ތެލެސީމިއާ ކުދިންނަށްޓަކައި ލޭ ހަދިޔާކުރުމަކީ އުފަލަކަށް ހަދަން ޖެހޭ: ނައިބު ރައީސް

ލޭ ހަދިޔާކުރުމަކީ ތެލެސީމިއާ ކުދިންގެ ދިރިހުރުމަށް ދެވޭ އުންމީދެއް ކަމަށާއި އެއީ ކޮންމެ މީހެއްގެ ވެސް އުފަލަކަށް ހަދަން ޖެހޭ ކަމެއް ކަމަށް ނައިބު ރައީސް ހުސައިން މުހައްމަދު ލަތީފް ރޭ ވިދާޅުވެއްޖެ އެވެ.

ކުރިއަށް އޮތް 10 އަހަރަށް އެކުލަވައިލި "ތެލެސީމިއާ ޕްރިވެންޝަން އެންޑް ކޮންޓްރޯލް" މާސްޓަޕްލޭން އިފްތިތާހު ކުރުމަށް ބޭއްވި ރަސްމިއްޔާތު ޝަރަފުވެރި ކޮށްދެއްވައި ދެއްކެވި ވާހަކަފުޅުގައި ނައިބު ރައީސް ވިދާޅުވީ، ތެލެސީމިއާ ކުދިންނަކީ މުޖުތަމައުގެ އެއްބައި ކަމަށާއި އެހެން ކުދިންނެކޭ އެއްގޮތަށް އެ ކުދިންނަށް ވެސް ހަމަހަމަ ފުރުސަތުތަކެއް ލިބެން ޖެހޭ ކަމަށެވެ.

އެއާ އެކު، އެ ކުދިންނަށް ސިއްހީ ފަރުވާ ދިނުމުގައި ހާއްސަ ސަމާލުކަން ދޭން ޖެހޭ ކަމަށް ނައިބު ރައީސް ހުސައިން ވިދާޅުވި އެވެ. އެ މަނިކުފާނު ވިދާޅުވީ އެ ކުދިންނަށް އެހީވުމަށް ކޮންމެ މީހަކަށް ވެސް ކުރެވިދާނެ ކަމެއް އެބައޮތް ކަމަށާއި އެއީ ލޭ ހަދިޔާ ކުރުން ކަމަށެވެ.

"ލޭ ހަދިޔާ ކުރުމަކީ ކޮންމެ މީހެއްގެ ވެސް އުފަލަކަށް ހަދަން ޖެހޭ. ލޭ ހަދިޔާ ކުރުމަކީ އެ ކުދިންގެ ދިރިއުހުރުމަށް ދެވޭ އުންމީދެއް ވެސް މެ،" ނައިބު ރައީސް ވިދާޅުވި އެވެ.

ނައިބު ރައީސް ވިދާޅުވިގޮތުގައި، ތެލެސީމިއާ ކުދިންނަށް ބޭނުންވާ ބޯންމެރޯ ޓްރާންސްޕްލާންޓު ހެދުމުގެ މަގު މި ސަރުކާރުން ވަނީ ފަހިކޮށްދީފަ އެވެ. ސަރުކާރުގެ އަމާޒަކީ ކުރިއަށް އޮތް ތަނުގައި އިތުރު ކުދިންނަށް އެ ފުރުސަތު ދިނުން ކަމަށް އެ މަނިކުފާނު ވިދާޅުވި އެވެ.

ރައީސް ޑރ. މުހައްމަދު މުއިއްޒު ގެންދަވަނީ ފެށުނީއްސުރެ ތެލެސީމިއާ ކުދިންނަށްޓަކައި ގިނަގުނަ ކަންކަން ކޮށްދެއްވަމުން ކަން ފާހަގަކުރައްވައި ނައިބު ރައީސް ވިދާޅުވީ، އެ ކުދިންނަށް ހާއްސަ ހޮސްޕިޓަލެއް އިމާރާތް ކުރުމަށް ރޭ ބަޔަކާ ހަވާލު ކުރުމަކީ އޭގެ އެއް ހެކި ކަމަށެވެ.

"އިހުސާންތެރިކަމާއި އޯގާތެރިކަމަށްޓަކައި އެ މަނިކުފާނު މި ފެއްޓެވި މަޝްރޫއަކީ ދިވެހި އާއިލާތައް އުފުލަމުން އައި ތަކުލީފުތަކަށް ލުޔެއް ހޯދައިދިނުމަށް އެ މަނިކުފާނު ނިންމެވި ނިންމެވުމެއް. އިރާދަކުރެއްވިއްޔާ މި ތަނުގައި ލިބެދޭން ޖެހޭ ހިދުމަތް ދިވެހި ސަރުކާރުން ކަށަވަރު ކުރަމުން ގެންދާނެ،" ރައީސް މުއިއްޒަށް ތައުރީފު ކުރައްވަމުން ނައިބު ރައީސް ހުސައިން ވިދާޅުވި އެވެ.

އެ މަނިކުފާނު ވިދާޅުވި ގޮތުގައި، މިއީ ދެމެހެއްޓެނިވި ގޮތެއްގައި ދެވޭނެ ހިދުމަތެއްކަން މި ސަރުކާރުން ޔަގީން ކުރާނެ އެވެ.