ދައުލަތަށް ފައިސާ ނުދައްކާ ފަރާތްތަކުގެ ބޭންކް އެކައުންޓް ފްރީޒްކުރާ އުސޫލު ހަރުކަށިކޮށްފި

ދައުލަތަށް ދައްކަންޖެހޭ ބޮޑެތި އަދަދުތަކުގެ ފައިސާ ނުދައްކާ ފަރާތްތަކުގެ ބޭންކް އެކައުންޓްތައް ހިފެހެއްޓުމުގެ އުސޫލު މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އިން ހަރުކަށިކޮށްފި އެވެ.

މީރާއިން ހަދާފައިވާ އުސޫލު ކުރިން އޮންނަ ގޮތުން އެކައުންޓް ފްރީޒް ކުރެވޭނީ ފައިސާ ދެއްކުމަށް 60 ދުވަހުގެ ނޯޓިހެއް ދިނުމަށްފަހު އެ މުއްދަތުގައި ފައިސާ ނުދައްކާނަމަ އެވެ. ނަމަވެސް މިއަދު ގެނައި އިސްލާހު އޮތްގޮތުން 60 ދުވަސް ހަމަނުވި ނަމަވެސް ނޯޓިސް މުއްދަތު ހަމަވުމުން އެކައުންޓް ފްރީޒް ކުރެވިދާނެ އެވެ.

ދައުލަތަށް ފައިސާ ނުދައްކާ ފަރާތްތަކުގެ ބޭންކް އެކައުންޓް ފްރީޒް ކުރާނީ ޖޫރިމަނާ އާއި އިންޓްރެސްޓް ނުހިމެނޭ ގޮތަށް މީރާއިން ކަނޑައަޅާ އަދަދަށް ވުރެ މަތީ އަދަދެއް ނުދައްކާ އޮވެގެންނެވެ. ނަމަވެސް އިންސްޓޯލްމެންޓް އުސޫލުގެ ތެރެއިން ފައިސާ ބަހާލައިގެން ދައްކަން އެއްބަސްވެފައިވާނަމަ ނުވަތަ އެއީ ދައުލަތުގެ އިދާރާއެއް ނުވަތަ ސަރުކާރުގެ މެޖޯރިޓީ ހިއްސާ އޮތް ކުންފުންޏެއް ނަމަ ބޭންކް އެކައުންޓް ފްރީޒެއް ނުކުރާނެ އެވެ.

މީރާއިން ދަނީ ޓެކްސް ނުދައްކާ ފަރާތްތަކާ މެދު އަޅާ ފިޔަވަޅުތައް ވަރުގަދަ ކުރަމުންނެވެ. މިދިޔަ ތިން މަހުގެ މީރާ އިން ވަނީ ޓެކްސް ނުދައްކާ ފަރާތްތަކަށް 67،000 އަށް ވުރެ ގިނަ "ރިމައިންޑާ" އަދި ނޯޓިސް ފޮނުވައިފަ އެވެ.