ދެ ގައުމުގެ ރައްޔިތުންގެ އެއްބާރުލުމާ އެކު އެކަން ކުރެވޭނެ ކަމަށް އެ މަނިކުފާނު ވިދާޅުވި އެވެ.

ރައީސް ފާހަގަކުރެއްވި ގޮތުގައި ސިއްހީ ބޭނުންތަކަށާއި ޓޫރިޒަމް އަދި ތައުލީމު ހާސިލް ކުރުމަށް ވަރަށް ގިނަ އަދަދެއްގެ ދިވެހިން އިންޑިއާ އަށް ދަތުރުކުރެ އެވެ. ހަމައެއާ އެކު، ރާއްޖޭގެ ތަރައްގީގައި ވެސް އިންޑިއާގެ ހިއްސާ ވަރަށް ބޮޑުކަމަށް އެ މަނިކުފާނު ވިދާޅުވި އެވެ.

ރާއްޖެ އަށް އެންމެ ގިނަ ޓޫރިސްޓުން އަންނަ ގައުމަކަށް ކުރިން އިންޑިއާ ވެފައިވީ ނަމަވެސް ދެ ގައުމުގެ ގުޅުމަށް ކުރި ނޭދެވޭ އަސަރާ އެކު އަދަދު ވަނީ ވަރަށް ބޮޑަށް ވެއްޓިފަ އެވެ. އެކަމަކު، ދެ ގައުމުގެ ގުޅުން އަނެއްކާވެސް ބަދަހިވާން ފެށުމާ އެކު، އިންޑިއާގެ ޓޫރިސްޓުން މިހާރު ވަނީ ރާއްޖެ އަށް ޒިޔާރަތް ކުރަން ފަށައިފަ އެވެ.

އިންޑިއާގެ އެންމެ ބޮޑު އޮންލައިން ބުކިން އޭޖެންޓް "އީޒްމައިޓްރިޕް" މެދުވެރިކޮށް ރާއްޖެއަށް އަލުން ބުކިން ހެއްދޭ ގޮތް ވެސް މިދިޔަ ހުކުރު ދުވަހު ވަނީ ހަަމަޖައްސައިފަ އެވެ. "އީޒްމައިޓްރިޕް" އިން ރާއްޖެ އަށް ބުކިން ހެދުން ހުއްޓާލީ މި އަހަރުގެ ޖެނުއަރީގަ އެވެ. އަލުން ބުކިން ހަދަން މި ފެށީ ރާއްޖެ އާއި އިންޑިއާގެ ގުޅުން ވަރަށް ބޮޑަށް ރަނގަޅު ކޮށްފައި ވަނިކޮށެވެ.