ކްރިކެޓުގެ ފުރަތަމަ މެޗުން ރާއްޖެ މޮޅުވެއްޖެ

ބޫޓާންގައި މިއަދު ފެށި ޓީ20 އިންޓަނޭޝަނަލް ކުއަޑްރަންގިއުލާ ކްރިކެޓް މުބާރާތުގައި ރާއްޖެ ކުޅުނު ފުރަތަމަ މެޗު، ވިއްސާރަ ވުމުގެ ސަބަބުން، 23 ލަނޑުން ރާއްޖެ މޮޅުވީ ކަމަށް ނިންމައިފި އެވެ.

އިންޑޮނޭޝިއާއާ ދެކޮޅަށް ކުޅުނު މި މެޗުގައި އެ ޓީމަށް ޓޮސް ދިމާވުމުން ނިންމީ ފުރަތަމަ ކުޅޭށެވެ. އިންޑޮނޭޝިއާ އަށް 19.2 އޯވަރު ތެރޭ ހުރިހާ ކުޅުންތެރިން ނުބައިވެގެން ހަމަކުރެވުނީ 95 ލަނޑެވެ. ރާއްޖޭގެ އަލީ ޝުނާން މި އިނިންސްގައި ހަތަރު ވިކެޓު ނެގި އިރު، ލީމް ޝަފީގް ވަނީ ތިން ވިކެޓު ނަގައިފަ އެވެ.

ޖަވާބުގައި ކުޅެން އަރައި ރާއްޖޭން ވަނީ 12 އޯވަރު ތެރޭ ދެ ކުޅުންތެރިން ނުބައިވެގެން 75 ލަނޑު ހަދައިފަ އެވެ. އެ ވަގުތު ވިއްސާރަ ވުމުގެ ސަބަބުން މެޗު މެދުކަނޑާލަން ޖެހުނު އިރު، މެޗު އިތުރަށް ކުރިއަށް ނުގެންދެވިގެން ނިންމާލީ، މި އިނިންސްގައި ރާއްޖޭގެ ޓާގެޓް 53 ލަނޑަށް ރިވައިސްކޮށްފަ އެވެ.

ރާއްޖޭގެ އުންމީދީ ބެޓްސްމަން އިބްރާހިމް ޝައުފް ހަސަން ވަނީ މިއަދު ފުރަތަމަ ފަހަރަށް ސީނިއާ ޓީމަށް ކުޅެފަ އެވެ. އަދި ނުބައި ނުވެ އޭނާ ވަނީ މެޗުގައި 29 ބޯޅައިން 26 ލަނޑު ހަދައިފަ އެވެ.

ބޫޓާން ވަނީ ފުރަތަމަ މެޗުގައި މިއަދު ތައިލެންޑާ ވާދަކޮށް 77 ލަނޑުން ބަލިވެފަ އެވެ. ތައިލެންޑުން ފުރަތަމަ ކުޅެން އަރައި 20 އޯވަރު ތެރޭ ހަ ކުޅުންތެރިން ނުބައިވެގެން 171 ލަނޑު ހެދި އިރު، ބޫޓާނުން 19.4 އޯވަރު ތެރޭ ހުރިހާ ކުޅުންތެރިން ނުބައިވެގެން ހެދުނީ 94 ލަނޑެވެ.

ރާއްޖޭގެ ދެވަނަ މެޗުގައި މާދަމާ ނުކުންނާނީ ބޫޓާނާ ދެކޮޅަށެވެ. އެއަށް ފަހު ތައިލެންޑާ ދެކޮޅަށް ކުޅޭނީ އަންގާރަ ދުވަހު އެވެ.