މިއީ ޣައްޒާގެ ހަމަލާތައް ހުއްޓަންވީ ވަގުތު: އެމެރިކާ

މިއީ ފަލަސްތީނުގެ ޣައްޒާގައި އިޒްރޭލުން ދެމުން ގެންދާ ހަމަލާތައް ހުއްޓާލަންވީ ވަގުތު ކަމަށާއި އިޒްރޭލުން އީރާނާ ކުރިމަތިލައި ހާލަތު އިތުރަށް ގޯސްކޮށްގެން ނުވާނެ ކަމަށް އެމެރިކާގެ ސެކްރެޓަރީ އޮފް ސްޓޭޓް އެންތަނީ ބްލިންކެން އިއްޔެ ވިދާޅުވެއްޖެ އެވެ.

އިޒްރޭލުން ފަލަސްތީނުގެ ޣައްޒާގައި ހަމާސްއާ ދެކޮޅަށް ކަމަށް ބުނެ ހަމަލާތައް ދެމުން ދާއިރު ލުބްނާންގައި ދަނީ އެ ގައުމުގެ ހިޒްބުﷲ ޖަމާއަތާ ދެކޮޅަށް ހަމަލާތައް ދެމުންނެވެ. އަދި އީރާނުން މި މަހުގެ ފުރަތަމަ ދުވަހު އިޒްރޭލަށް މިސައިލްތަކެއް ފޮނުވާލައި ދިން ހަމަލާގެ ބަދަލު ހިފާނެ ކަމުގެ އިންޒާރު ވެސް ދަނީ ދެމުންނެވެ.

އިޒްރޭލުން ލުބްނާންގައި ދޭ ހަމަލާތަކަށް ހުއްޓުމެއް ނުގެނެސް ފަހަރަކު ސަރަހައްދަކުން އާންމުން ނުކުތުމަށް އަންގައި އެ ތަންތަނަށް ދަނީ ވަރުގަދަ އަށް ހަމަލާ ދެމުންނެވެ.

ހާލަތު ވަރަށް ބޮޑަށް ނުރައްކާވެފައި އޮއްވައި ބްލިންކެން އެ ސަރަހައްދަށް މިހާރު ވަޑައިގެންފައި މި ވަނީ ޣައްޒާގައި ހަމަލާތައް ދޭން ފެށި ފަހުން 11 ވަނަ ފަހަރަށެވެ. ހަމަލާތައް ހުއްޓުމަކަށް ގެނައުމަށް އެމެރިކާއިން މިހާތަނަށް ކުރި ހުރިހާ މަސައްކަތެއް ވަނީ ފެއިލްވެފަ އެވެ.

އިޒްރޭލުގެ ބޮޑުވަޒީރު ބިންޔާމިން ނަތަންޔާހޫއާ ބައްދަލުކުރެއްވުމަށް ފަހު ބްލިންކެން ވިދާޅުވީ އިޒްރޭލުން ޣައްޒާއަށް މީގެ އަހަރެއް ކުރިން ހަމަލާ ދޭން ފެށި ފަހުން އެތަނުގައި އިޒްރޭލުން ހާސިލްކުރަން ބޭނުންވި ގިނަ ކަންކަން މިހާރު ހާސިލްވެފައިވާ ކަމަށެވެ.

"... މިހާރު މިއީ އެ ކާމިޔާބީ ސްޓްރެޓީޖިކް ކާމިޔާބީއަކަށް ބަދަލުކުރުމުގެ ވަގުތު،" ބްލިންކެން ވިދާޅުވި އެވެ.

އިޒްރޭލުން އީރާންގެ ކިބައިން ބަދަލު ހިފާނެ ކަމުގެ އިންޒާރު ދޭތީ އެކަމަށް އިޝާރާތްކުރައްވައި ބްލިންކެން ވިދާޅުވީ ރައްދު ދޭންވާނީ ހާލަތު މާބޮޑަށް އިތުރަށް ގޯސް ނުވާނެ ގޮތަކަށް ކަމަށެވެ.

އިޒްރޭލުން މިފަހަރު ޣައްޒާއަށް ހަމަލާތައް ދޭން ފެށީ މިދިޔަ އަހަރުގެ އޮކްޓޫބަރު 7 ގައި ހަމާސް އިން އިޒްރޭލަށް ކުއްލި ހަމަލާތަކެއް ދީ ހާހަކަށްވުރެ ގިނަ މީހުން މަރާލައި 250 އަށް ވުރެ ގިނަ މީހުން ރަހީނުކުރުމާ އެކުގަ އެވެ. އިޒްރޭލުގެ ހަމަލާތަކުގައި މިހާތަނަށް ވަނީ ފަލަސްތީނުން 42،792 މީހަކު ޝަހީދުވެފަ އެވެ. -- އޭއެފްޕީ