އައިޖީއެމްއެޗްގެ ކިއު ކުޑަކުރަން ޖީޕީ ކްލިނިކްތައް ހުޅުވައި ރިފަރަލް ސިސްޓަމަކަށް ދަނީ

އައިޖީއެމްއެޗްގެ ކިއު ކުޑަކުރަން ޖެނެރަލް ޕްރެކްޓިސް (ޖީޕީ) ކްލިނިކްތަކެއް ހުޅުވައި، ރިފަރަލް ސިސްޓަމަކަށް ދާން ނިންމައިފި އެވެ.

މާލެ ހޮސްޕިޓަލްސް ގްރޫޕުން މިއަދު ބޭއްވި ނިއުސް ކޮންފަރެންސްގައި ސީއީއޯ އިބްރާހިމް ހަލީމް ވިދާޅުވީ ޖީޕީ ކްލިނިކްތައް ހެދުމުން އިމަޖެންސީ ހާލަތްތައް ފިޔަވައި އާއްމު ބަލިތަކަށް ފަރުވާ ހޯދުމަށް އެ ކްލިނިކްގެ މެޑިކަލް އޮފިސަރަށް ދައްކައި، އެ ޑޮކްޓަރުގެ ލަފާގެ މަތިން ސީދާ ކްލިނިކުން ސްޕެޝަލިސްޓަށް ދެއްކުމަށް އައިޖީއެމްއެޗަށް އެޕޮއިންޓްމަންޓް ހެދޭނެ ކަމަށެވެ.

ރާއްޖޭގައި ރިފަރަލް ސިސްޓަމެއް ނެތުމުން ކުދިކުދި ކަންކަމުގައި އީއާރަށް ދެއްކުމާއި ބައްޔާ ގުޅޭ ސްޕެޝަލިސްޓް ނޫން އެހެން ޑޮކްޓަރުންނަށް ވެސް އެޕޮއިންޓްމަންޓް ހައްދާކަން ހަލީމް ފާހަގަކުރެއްވި އެވެ.

ނަމަވެސް، އެ ސިސްޓަމަށް ދިއުމުން އާސަންދައަށް ލުއި ލިބި، ބަލި މީހުންނަށް ވެސް ސްޕެޝަލިސްޓު ޑޮކްޓަރުންނަށް ދައްކަން ފަސޭހައިން އެޕޮއިންޓްމަންޓް ލިބޭނެ ކަމަށް އޭނާ ވިދާޅުވި އެވެ.

"ޖީޕީ ކްލިނިކަށް ދެއްކުމަށް ފަހު، ކްލިނިކް މެދުވެރިކޮށް، ސްޕެޝަލިސްޓަކަށް ދައްކަން ޖެހިއްޖެ ހާލަތެއްގައި އެޕޮއިންޓްމަންޓް އަޅުގަނޑުމެން ކްލިނިކް މެދުވެރިކޮށް ހައްދައި ދޭނެ. އައިޖީއެމްއެޗް، ދަރުމަވަންތަ އަދި ހުޅުމާލެ ހޮސްޕިޓަލް އީއާރަށް އޮންނަ ލޯޑު ވެސް ކުޑަކުރެވިދާނެ. ހަގީގަތުގައި އީއާރަކީ އިމަޖެންސީގައި އަންނަން ޖެހޭ ތަނަކަށް، އޭގެ ހަގީގީ މާނައިގައި އީއާރު ބޭނުންކުރެވިގެންދާނެ،" ހަލީމް ވިދާޅުވި އެވެ.

ދަރުމަވަންތަ ހޮސްޕިޓަލްގެ ޑެޕިއުޓީ ސީއީއޯ ޑރ. ޝާހު މާހިރު ވިދާޅުވީ މާލޭގެ ހަތަރު އަވަށެއްގައި އަންނަ އަހަރު ޖީޕީ ކްލިނިކް ހުޅުވާނެ ކަމަށެވެ.

އޭނާ ވިދާޅުވި ގޮތުގައި އެންމެ މޮޅު ޑޮކްޓަރުން ތިބުމުން ގިނަ މީހުން ބޭނުންވަނީ އައިޖީއެމްއެޗަށް ދައްކަން ކަމަށެވެ. އެކަމަކު، ކޮންމެހެން ދައްކަންޖެހޭ މީހާ، އެ ވަގުތެއްގައި ދެއްކުމަކީ އަމާޒަކަށް ވާތީ، އެ ކަމަށް މަގުފަހިކުރުވަން ޖީޕީ ސިސްޓަމަކަށް ދިއުމަށް ކުރަން ޖެހިފައިވާ ކަންތައްތައް އެބަހުރި ކަމަށް ވިދާޅުވި އެވެ.

އެ ހޮސްޕިޓަލުން އަންނަނީ، ކިއު ނަމްބަރެއް ދިނުމުގެ ބަދަލުގައި އެ ޑޮކްޓަރަކަށް ދެއްކޭނެ ދުވަހާއި ވަގުތު ދުރާލައި އެންގުމަށް، ސިސްޓަމަށް ބަދަލުތައް ގެނައުމުގެ މަސައްކަތް ވެސް ކުރަމުންނެވެ. އޭރުން، ޑޮކްޓަރަށް ދެއްކުމަށް ރަށްރަށުން އަންނަ މީހުންނަށް ވެސް ފަސޭހަވާނެ ކަމަށް ވިދާޅުވި އެވެ.

އައިޖީއެމްއެޗްގެ މެޑިކަލް ޑިރެކްޓަރު، ޑރ. އާމިނަތު ޒޭބާ އަހުމަދު ވިދާޅުވީ ޖީޕީ ސިސްޓަމަކަށް ދިއުމުން ވެއިޓްލިސްޓްގައި ތިބޭ އަދަދު މަދުވާނެ ކަމަށެވެ.

"މިސާލަކަށް، އަންހެނުންގެ ކަމެއްގައި ބަނޑުގައި ރިއްސާތީ ބަލި މީހަކު މި އަންނަނީ. އެކަމަކު، މި ދަނީ އަންހެނުންގެ ހާއްސަ ޑޮކްޓަރަކަށް. އަސްލު މީނަގެ ހުރީ އެހެން ބައްޔެއް. އަނެއްކާ މި ޖެހެނީ އަނެއް އެޕޮއިންޓްމަންޓް ހައްދަން. އެހެންވީމަ، ބަލި މީހާއަށް ވެސް ވަރަށް ދަތިކަމެއް އާދޭ އެކި ޑޮކްޓަރުން ކައިރިއަށް އެބަޖެހޭ ދާން ވެސް، އަސްލު ދާންޖެހޭ މީހާ ނޭނގި،" ޒޭބާ ވިދާޅުވި އެވެ.

އޭނާ ވިދާޅުވީ އައިޖީއެމްއެޗްގައި މިހާރު ވެސް ބައެއް ޑިޕާޓްމަންޓުތަކުގެ ވެއިޓްލިސްޓް 1،000 އިން މައްޗަށް އަރާ ކަމަށެވެ. އެ ފިލްޓާކޮށްފި ނަމަ، ހަގީގަތުގައި އެ ޑޮކްޓަރަށް ދައްކަންޖެހެނީ އެއަށްވުރެ މަދު އަދަދެއް ކަމަށް ގަބޫލުކުރެވޭ ކަމަށް ޒޭބާ ވެދާޅުވި އެވެ.

"ދުނިޔޭގެ ގިނަ ތަންތަނުގައި އިންނަނީ ރިފަރަލް ސިސްޓަމަކުން ސްޕެޝަލިސްޓުންނަށް ދެއްކުން. އަޅުގަނޑުމެން ވެސް އެ ކަހަލަ ސިސްޓަމެއް އިމްޕްލިމެންޓް ކުރުމުގެ މަސައްކަތް ކުރަމުން އަންނަނީ. އޭރުން ޕޭޝަންޓަށް ވެސް ލުއިފަސޭހަވާނެ، ދާންވީ ފަރާތަށް އަޅުގަނޑުމެންނަށް ވެސް ގައިޑެންސް ދެވޭނެ އަދި އޭރުން ދައްކަންޖެހޭ ވަގުތު ވެސް އަވަހަށް ދެއްކިގެންދާނެ."

ހުޅުމާލެ 2 ގައި މިހާރު ވެސް ޖީޕީ ކްލިނިކެއް ހިންގަ އެވެ. އެ ތަނުގައި ހިދުމަތް ފެށީ އެއް ދަންފަޅިއަށް ނަމަވެސް، އެ ހިދުމަތް މިހާރު ވަނީ ރޭގަނޑު 11:30 އަށް ދަންމާލައިފަ އެވެ. ވަގުތު އިތުރުކުރިއަސް، ޖީޖީޕީ ކްލިނިކުން ހިދުމަތް ހޯދާ މީހުން އަދި ވެސް އިތުރުވަމުން އަންނާނީ، ސަރުކާރުން ވަނީ ހުޅުމާލޭގައި އިތުރު ޖީޕީ ކްލިނިކެއް ހަދަން ނިންމައިފަ އެވެ.

ހަލީމް ވިދާޅުވީ ޖީޕީ ކްލިނިކް ހުޅުވުމުން ހުޅުމާލެ ހޮސްޕިޓަލަށް އޮންނަ ޑިމާންޑު ވަރަށް ކުޑަވި ކަމަށެވެ.