އޭޝިއަން ޗެމްޕިއަންޝިޕުގެ ފުރަތަމަ މެޗުތަކުން ޓީޓީ ޓީމަށް ރަނގަޅު ކާމިޔާބެއް

ދޯހާ (ސެޕްޓެމްބަރު 30) - ގަތަރުގައި ކުރިޔަށްދާ 25 ވަނަ އޭޝިއަން ޓޭބަލް ޓެނިސް ޗެމްޕިއަންޝިޕުގެ ޓީމު އިވެންޓުގައި ރާއްޖޭގެ އަންހެން އަދި ފިރިހެން ޓީމު ވެސް ފެށުން ރަނގަޅު ކޮށްފި އެވެ.

މި މުބާރާތަކީ 2019 ވަނަ އަހަރު ޑިސެމްބަރު މަހު ނޭޕާލުގެ ކަތުމަންޑޫގައި ބޭއްވި ސައުތު އޭޝިއަން ގޭމްސް އަށް ފަހު، ކޮވިޑާ ގުޅިގެން އައި މެދުކެނޑުމަކަށް ފަހު ރާއްޖޭގެ ޓީޓީ ޓީމު ބައިނަލްއަގުވާމީ މުބާރާތެއްގައި ވާދަކުރާ ފުރަތަމަ މުބާރާތެވެ. މިދިޔަ މަހު މާލޭގައި ބާއްވަން ތާވަލުކުރި ދެ މުބާރާތެއް ވަނީ އަންނަ އަހަރަށް ފަސްކޮށްފަ އެވެ.

އަންހެން ޓީމު އިވެންޓުގައި އިއްޔެ ރާއްޖޭގެ ޓީމުން ވަނީ ގަތަރާއި ބަންގްލަދޭޝް ބަލިކޮށްފަ އެވެ. ގަތަރުގެ އަންހެން ޓީޓީ ޓީމާ ވާދަކޮށް ރާއްޖެ މޮޅުވީ 3-1 އިންނެވެ. ފުރަތަމަ ސެޓު 3-1 އިން އައިޝަތު ރަފާ ކާމިޔާބުކުރިއިރު ދެވަނަ ސެޓުގު ފާތިމަތު ދީމާ އަލީ އަތުން ގެއްލުނީ 3-2 އިންނެވެ. ނަމަވެސް ޖެހިގެން އައި ދެ ސެޓު ކާމިޔާބުކޮށް ރާއްޖޭގެ ޓީމުން ވަނީ މެޗު ކާމިޔާބުކޮށްފަ އެވެ. ތިންވަނަ ސެޓު 3-0 އިން ލައިސާ ފަތުހުﷲ ކާމިޔާބުކުރިއިރު ހަތަރުވަނަ ސެޓު ދީމާ ގެންދިޔައީ 3-1 އިންނެވެ.

ބަންގްލަދޭޝްއާ ވާދަކޮށް ރާއްޖެ ކާމިޔާބުކުރީ ސީދާ ތިން ސެޓުންނެވެ. ފުރަތަމަ ސެޓު ރަފާ 3-1 އިން ކާމިޔާބުކުރިއިރު ދެވަނަ ސެޓް ފާތިމަތު ދީމާ އަލީ ގެންދިޔައީ 3-2 އިންނެވެ. އަދި ރާއްޖޭން މެޗު ކާމިޔާބުކުރި ސެޓުގައި ލައިސާ ފަތުހުﷲ މޮޅުވީ ވެސް 3-2 އިންނެވެ.

ފިރިހެން ޓީމު އިވެންޓުގައި އޮމާނާ ވާދަކޮށް ރާއްޖޭން ކާމިޔާބުކުރީ 3-2 އިންނެވެ. ފުރަތަމަ ސެޓުގައި ރާއްޖޭގެ މޫސާ މުންސިފް ބަލިވިއިރު ދެވަނަ ސެޓުން ޝައްފާން އިސްމާއިލް މޮޅުވީ 3-1 އިންނެވެ. ތިންވަނަ ސެޓުގައި އޮމާން ކުޅުންތެރިޔާ އަތުން ޒީސްތު ނަސީމް ބަލިވި ނަމަވެސް މުންސިފް ވަނީ 3-2 އިން ހަތަރުވަނަ ސެޓް ކާމިޔާބު ކޮށްފަ އެވެ. ފަސް ވަނަ ސެޓް 3-1 އިން ކާމިޔާބުކޮށް ރާއްޖެ މޮޅުކޮށްދިނީ ޝައްފާން އެވެ.

މިދިޔަ މާޗު މަހު ގައުމީ ޓީޓީ ޓީމުގެ ކޯޗްކަމާ ހަވާލުވި ގްރީސްގެ ކޮންސްޓަންޓީނޯސް ކޮސްޓޮޕޮލޮސްގެ އިރުޝާދުގެ ދަށުން ކުޅޭ ޓީޓީ ޓީމުން މި މުބާރާތުގެ ޓާގެޓަކަށް ކަނޑައަޅާފައި ވަނީ ދެކުނު އެފްރިކާގައި މި އަހަރު ބާއްވާ ޓީމް ވޯލްޑް ޓޭބަލް ޓެނިސް ޗެމްޕިއަންޝިޕަށް ކޮލިފައިވުމެވެ.