ބޮޑީބިލްޑިން ވޯލްޑް ޗެމްޕިއަންޝިޕް: 55 ގައުމު، މިއީ ރާއްޖޭގައި ބާއްވާ އިންޓަނޭޝަނަލް އެންމެ ބޮޑު މުބާރާތް

އަންނަ މަހު އައްޑޫ، ކެނެރީފް ރިސޯޓްގައި ބާއްވާ ދުނިޔޭގެ ބޮޑީބިލްޑިން ޗެމްޕިއަންޝިޕަކީ މިހާތަނަށް ރާއްޖޭގައި ބާއްވާ އެންމެ ބޮޑު ކުޅިވަރު މުބާރާތަށް ވާނެ ކަމަށް ބޮޑީބިލްޑިން އެސޯސިއޭޝަންގެ ރައީސް އިބްރާހިމް ހަމީދު ވިދާޅުވެއްޖެ އެވެ.

އަންނަ މަހު 5-11 އަށް ބާއްވާ މުބާރަތުގައި 55 ގައުމަކުން އެތުލީޓުންނާއި އޮފިޝަލުން ބައިވެރިވާނެ އެވެ. ބޮޑީބިލްޑިން އެސޯސިއޭޝަނުން ލަފާ ކުރާ ގޮތުގައި މުބާރާތުގެ މުޅިން ކޮންޓިންޖެންޓްގައި ހިމެނޭ މެންބަރުންގެ އަދަދު 500 އަށް ވުރެ މަތިވާނެ އެވެ.

މުބާރާތް ލޯންޗުކުރަން އިއްޔެ، ގައުމީ ފުޓްބޯޅަ ދަނޑުގެ ވީއައިޕީ ހޯލްގައި ބޭއްވި ހަފުލާގައި އިބްރާހިމް ހަމީދު ވިދާޅުވީ، މިއީ ރާއްޖެ އަށް ވަރަށް ތާރީހީ ދުވަހެއް ކަމަށެވެ.

"ދިވެހިރާއްޖޭގެ ކުޅިވަރު ސޮފުހާތަކުގައި ރަން އަކުރުން ލިޔެވިގެންދާނެ ދުވަހެއް. ދިވެހިރާއްޖޭގައި ބާއްވާ އެންމެ ބޮޑު ކުޅިވަރު މުބާރާތް ލޯންޗު ކުރެވިގެންދާނެ ދުވަސް،" ދުނިޔޭގެ ބޮޑީބިލްޑިން އަދި ފިޒީކްސް ސްޕޯޓްސް ފެޑެރޭޝަން (ޑަބްލިއުބީޕީއެފް) ގެ ނައިބު ރައީސްކަން ވެސް ކުރައްވާ، އިބްރާހިމް ހަމީދު ވިދާޅުވި އެވެ.

އެ ހަފުލާ އަށް ފަހު އިބްރާހިމް ހަމީދު "މިހާރު" އަށް ވިދާޅުވީ މުބާރާތުގެ ކޮންޓިޖެންސީ އާއި އޮގަނައިޒިން މަސައްކަތްތަކާ އެކު، އެ މުބާރާތަކީ ރާއްޖޭގެ ކުޅިވަރުގައި ބާއްވާ އިންޓަނޭޝަނަލް އެންމެ ބޮޑު އިވެންޓަށް ވެސް ވާނެ ކަމަށެވެ.

"ހީއެއް ނުވޭ ރާއްޖޭގައި ކުޅިވަރުގެ މިވަރުގެ އިވެންޓެއް އޮތް ހެނެއް. މި ދެންނެވީ ކުޅިވަރުގެ އެންމެ ބޮޑު އިންޓަނޭޝަނަލް އިވެންޓް. މި އޮގަނައިޒިން މަސައްކަތްތަކާއި ކޮންޓިންޖެންސީ ޕްލޭނަށް ބަލާއިރު މިވާނެ ކުޅިވަރުގައި ރާއްޖޭން ހޯސްޓް ކުރާ އިންޓަނޭޝަނަލް އިވެންޓަށް،" އިބްރާހިމް ހަމީދު ވިދާޅުވި އެވެ.

އޭނާ ވިދާޅުވީ ކުޅިވަރުގެ އިވެންޓެއްގައި ރާއްޖޭގެ ފަތުރުވެރިކަން ވެސް އެންމެ ބޮޑަށް ޕްރޮމޯޓް ވެގެންދާނެ އިވެންޓަށް ވެސް ދުނިޔޭގެ ބޮޑީބިލްޑިން ޗެމްޕިއަންޝިޕު ވާނެ ކަމަށެވެ.

ރާއްޖޭގައި 2022 ގައި އޭޝިއަން ޗެމްޕިއަންޝިޕް ވެސް ބޭއްވި އެވެ. ކ. މާފުށި އަދި ކޮރޮސްރޯޑްގައި ބޭއްވި އެ މުބާރާތަކީ، އޭޝިއާ ބޮޑީބިލްޑިން ފެޑެރޭޝަންގެ ރައީސް ޕޯލް ޗުއާ ވިދާޅުވިގޮތުގައި އެހާތަނަށް އޭނާގެ ބޮޑީބިލްޑިން ހަޔާތުގައި ފެނުނު އެންމެ އިންތިޒާމުތައް ރަނގަޅު އޭޝިއަން ޗެމްޕިއަންޝިޕެވެ. ޑަބްލިއުބީޕީއެފްގެ ރައީސަކީ ވެސް އޭނާ އެވެ.