އިޒްރޭލަށް ހިޒްބުﷲގެ ޑްރޯން ހަމަލާއެއް، ހަތަރު މީހަކު މަރުވެ އެތައް ބަޔަކު ޒަހަމްވި

އިޒްރޭލް ސިފައިންގެ މަރުކަޒަކަށް ހިޒްބުﷲ އިން ދިން ޑްރޯން ހަމަލާއެއްގައި ހަތަރު މީހަކު މަރުވެ ގިނަ ބަޔަކު ޒަހަމްވެއްޖެ އެވެ.

އާދީއްތަ ދުވަހު އިޒްރޭލުގެ ރެސްކިއު ޚިދުމަތަކުން ބުނެފައިވަނީ، ހައިފާގެ ދެކުނުގައި 60 އަށްވުރެ ގިނަ މީހުން ޒަޚަމްވެފައިވާ ކަމަށެވެ. ހިޒްބުﷲ އިން ކުރިން ބުނި ގޮތުގައި ހަމަލާ ދީފައި ވަނީ އަސްކަރީ ތަމްރީނު ދޭ މަރުކަޒަކަށެވެ.

މި ހަމަލާ ވެފައި ވަނީ ހިޒްުބުﷲ އިން އިޒްރޭލަށް މި ފަހުން ދިން މިފަދަ އެންމެ ބޮޑު ހަމަލާއަށެވެ.

މީހުންނަށް އެހީވުމުގެ މަސައްކަތްކުރާ ޓީމަކުން ބުނި ގޮތުގައި، ޒަހަމްވި މީހުންގެ ތެރޭގައި ވަރަށް ސީރިއަސް ހާލަތުގައި ތިބި މީހުންނާއި އާދައިގެ ވަރަކަށް ޒަހަމްވި މީހުންނާއި ކުދި އަނިޔާތައް ލިބުނު މީހުން ވެސް ހިމެނެ އެވެ.

އާދީއްތަ ދުވަހު ހިޒްބުﷲ އިން ބުނެފައިވަނީ، ލުބްނާނަށް އިޒްރޭލުން ވައިގެ މަގުން ހަމަލާ ދިނުމާ ގުޅިގެން ބަދަލު ހިފުމަށް، ހައިފާގެ ދެކުނުގައިވާ ބިންޔަމީނާގެ އަސްކަރީ ތަމްރީނު ކޭމްޕަކަށް އަމާޒުކޮށް ޑްރޯންތަކެއް ފޮނުވާލާފައިވާ ކަމަށެވެ.

މި ހާދިސާ ހިނގީ، ލުބުނާނުން އައި ދެ ޑްރޯން އިޒްރޭލު ތެރެއަށް ވަދެ، ތެލް އަވީވުގެ އުތުރުގައި އިމާރާތަކަށް ގެއްލުން ލިބި ހާސްކަން އުފެދުނުތާ ދެ ދުވަސް ފަހުންނެވެ.

ހިޒްބުﷲ އިން އެއް އަހަރަށްވުރެ ގިނަ ދުވަހު އިޒްރޭލަށް އަމާޒުކޮށް ރޮކެޓާއި ޑްރޯން ދޫކުރަމުން ގެންދިޔަ ނަމަވެސް، ސެޕްޓެމްބަރު މަހުގެ ފަހުކޮޅު ހަނގުރާމަ ވަރުގަދަވުމާ އެކު މިހާރު އެ ހަމަލާތައް އިޒްރޭލުގެ މާ އެތެރެއަށް ދަނީ ފޯރަމުންނެވެ.

އިޒްރޭލުގެ އަޔަން ޑޯމް ސިސްޓަމުން މީގެ ގިނަ ހަމަލާތައް ހުއްޓުވާފައި ވާތީ، ހަމަލާތަކުގައި ގެއްލުންވާ މީހުންގެ އަދަދު ނިސްބަތުން ވަރަށް މަދެވެ. -- އޭއެފްޕީ