ރެޑްބުލް ހާފްކޯޓް ވޯލްޑް ފައިނަލްސް އަށް އަންރޭންކްޑް ނިއުޔޯކުގައި

ރެޑްބުލް ހާފްކޯޓް ވޯލްޑް ފައިނަލްސް 3x3 ބާސްކެޓް ބޯޅަ މުބާރާތުގައި ވާދަކުރަން ރާއްޖޭގެ ޗެމްޕިއަން "އަންރޭކްޑް" އެމެރިކާގެ ނިއު ޔޯކް ސިޓީ އަށް ހިނގައްޖެ އެވެ.

މިއަހަރު ރާއްޖޭގެ ޗެމްޕިއަން އަންރޭންކްޑް ވަނީ މިދިޔަ އަހަރު ރާއްޖޭގައި ބޭއްވި ރެޑްބުލް ހާފް ކޯޓް މުބާރާތް ވެސް ކާމިޔާބުކޮށް، ސާބިއާގައި އޮތް ވޯލްޑް ފައިނަލްގައި ރާއްޖެ ތަމްސީލު ކޮށްފަ އެވެ.

ނިއު ޔޯކުގެ ބްރޫކްލީން ބްރިޖް ޕާކްގައި މާދަމާ ފަށާ މުބާރާތުގައި ވާދަކުރާ އަންރޭންކްޑް ޓީމުގައި ހިމެނެނީ، މަފާޒް މުހައްމަދު، 31، އާއި އިސްމާއިލް ފަރުހާން، 30، އަދި އިބްރާހިމް ނަސީމް، 29، ގެ އިތުރުން މުހައްމަދު ސަބީހް ތައުފީގް، 26، އެވެ.

ބާސްކެޓުގައި އެންމެ ކުރިއަރާފައިވާ އެމެރިކާއަށް ދާން އަންރޭންކްޑް ފުރީ، މެޗެއް ކާމިޔާބު ކުރުމުގެ އުންމީދުގަ އެވެ. މީގެ އިތުރުން ތުރީ ޕޮއިންޓް ކޮންޓެސްޓުގައި ބައިވެރިވެ، ވަނައެއް ހޯދުމަކީ ވެސް މިއަހަރުގެ އަމާޒެކެވެ.

"އިރާދަކުރެއްވިއްޔާ ކޮންމެވެސް އެއް ކަމެއް ހާސިލް ކުރަން މިއަހަރު މި ދަނީ. އެއީ މަދުވެގެން މެޗެއް ކާމިޔާބު ކުރުން ނުވަތަ ތުރީ ޕޮއިންޓް ޗެލެންޖުގައި ވާދަކޮށް ވަނައެއް ހޯދުން،" ނިއު ޔޯކަށް ފުރުމުގެ ކުރިން މީޑީއާއާ ވާހަކަ ދައްކަމުން މަފާޒް ބުންޏެވެ.

މީގެ އިތުރުން މަފާޒް ބުނީ އެމެރިކާގައި ބާސްކެޓްބޯޅަ ތަޖުރިބާކޮށްލަން ލިބޭ މި ފުރުސަތުގައި ސްޕޮންސަރުންގެ ފަރާތުން ލިބޭ އެހީތެރިކަން ފާހަގަ ކޮށްފަ އެވެ. އެގޮތުން ސްޕޮންސަރުންގެ އެހީއާ އެކު، މުބާރާތް ނިންމާފައި 10 ދުވަހުގެ ޓްރޭނިން ކޭމްޕެއްވެސް ހަމަޖެހިފައިވާކަން އޭނާ ފާހަގަ ކުރި އެވެ.

"މުބާރާތް ނިންމާލައިފައި އެއް ދުވަސް ފަހުން ފުރަން ސިއާޓްލް އަށް. އެތަނުގައި 10 ވަރަކަށް ދުވަހު ޓްރޭނިންއެއް ފުރިހަމަ ކޮށްފަައި ރާއްޖެ އަންނާނީ،" މަފާޒް ބުންޏެވެ.

"މި ޓްރޭނިން އަކީ ސްޕޮންސާޑް އެއްޗެއް. މިކޮޅުގެ ބައިވަރު ސްޕޮންސަރުންގެ އެހީއާ އެކު މި ފުރަނީ ވެސް، އޭގެ ތެރޭގައި ހޯކްސް އާއި އެސްޓީއޯ އަދި އަމިއްލަ ބައިވަރު ބައެއްގެ އެހީއާ އެކު މިކަން ފުރިހަމަ މި ވަނީ. މި ކަންކަމަށް ފަހު އިރާދަކުރެއްވިއްޔާ އަހަރެމެންގެ ކުޅުމަށް ރަނގަޅު ކުރިއެރުމެއް ލިބޭނެ ކަމަށް އުންމީދު ކުރަނީ."

މިދިޔަ އަހަރު ސާބިއާ ފައިނަލްގައި ވެސް ރާއްޖޭގެ އަންރޭންކްޑް އިން ވާދަ ކުރީ މި ސްކޮޑެވެ. މިދިޔަ އަހަރުގެ ވޯލްޑް ފައިނަލްސްގެ ފިރިހެން ޗެމްޕިއަންކަން ހޯދީ ސާބިއާ އެވެ. އަދި އަންހެން ޗެމްޕިއަންކަން ހޯދީ މިސްރެވެ.

މިއީ ރެޑްބުލް ހާފް ކޯޓް ވޯލްޑް ފައިނަލްސްގައި ރާއްޖެ ތަމްސީލުކުރާ ތިން ވަނަ ފަހަރެވެ. އެންމެ ފުރަތަމަ 2022 ވަނަ އަހަރު ރާއްޖޭގެ ޗެމްޕިއަންކަން ހޯދި ސްނެޕާސް ވަނީ މިސްރުގެ ވެރިރަށް ކެއިރޯގައި އެ އަހަރު އޮތް ވޯލްޑް ފައިނަލްސްގައި ކުޅެފަ އެވެ.