އިންޑިއާ ދަތުރު ވަރަށް ކާމިޔާބު: ރައީސް

ރައީސް ޑރ. މުހައްމަދު މުއިއްޒު އިންޑިއާ އަށް މިހާރު ކުރައްވަމުން ގެންދަވާ ދަތުރުފުޅު ވަރަށް ކާމިޔާބު ކަމަށް އެ މަނިކުފާނު މިރޭ ވިދާޅުވެއްޖެ އެވެ.

ރައީސް އެހެން ވިދާޅުވީ، އިންޑިއާގެ ބެންގަލޫރުގައި ދިރިއުޅޭ ދިވެހިންނާ ބައްދަލުކުރައްވަން ބޭއްވެވި ހާއްސަ ހަފުލާގަ އެވެ.

އިންޑިއާގެ ރައީސް ދުރޫޕަދީ މުރުމޫގެ ދައުވަތަކަށް މިދިޔަ އާދިއްތަ ދުވަހު ފެއްޓެވި ދަތުރުފުޅާ ގުޅޭ ގޮތުން ރައީސް މުއިއްޒު ވިދާޅުވީ، ދަތުރުފުޅު ވަރަށް ކާމިޔާބު ކަމަށް ދަންނަވަނީ މަގުސަދު ހާސިލް ވެފައިވާތީ ކަމަށެވެ. އެއީ ދިވެހިންނަށް ކަންކަން ފަހިވާ ގޮތަށް ބައެއް މަސައްކަތްތައް ފަށައި އޭގެ ދޮރު ހުޅުވުމުން ކަމަށް އެ މަނިކުފާނު ވިދާޅުވި އެވެ.

ރައީސް ވިދާޅުވީ، މި ސަރުކާރު ވެރިކަމާ ހަވާލުވީ 120 ބިލިއަން ރުފިޔާގެ ބޮޑު ދަރަންޏަކާ އެކު ކަމަށާއި އެކަމަކު އެ ދަރަނި ދެއްކުމަށް ވެސް އިންޑިއާގެ ދަތުރުފުޅުން ވަރަށް ބޮޑު ކުރިއެރުމެއް ލިބުނު ކަމަށެވެ. އޭގެ އިތުރުން ގެދޮރު ބިނާކުރުމާއި އުމްރާނީ ތަރައްގީ އާއި އިގުތިސާދު ފުޅާކުރުމުގެ މަގު ވެސް ފަހިވި ކަމަށް ރައީސް މުއިއްޒު ވިދާޅުވި އެވެ. އަދި ކުރީގެ ސަރުކާރުގެ ދުވަސްވަރު ސްޓޭޓް ބޭންކް އޮފް އިންޑިއާ (އެސްބީއައި) އަށް ދިވެހި ސަރުކާރުން ވިއްކި ޓީ ބޮންޑުގެ ތެރެއިން ބާކީ ނުދައްކާ ހުރި ފައިސާ ދެއްކުން ވެސް ވަނީ ފަސްކޮށްދީފަ އެވެ.

"... އަޅުގަނޑު މި ދެންނެވި ފުރަތަމަ ދުވަހު އިއުލާންކުރި ސިޔާސަތުގެ ދަށުން ދިވެހި ގައުމަށް ދިވެހި ރައްޔިތުންނަށް އެންމެ ފަހިވާނެ ގޮތަށް، އެންމެ ފައިދާވާނެ ގޮތަށް އެހީތެރިކަން ހޯދުމުގެ މަސައްކަތް މި ކުރެވުނީ. އަޅުގަނޑުމެންގެ މި ސަރަހައްދުގެ ރައްކާތެރިކަމާއި ހަމަޖެހުން ވެސް ގާއިމްވެގެންދާ ގޮތަށް، އޭގެއިން ވެސް އަޅުގަނޑުމެންގެ ގައުމަށް ފައިދާވާނެ،" އެ މަނިކުފާނު ވިދާޅުވި އެވެ.

ރައީސް ވިދާޅުވީ، މަސައްކަތްޕުޅު ކުރައްވަނީ ރާއްޖެ އާއި އިންޑިއާގެ ގުޅުމުގެ ތެރެއިން މި ސަރަހައްދުގެ ރައްކާތެރިކަން ވެސް ކަށަވަރު ކުރަން ކަމަށާއި އެއީ ރާއްޖެ އަށް އެންމެ ފައިދާ ހުރި ގޮތް ކަމަށެވެ.

ރައީސް މުއިއްޒު އިންޑިއާ އަށް ކުރައްވަމުން ގެންދަވާ ފުރަތަމަ ފުރަމާނަ ދަތުރުފުޅުގައި ވަނީ އިންޑިއާއާ އެކު މުހިންމު އެއްބަސްވުންތަކެއް ގާއިމްކޮށްފަ އެވެ. އޭގެ ތެރޭގައި އިންޑިއާ އިން ރާއްޖެ އަށް 400 މިލިއަން އެމެރިކާ ޑޮލަރުގެ ކަރަންސީ ސްވޮޕް ފެސިލިޓީއެއް ދިނުމާއި އިންޑިއާގެ އިންސްޓެންޓް ޕޭމެންޓް ސިސްޓަމް، ޔުނިފައިޑް ޕޭމެންޓްސް އިންޓަފޭސް (ޔޫޕީއައި) ގެ ދަށުން ރޫޕޭ ކާޑު ރާއްޖެ އަށް ތައާރަފުކުރުން ހިމެނެ އެވެ.

އިންޑިއާ އިން 400 މިލިއަން ޑޮލަރުގެ ސްވޮޕްގެ އިތުރުން 30 ބިލިއަން އިންޑިއަން ރުޕީސްގެ އަދަދާ ހަމައަށް އެކި ފަހަރު މަތިން ސްވޮޕް ނެގޭނެ އެވެ. އިންޑިއަން ރުޕީސް ސްވޮޕް ފެސިލިޓީ މެދުވެރިކޮށް އިންޑިއާ އާއި ރާއްޖެއާ ދެމެދު ކުރެވޭ ވިޔަފާރީގެ މުއާމަލާތްތައް އެ ގައުމަކަށް ނިސްބަތްވާ ފައިސާއިން ކުރުމަށް މަގުފަހިވާނެ އެވެ.

އިންޑިއާ އިން މިހާރު ވެސް އަންނަނީ ހާއްސަ އަގުތަކެއްގައި ރާއްޖެއަށް ގިނަ ބާވަތްތަކެއް އިމްޕޯޓު ކުރަމުންނެވެ. އޭގެ ތެރޭފައި ހިމެނެނީ ފިޔާ، ހަނޑޫ، ހަކުރު، ފުށް، އަލުވި، ބިސް، މުގު އަދި ހިލަ އާއި ހިލަވެއްޔެވެ.

އިންޑިއާގެ އެގްޒިމް ބޭންކުގެ ލޯން އެހީގައި ހުޅުމާލޭގައި އިމާރާތްކޮށްފައިވާ 700 ހައުސިން ޔުނިޓް ވެސް ނިންމައި، ރައީސް މުއިއްޒުގެ ދަތުރުފުޅުގައި ވަނީ ދިވެހި ސަރުކާރާ ހަވާލުކޮށްފަ އެވެ.

އެ ދަތުރުފުޅުގައި އިންޑިއާގެ ބޮޑުވަޒީރު ނަރެންދުރަ މޯދީއާ އެކު ކުރެއްވި މަޝްވަރާތަކުގެ ތެރެއިން ދެ ގައުމުން ވަނީ "ވިޝަން ޑޮކިއުމަންޓް" އަކަށް ވެސް އެއްބަސްވެފަ އެވެ.

ރައީސް މިރޭ ބެންގަލޫރުގައި ވިދާޅުވީ، "ވިޝަން ފޯ ކޮމްޕްރިހެންސިވް ޕާޓްނާޝިޕް އޮން އިކޮނޮމިކް އެންޑް މެރިޓައިމް ސެކިއުރިޓީ" އަކީ އެންމެންނަށް ފެންނަ ގޮތަށް އޮތް ޑޮކިއުމަންޓެއް ކަމަށެވެ.

"ފެންނަން އޮތް، އަކުރުން ފިއްޔަށް ލިޔެފައި އޮތް އެެއްޗެއް. އޭގައި ދިފާއީ ގޮތުން، ޑިފެންސްގެ ދާއިރާ އިން ލިޔެފައި ހުރި ކޮންމެ ޖުމްލައަކީ އެމްއެެންޑީއެފުން ބައްލަވައި ޑިފެންސް މިނިސްޓްރީން އެޕްރޫވް ކޮށްފައި އޮތް އެއްޗެއް. އޭގައި އޮންނާނީ އަޅުގަނޑުމެންގެ ސިޔާސަތާ އެއްގޮތަށް ހުރިހާ ކަމެއް. ކުރީގައި ވީ ހެން އޭގައި ނުހުންނާނެ ކަންކަމެއް،" ރާއްޖެ އާއި އިންޑިއާ އިން އެއްބަސްވި "ވިޝަން ޑޮކިއުމަންޓް" އާ ގުޅޭ ގޮތުން ރައީސް މުއިއްޒު ވިދާޅުވި އެވެ.

މި ސަރުކާރު ވެރިކަމަށް އައި ދުވަސްކޮޅު ދެ ގައުމުގެ ގުޅުން ގޯސްވި ނަމަވެސް މިހާރު ވަނީ އެ ގުޅުން ވަރަށް ބޮޑަށް ރަނގަޅު ކޮށްފަ އެވެ.