އޭޝިއަން ޗެމްޕިއަންޝިޕުގައި ގައުމީ އަންހެން ޓީޓީ ޓީމުން ކިރިގިސްތާން ބަލިކޮށްފި

ކަޒަކިސްތާނުގައި އިއްޔެ ފެށި އޭޝިއަން ޓީޓީ ޗެމްޕިއަންޝިޕުގެ ގުރޫޕް ސްޓޭޖުގައި ކިރިގިސްތާން އަތުން ގައުމީ އަންހެން ޓީމު މޮޅުވެއްޖެ އެވެ.

އިއްޔެގެ މެޗުގެ ދިވެހި ޓީމު ކާމިޔާބު ކުރީ 3-1 ގޭމުންނެވެ.

ފުރަތަމަ ގޭމް، ފާތީމަތު ދީމާ އަލީ ބަލިކޮށް ކިރިގިސްތާނަށް ހޯދައި ދިނީ ކުޑުސޯވާ ސައީޑާ އެވެ.

ފުރަތަމަ ސެޓް 11-9 އިން ދީމާ ކާމިޔާބު ކުރި އެވެ. އެކަމަކު ދެން ޖެހިގެން އައި ދެ ސެޓް 11-9، 11-8 އިން ކާމިޔާބުކޮށް ސައިދާ ލީޑް ނެގި އެވެ. ތިން ވަނަ ސެޓް 12-10 ން މޮޅުވެ، ދީމާ ހަމަހަމަ ކުރި އެވެ. ނަމަވެސް ބެސްޓް އޮފް ތުރީ އަށް ކުޅުނު މެޗުގެ ފަހު ސެޓް 12-10 ން ސައިޑާ ކާމިޔާބުކޮށް އެ ގޭމް ކިރިގިސްތާނަށް ހޯދައި ދިނެވެ.

ރާއްޖެ އަށް އުއްމީދެއް ހޯދައިދިނީ، ދެ ވަނަ ސެޓްގައި އައިޝަތު ރަފާ ނާޒިމް ނުކުމެ ކިރިގިސްތާނުގެ ރަމައިދާ އަބްދިމިޓަލިޕޯވާ 3-2 ގޭމުން ބަލި ކުރުމަށް ފަހު އެވެ.

އެ ގޭމްގެ ފުރަތަމަ ދެ ސެޓުން ރަފާ ބަލިބީ 13-11، 11-6 އިންނެވެ. ދެން އައި ތި ސެޓުން މޮޅުވެ ފަހަތުން އަރައި ރަފާ އެ ގޭމް ގެންދިޔަ އެވެ. އެ ތިން ސެޓް އޭނާ ކާމިޔާބު ކުރީ 11-5، 13-11 އަދި 11-8 އިންނެވެ.

ރާއްޖެ އަށް ލީޑު ނަގައިދިނީ މިޝްކާ މުހައްމަދު އިބްރާހިމް ތިން ވަނަ ގޭމަށް ނުކުމެ، ސީދާ ތިން ސެޓުން އެ ގޭމް ކާމިޔާބުކޮށްގެންނެވެ.

ކިރިގިސްތާނުގެ މުރަތަލިއެވާ ރައިއަނާއާ ދެކޮޅަށް ކުޅުނު މެޗު މިޝްކާ ކާމިޔާބު ކުރީ 11-4، 11-6 އަދި 12-10 އިންނެވެ.

ރާއްޖެ މެޗުން މޮޅުކޮށްދިން ސެޓް ދީމާ ކާމިޔާބު ހޯދީ ފުރަތަމަ ސެޓްގައި އޭނާގެ މައްޗަށް ކުރި ހޯދި ސައިޑާ، ތިން ސެޓުން ބަލިކުރުމަށް ފަހު އެވެ. އެ ގޭމްގެ ސެޓްތައް ދީމާ ގެންދިޔައީ 11-8، 11-5 އަދި 11-7 ންނެވެ.

އަންހެން ޓީމުގެ ފުރަތަމަ މެޗުގައި ޗައިނީޒް ޓައިޕޭ އަތުން ބަލިވީ ސީދާ ތިން ގޭމުންނެވެ. ދެ ވަނަ މެޗުގައި އުޒްބެކިސްތާނު އަތުން ބަލިވީ 3-1 ގޭމުންނެވެ. އެ މެޗުގައި ރާއްޖޭގެ ހަމައެކަނި ގޭމް ކާމިޔާބުކޮށް ދިނީ ދީމާ އެވެ.

މިއަދު ރާއްޖޭން ނުކުންނާނީ ލަންކާއާ ދެކޮޅަށެވެ.

ގުރޫޕު ސްޓޭޖުގެ ފުލަށްދާ ޓީމަށް ވެސް އަނެއް ބުރަށް ކޮލިފައިވުމަށް ޕްލޭއޮފް މެޗެއް ލިބޭނެ އެވެ.

ރާއްޖޭގެ ފިރިހެން ޓީމު އިއްޔެ ކުޅުނު ދެ މެޗުގައި ގަތަރު އަދި ސިންގަޕޫރު އަތުން ވެސް ބަލިވީ އެވެ. ގަތަރު އަތުން ބަލިވީ 3-1 އިންނެވެ. ރާއްޖޭގެ ހަމައެކަނި ގޭމް ކާމިޔާބު ކުރީ އަޚްޔާރް އަހްމަދު ހާލިދެވެ. ސިންގަޕޫރު އަތުން ބަލިވީ ސީދާ ތިން ގޭމުންނެވެ.