ރާއްޖޭގެ ތާރީހާ ގުޅޭ މައުލޫމާތު ރައްކާކުރަން ޑިޖިޓަލް އާކައިވް ޕްރޮޖެކްޓެއް ފަށައިފި

ރާއްޖޭގެ ތާރީހާއި ރާއްޖެއާ ގުޅޭ މައުލޫމާތު ރައްކާކުރުމަށް ސަރުކާރުން ގާއިމްކުރާ ޑިޖިޓަލް އާކައިވް ޕްރޮޖެކްޓްގެ ޕްރޮޓޯޓައިޕް އިއްޔެ އިފްތިތާހުކޮށްފި އެވެ.

މި ޑިޖިޓަލައިޒް ނިޒާމް އިފްތިތާހުކުރީ ފިނޭންސް މިނިސްޓްރީގައި އިއްޔެ ބޭއްވި ރަސްމިއްޔާތެއްގަ އެވެ. އެ ރަސްމިއްޔާތުގައި މި ޕްރޮޖެކްޓު އިފްތިތާހުކޮށްދެއްވީ ޔޫތު މިނިސްޓަރު އިބްރާހިމް ވަހީދު އާއި ގައުމީ އަރުޝީފުގެ ޑިރެކްޓާ ޖެނެރަލް މުހައްމަދު އާމިރު އަހްމަދެވެ.

ޔޫތު މިނިސްޓްރީން މިއަދު ބުނީ މި ޑިޖިޓަލް އާކައިވް ޕްރޮޖެކްޓަކީ ރާއްޖޭގެ ތާރީހާއި ސަގާފަތާއި ރާއްޖޭގައި ހިންގަމުންދާ މުހިންމު މަސައްކަތްތަކުގެ މައުލޫމާތު އިންޓަނެޓުގައި ރައްކާތެރިކޮށް، އަންނަން އޮތް ޖީލުތަކަށް ފޯރުކޮށްދިނުމަށްޓަކައި ރައީސް ޑރ. މުހައްމަދު މުއިއްޒުގެ ވައުދުފުޅާ އެއްގޮތަށް ފަށާ މަސައްކަތެއް ކަމަށެވެ.

އޯއޭއައިއެސް ކްލައުޑް އާއި ޖިއާރެޓާ އެސޯސިއޭޓްސް އަދި ރާއްޖޭގެ ގައުމީ އަރުޝީފުގެ މި ޕާޓްނަޝިޕްގެ ސަބަބުން ގައުމީ އަރުޝީފުގެ ޑިޖިޓަލް ރެކޯޑްތައް ރައްކާތެރިކުރުމުގެ ގާބިލްކަން އިތުރު ކުރުމުގެ އިތުރުން މި ދާއިރާއިން އިލްމާއި ތަޖުރިބާ ވެސް ލިބޭނެ ކަމަށް މިނިސްޓްރީން ބުންޏެވެ.

މިނިސްޓްރީން ބުނި ގޮތުގައި ޑިޖިޓަލް އާކައިވް ޕްރޮޖެކްޓްގެ ސަބަބުން ގައުމީ އަރުޝީފުގައި މަސައްކަތްކުރާ މުވައްޒަފުންނަށް ލިބޭނެ ފައިދާތަކުގެ ތެރޭގައި ހިމެނެނީ؛

• މުވައްޒަފުންނަށް އަމަލީ ތަޖުރިބާ ލިބުން.

• މުވައްޒަފުންނަށް ބެސްޓް ޕްރެކްޓިސްތައް ދަސްކުރުމުގެ ފުރުސަތު ލިބުން.

• ދާއިރާގެ ތަޖުރިބާކާރުންގެ ފަރާތުން ތަމްރީނު ލިބުމާއި ގާބިލްކަން އިތުރުކުރެވުން.

• ގާނޫނީ މަސްއޫލިއްޔަތުތަކާ އެއްގޮތަށް އަމަލުކުރުމަށް ތަމްރީނުވުން.

• ސްޓްރެޓެޖިކް ޑިވެލޮޕްމަންޓާއި ނެޓްވޯކިން އާއި ނޮލެޖް ޝެއާކުރަން ފުރުސަތު ހުޅުވުން.

މި ނިޒާމުގެ ސަބަބުން ރާއްޖޭގެ މައުލޫމާތު ރައްކާކުރާ ގޮތްތަކަށް ރަނގަޅު ބަދަލުތަކެއް އާންނާނެ ކަމަށް މިނިސްޓަރު އިބްރާހިމް ވަހީދު ވިދާޅުވި ކަމަށް ވެސް ޔޫތު މިނިސްޓްރީން ބުންޏެވެ.

"މި ނިޒާމަކީ ހަމައެކަނި ރާއްޖޭގެ ތާރީހު ބުނެދޭނެ ވެބްސައިޓެއް ނޫން ކަމަށާއި މިއީ ދުނިޔެއަށް ދިވެހިރާއްޖެ ބުނެދޭނެ މަސައްކަތަކަށް ވެގެންދާނެ ކަމަށާއި މިއީ ދިވެހިރާއްޖޭގެ ދެމެހެއްޓެނިވި ތަރައްގީއަށް ވެސް މުހިންމު މަސައްކަތެއް ކަމަށް މިނިސްޓަރު ފާހަގަ ކުރެއްވި އެވެ،" މިނިސްޓްރީން ބުންޏެވެ.