އައިޖީއެމްއެޗަށް 75 އެނދު އިތުރުކޮށް، ދަރުމަވަންތަ ހޮސްޕިޓަލް އެއްކޮށް ބޭނުންކުރަނީ

ޖާގައިގެ ދަތިކަން ކުރިމަތިވެފައިވާ ސަރުކާރުގެ މައި ހޮސްޕިޓަލް، އައިޖީއެމްއެޗަށް 75 އެނދު އިތުރުކޮށް ދަރުމަވަންތަ ހޮސްޕިޓަލްގައި މިހާތަނަށް ބޭނުން ނުކޮށް ހުރި ގިނަ ފްލޯތަކާ އެކު މުޅި ހޮސްޕިޓަލް އެއްކޮށް ބޭނުންކުރަން ފަށަން ތައްޔާރުވެއްޖެ އެވެ.

މާލެ ހޮސްޕިޓަލްސް ގްރޫޕުން މިއަދު ބޭއްވި ޕްރެސް ކޮންފަރެންސްގައި ވަނީ އައިޖީއެމްއެޗާއި ދަރުމަވަންތަ އާއި ހުޅުމާލެ ހޮސްޕިޓަލްގެ އިތުރުން ވިލިމާލެ ހޮސްޕިޓަލުގެ ހިދުމަތްތައް ފުޅާކުރަން މިހާރު ކުރަމުން އަންނަ މަސައްކަތްތަކާއި ކުރިއަށް ރާވާފައި ހުރި ޕްލޭންތައް ހާމަކޮށްފަ އެވެ.

އޭގެ ތެރެއިން މުހިއްމު އެއް ކަމަކީ އެންމެ ގިނަ ބަޔަކު ހިދުމަތް ހޯދާ، އައިޖީއެމްއެޗްގެ ބެޑް ކެޕޭސިޓީ އިތުރު ކުރުމެވެ.

އައިޖީއެމްއެޗުގެ ސީއީއޯ، އިބްރާހިމް އަބްދުއްރައްޒާގް ހަލީމް ވިދާޅުވީ 1995 ވަނަ އަހަރު އެ ހޮސްޕިޓަލް ހުޅުވިއިރު ހުރީ 186 އެނދު ކަމަށެވެ. އޭރު މާލެ އާއި ވިލިމާލޭގެ އާބާދީއަކީ 62،519 އެވެ.

ނަމަވެސް، ވޭތުވެދިޔަ 29 އަހަރުގެ ތެރޭގައި އާބާދީ ލައްކައިން އަރައިގެން ދިޔައިރު ވެސް ހޮސްޕިޓަލަށް އިތުރުކުރެވުނީ 130 އެނދު ކަމަށް އޭނާ ވިދާޅުވި އެވެ. މިދިޔަ އަހަރުގެ ހިސާބުތަކުން މާލެ ސަރަހައްދުގައި 212،138 މީހުން ދިރިއުޅުނު ކަމަށް ލަފާކުރިއިރު، ބެޑް ކެޕޭސިޓީއަކީ 316 އެނދެވެ.

ހަލީމް ވިދާޅުވި ގޮތުގައި، މި އަދަދުތަކަށް ބަލައި އައިޖީއެމްއެޗުގެ ބެޑް ކެޕޭސިޓީ އިތުރުކުރަން އަންނަނީ މަސައްކަތް ކުރަމުންނެވެ. ފުރަތަމަ އިތުރުކުރަން ނިންމާފައި ވަނީ 75 އެނދު ކަމަށް އޭނާ ވިދާޅުވި އެވެ.

ބެޑް ކެޕޭސިޓީ އިތުރުކުރާ ގޮތް

- ޖެނެރަލް ވޯޑަށް 44 އެނދު

- އެޗްޑީޔޫއަށް 15 އެނދު

- ޕްރައިވެޓް ވޯޑަށް 14 އެނދު

- ބާން ޔުނިޓުގެ ގޮތުގައި ދެ އެނދު

އެ ތަންތަން ހަދަނީ އައިޖީއެމްއެޗުގެ އެޑްމިޓް ބްލޮކް ހުސްކުރުމަށް ފަހު އެވެ.

އޭނާ ވިދާޅުވީ އަލަށް އިތުރުކުރާ އެނދުތަކުގެ ސަބަބުން ހިދުމަތްތައް ހޯދާ މީހުންނަށް ބޮޑު ލުއެއް ލިބިގެންދާނެ ކަމަށެވެ.

"ހޮސްޕިޓަލުން ހިދުމަތް ހޯދާ ރައްޔިތުންނަށް އެނގިވަޑައިގަންނަވާނެ ބެޑް ނުލިބިގެން އުޅެން ޖެހޭ ހާލު. ގިނަ ފަހަރު އީއާރު ތެރޭގައި އެޑްމިޓުކޮށްގެން އެބަ ބާއްވަން 19 ޕޭޝަންޓުން ނޫނީ 16 ޕޭޝަންޓުން ވޯޑުތަކުން ބެޑެއް ވެސް ނުލިބިގެން. ހަމަ އެގޮތަށް، ބައެއް ސާޖަރީތައް ހެދުމުގައި ޑިލޭވަމުން ދޭ ޝެޑިއުލްކޮށްފައި ވެސް ބައެއް ފަހަރު އިމަޖެންސީ ހާލަތެއް ދިމާވީމަ،" ހަލީމް ވިދާޅުވި އެވެ.

"އަނެއް ސަބަބަކީ ސާޖަރީ ހަދާފައި އެޑްމިޓްކުރާނެ ބެޑު ވެސް ނެތީމަ ވެސް ސާޖަރީތައް ކެންސަލް ކުރަންޖެހޭ ހާލަތްތައް ދިމާވޭ. އަޅުގަނޑުމެން މެނޭޖްމަންޓުން ވަރަށް އިސްކަންދީގެން ކުރާ ކަމެއް މި އަހަރުގެ ތެރޭގައި ބެޑް ކެޕޭސިޓީ އިތުރުކުރުން. އެގޮތުން، 75 އެނދު އައިޖީއެމްއެޗްގައި އިތުރުކުރެވިގެންދާނެ ކުރިއަށް އޮތް ކުޑަ ދުވަސްކޮޅެއްގެ ތެރޭގައި."

ދަރުމަވަންތަ ހުޅުވިތާ އަހަރުތަކެއް ވިއަސް ފުރިހަމަ ފައިދާ ނުލިބޭ

ކުރީގެ ރައީސް އަބްދުﷲ ޔާމީންގެ ސަރުކާރުގައި 2.2 ބިލިއަން ރުފިޔާ ހަރަދުކޮށްގެން އިމާރާތްކުރި ދަރުމަވަންތަ ހޮސްޕިޓަލް ޑިޒައިންކޮށްފައިވަނީ ވޯޑުތައް ބަހައްޓާ ގޮތަކަށް ނޫނެވެ. އޭގެ ބަދަލުގައި ހުރީ، ޕްރައިވެޓް ރޫމްތަކާއި ވީއައިޕީ ކޮޓަރިތަކެވެ.

ހަލީމް ވިދާޅުވި ގޮތުގައި އައިޖީއެމްއެޗްގައި ބަހައްޓާ 75 އެނދުގެ އިތުރަށް ދަރުމަވަންތަ ހޮސްޕިޓަލްގެ 17 ވަނަ ފްލޯގައި 16 އެނދުގެ އެންއައިސީޔޫ އާއި ހަ އެނދުގެ ޑެލިވަރީ ސޫޓް އަދި 18 އާއި 19 ވަނަ ފްލޯގައި ވެސް 14 އެނދު ބަހައްޓާނެ އެވެ.

އޭގެ އިތުރުން ހުޅުމާލެ ހޮސްޕިޓަލުގައި އިތުރުކުރާ އެންއައިސީޔޫ އާއި އައިސީޔޫ ބެޑުތަކާ އެކު، މާލެ ސަރަހައްދުގެ ބެޑް ކެޕޭސިޓީ 172 އަށް އިތުރުވާނެ ކަމަށް އޭނާ ވިދާޅުވި އެވެ.

ހަލީމް ވިދާޅުވީ ދަރުމަވަންތަ ހޮސްޕިޓަލް ހުޅުވިތާ އަހަރުތަކެއް ވެގެން ދިއަސް އެ ތަން އަދި ވެސް ފުރިހަމައަށް ބޭނުން ނުކުރާ ކަމަށެވެ. މިސާލެއް ދައްކަވަމުން ވިދާޅުވީ އެ ހޮސްޕިޓަލުގައި 17 ވަނަ ފްލޯ އިން 19 ވަނަ ފްލޯއާ ހަމައަށް ބޭނުން ނުކުރާ ކަމަށެވެ. އެއީ، މުވައްޒަފުންގެ ދަތިކަމާއި ބައެއް ތަކެތީގެ ދަތިކަމާ ހެދި ކަަމަށް ވިދާޅުވި އެވެ.

"ސަރުކާރުގެ ހައި ޕްރިއޮރިޓީއެއް ދަރުމަވަންތަ ހޮސްޕިޓަލް ފުލް ފަންކްޝަނަލްޓީއަށް މި އަހަރު ގެނައުން. އެ ގޮތުން އިރާދަކުރެއްވިއްޔާ އަޅުގަނޑުމެން މި ފަށަނީ 17،18 އަދި 19 ފްލޯއާ އެކީގައި،" ހަލީމް ވިދާޅުވި އެވެ.