މި އަހަރުގެ ކޮޕް ސަމިޓަށް ރާއްޖެއިން ތައްޔާރުވާން ފަށައިފި

ދުނިޔޭގެ ތިމާވެށީގެ އެންމެ ބޮޑު ކޮންފަރެންސް ކޮޕް ސަމިޓުގެ މި އަހަރުގެ ބައްދަލުވުމަށް ރާއްޖެއިން ތައްޔާރުވާން ފަށައިފި އެވެ.

އދ. އިން އިންތިޒާމުކޮށްގެން ކޮންމެ އަހަރަކު އެއް ފަހަރު ބާއްވަމުން އަންނަ ކޮޕް ސަމިޓްގެ 29 ވަނަ ބައްދަލުވުން މި އަހަރު ބާއްވަނީ އަޒަރްބައިޖާންގެ ވެރިރަށް ބާކޫގަ އެވެ. އެ ކޮންފަރެންސް ކުރިއަށް ގެންދަނީ އަންނަ މަހު 11-22 ގެ ނިޔަލަށެވެ.

ރައީސް އޮފީހުން މިއަދު ބޭއްވި ނިއުސް ކޮންފަރެންސްގައި ތިމާވެއްޓާ ބެހޭ މިނިސްޓަރު ތޯރިގް އިބްރާހިމް ވިދާޅުވީ މި ފަހަރުގެ ކޮޕް ސަމިޓުގައި ރާއްޖެ އިން އިންތިޒާމު ކޮށްގެން ހަތަރު ސައިޑް އިވެންޓެއް ބާއްވަން ތައްޔާރުވަމުން އަންނަ ކަމަށެވެ.

އޭގެ ތެރޭގައި، އޭޝިއަން ޑިވެލޮޕްމަންޓް ބޭންކް (އޭޑީބީ)އާ ގުޅިގެން އިޔާދަކުރަނިވި ހަކަތައިގެ ހަރަކާތަކާއި އެޓޯލްސް ނޭޝަނަލް ޗެއާގެ ހައިސިއްޔަތުން ސަސްޓެއިނަބަލް ކޮރަލްރީފް މެނޭޖުމަންޓާ ގުޅޭ ހަރަކާތެއް ހޯސްޓުކުރާނެ އެވެ.

ކުދި ޖަޒީރާ ގައުމުތަކުގެ ކްލައިމެޓް އެޑަޕްޓޭޝަން މިނިސްޓީރިއަލް ޗެމްޕިއަންގެ ހައިސިއްޔަތުން ވެސް ރާއްޖެ އިން މަސައްކަތްކުރާނެ ކަމަށް ތޯރިގް ވިދާޅުވި އެވެ.

ތޯރިގް ވިދާޅުވީ ލޮސްޓް އެންޑް ޑެމޭޖް ފަންޑަށް ފައިސާގެ އެހީ އިތުރުކުމަށް ވެސް ރާއްޖެ އިން ކޮޕް ސަމިޓުގައި ވަކާލާތުކުރާނެ ކަމަށެވެ.

ރާއްޖޭގެ ބައިނިއަލް ޓްރާންސްޕޭރެންސީ ރިޕޯޓް ލޯންޗުކުރުމަށް ވެސް ސައިޑް އިވެންޓެއް ބޭއްވުމަށް ވަނީ ނިންމައިފަ އެވެ.

"މިއީ ރާއްޖެއިން ކޮޕްގައި އެންމެ ގިނަ ސައިޑް އިވެންޓް ބާއްވާ ފަހަރު،" ތޯރިގް ވިދާޅުވި އެވެ.

ތޯރިގް ވިދާޅުވީ މި އަހަރުގެ ކޮޕް ސަމިޓަށް ތައްޔާރުވުމުގެ ދިވެހި ޒުވާނުންގެ އަޑު އެ ބައްދަލުވުމަށް ގެންގޮސްދިނުމުގެ މަގުސަދުގައި "ޔޫތު ޓްރެކް ޓު ކޮޕް29"ގެ ނަމުގައި މޮކް ކޮޕް އިވެންޓެއްގެ ވެސް މީގެ ދެ ހަފުތާ ކުރިން މާލޭގައި ބޭއްވި ކަމަށެވެ. މޫސުމީ ބަދަލުތަކަށާއި ކޮޕް ސަމިޓަށް ޒުވާން ހޭލުންތެރިކުރުވުމުގެ މަސައްކަތް އެ ހަރަކާތުގައި ކުރި ކަމަށް އޭނާ ވިދާޅުވި އެވެ.

"އެ މޮކް ކޮޕްގައި ޒުވާނުން ތައްޔާރުކުރި ސްޓޭޓްމަންޓް ކޮޕް ސަމިޓަށް ގެންދިއުމަށް ރައީސުލްޖުމްހޫރިއްޔާއާ ހަވާލުކުރެވޭނެ،" ތޯރިގް ވިދާޅުވި އެވެ.

މި ފަހަރުގެ ކޮޕް ސަމިޓަށް ވެސް ރައީސް ޑރ. މުހައްމަދު މުއިއްޒު ވަޑައިގަންނަވާނެ އެވެ. ރައީސް ވަނީ މިދިޔަ އަހަރު ޔޫއޭއީގެ ދުބާއީގައި ބޭއްވި ކޮޕް ސަމިޓަށް ވެސް ވަޑައިގެން އެ ބައްދަލުވުމުގައި ތަގުރީރުކުރައްވައިފަ އެވެ.