ޓޫރިޒަމުން ރާއްޖެއަށް އާމްދަނީ ހޯދެން އޮތް މިންވަރަށް ނުހޯދޭ: އެމްއައިބީގެ ސީއީއޯ

ޓޫރިޒަމް ދާއިރާއިން ރާއްޖެއަށް އާމްދަނީ ހޯދެން އޮތް މިންވަރާ ގާތަށް ވެސް އާމްދަނީ ނުހޯދޭ ކަމަށް މޯލްޑިވްސް އިސްލާމިކް ބޭންކް (އެމްއައިބީ) ގެ މެނޭޖިން ޑިރެކްޓަރު އަދި ސީއީއޯ މުފައްދަލް އިދްރީސް ހުމްރީ ވިދާޅުވެއްޖެ އެވެ.

މިއަދު ކްރޮސްރޯޑްގައި ކުރިއަށް ގެންދާ އެމްއައިބީގެ ގެސްޓްހައުސް ސިމްޕޯޒިއަމް ފެށުމުގެ ރަސްމިއްޔާތުގައި ވާހަކަ ދައްކަވަމުން މުފައްދަލް ވިދާޅުވީ ޓޫރިޒަމްގެ ދާއިރާއިން ގެސްޓްހައުސްތަކާއި އެކު މިހާރަށް ވުރެ ފުރިހަމައަށް މާކެޓުކޮށް، މިހާރަށް ވުރެ ބޮޑު އާމްދަނީއެއް ހޯދޭނެ ކަމަށެވެ.

"ހަމައެކަނި މޫދާއި ބީޗް މާކެޓް ކުރުމުގެ ބަދަލުގައި އެހެން ދާއިރާތަކުން މާކެޓް ކުރެވެން ހުރިގޮތްތައް ބަލަން ޖެހޭ. ކަލްޗަރަލް ޓޫރިޒަމް މިހާރު މަގުބޫލު ވެފައި ވާއިރު، މިއީ ރަށްރަށުން ގެސްޓްހައުސްތަކުގެ ދާއިރާއިން ގެސްޓުންނަށް ދެވިދާނެ ތަޖުރިބާތަކެއް." އޭނާ ވިދާޅުވި އެވެ.

މުފައްދަލް ވިދާޅުވީ ގެސްޓްހައުސް ވިޔަފާރިއަކީ ގައުމަށް ވަންނަ އާމްދަނީގެ އިތުރުން ވަކިވަކި ފަރުދުންނަށާއި ރަށްރަށަށް ވެސް ބޮޑެތި ފައިދާތަކެއް ލިބި، އިގުތިސާދީ ފައިދާތަކެއް ނިކުންނާނެ ދާއިރާއެއް ކަމަށެވެ.

"މިއީ ގިނަ ވަޒީފާގެ ފުރުސަތުތަކެއް ހުޅުވައިދީ، ރަށްރަށަށް ތަރައްގީގެ ގިނަ ފުރުސަތުތަކެއް ހޯދެން އޮތް ދާއިރާއެއް." އޭނާ ވިދާޅުވި އެވެ.

ގެސްޓްހައުސް ސިމްޕޯޒިއަމްގައި 75 އަށް ވުރެ ގިނަ މީހުން ބައިވެރިވާއިރު، މި ސިމްޕޯޒިއަމްގައި މުފައްދަލް ވަނީ އެ ސިމްޕޯޒިއަމްގެ ބޭނުން އެންމެ ފުރިހަމައަށް ހިފުމަށްފަހު ދާއިރާގެ އެކި ފަރާތްތަކާއެކު ގުޅުން ބަދަހި ކުރުމަށް ހިތްވަރު ދެއްވައިފަ އެވެ.

މި ސިމްޕޯޒިއަމްގެ ހެނދުނުގެ ދަންފަޅީގައި، ގެސްޓްހައުސްގެ އެންމެ ފުރިހަމަ ތަޖުރިބާ ފޯރުކޮށް ދިނުމާއި ގުޅޭ ޕެނަލް ޑިސްކަޝަނެއް ވަނީ ކުރިއަށް ގެންގޮސްފަ އެވެ.

އެމްއައިބީގެ ޗީފް ޕީޕަލް އޮފިސަރު ފާތިމަތު އުލާ މޮޑަރޭޓް ކުރެއްވި އެ ޕެނަލްގައި ޓޫރިޒަމް އެންޑް ހޮސްޕިޓާލިޓީ ކޮންސަލްޓަންޓް ޑރ. ޒާކިޔާ މޫސާ އާއި އެންއެޗްޖީއޭއެމްގެ އެގްޒެކެޓިވް ބޯޑް މެމްބަރު ޒުލޭހާއި އިބްރާހިމް އާއި ގްލޯބަލް ކީނޯޓް ސްޕީކަރު އަދި ސާވިސް އެކްސަލެންސް ޗެމްޕިއަން އަފީފް ހުސެއިން ބައިވެރިވެ ވަޑައިގަތެވެ. އަދި ހިދުމަތުގެ ފެންވަރު ރަނގަޅު ކުރުމާއި ގުޅޭ މުހިންމު މައުލޫމާތުތަކެއް ވަނީ ހިއްސާ ކުރައްވައިފަ އެވެ.

މި ޕެނަލް ޑިސްކަޝަންގައި މާކެޓިން ޕްލެޓްފޯމުތަކުގެ ބޭނުން ހިފުމުގެ މުހިންމު ކަމާއި ވާދަވެރި މާކެޓުން ފާހަގަ ކޮށްލެވޭނެ ގެސްޓްހައުސްއަކަށް ވާން ކުރެވެން ހުރި ބައެއް ކަންތައްތައް ޕެނަލިސްޓުން ފާހަގަ ކުރެއްވި އެވެ. އަދި ހިދުމަތުގެ ކޮލެޓީ ރަނގަޅު ކުރުމަށް ޓްރެއިނިންތަކުގެ މުހިންމު ކަމާއި ފެންވަރު ހިފެހެއްޓުމުގެ މުހިންމު ކަން ޕެނަލިސްޓުން ފާހަގަ ކުރެއްވި އެވެ.

މި ސިމްޕޯޒިއަމްގައި އިތުރު ދެ ޕެނަލް ޑިސްކަޝަނެއް ކުރިއަށް ދާނެ އެވެ. އަދި ޒުވާން ކްރިއޭޓަރުން އެ ފަރާތްތަކުގެ ވިޔަފާރި ހިޔާލުތައް ވެސް ހުށަހަޅާނެ އެވެ.

މި ސިމްޕޯޒިއަމް ކުރިއަށް ދާނީ މިއަދު ހަވީރު 5:30 އާ ހަމައަށެވެ.