ލޭންޑްޔޫސް ޕްލޭން ބަދަލުވުމުން، ގުޅިފަޅު ގޯތިތަކުގެ ގުރުއަތު އަލުން ލަނީ

ގުޅިފަޅުން ގޯތި ލިބޭ ތަންތަން އެތަނުގެ އާ ލޭންޑް ޔޫސް ޕްލޭނާ އެއްގޮތަށް ބަދަލުކުރުމަށް އަލުން ގުރުއަތު ލާން ނިންމައިފި އެވެ.

ގުޅިފަޅުން ގޯތި ލިބޭ މީހުންގެ ލިސްޓެއް ރޭގެ ވަގުތެއްގައި އާންމުކޮށް، މިނިސްޓްރީން ބުނީ މި ގުރުއަތުލުން އޮންނާނީ އަންނަ އަންގާރަ ދުވަހު ދަރުބާރުގޭ ރަންނަބަނޑޭރި މާލަމުގައި ކަމަށެވެ.

ގުޅިފަޅުން މިހާރު ދޫކުރުމަށް ހަމަޖެހިފައިވަނީ 1،250 އަކަފޫޓުގެ 669 ގޯއްޗާއި 1،650 އަކަފޫޓުގެ 1،234 ގޯއްޗާއި 2،050 އަކަފޫޓުގެ 916 ގޯއްޗާއި 2،450 އަކަފޫޓުގެ 473 ގޯއްޗާއި 2،850 އަކަފޫޓުގެ 158 ގޯއްޗާއި 3،250 އަކަފޫޓުގެ 49 ގޯތީގެ އިތުރުން 3،650 އަކަފޫޓުގެ 21 ގޯއްޗެވެ.

މީގެ ތެރޭގައި ގިރާވަރު ފަޅުން ގޯތި ލިބި ގުޅިފަޅަށް ބަދަލުކުރަން އެދުނު މީހުންގެ ވެސް ހިމެނެ އެވެ.

ގުޅިފަޅާއި ގިރާވަރު ފަޅުން ހިއްކާ ބިމުން ގޯތި ލިބުނު މީހުންނަށް މީގެ ކުރިން ވަނީ ގޯތި ލިބޭ ތަން ކަނޑައަޅައި ގޯތިތަކުގެ ރަޖިސްޓްރީ ވެސް ހަވާލުކޮށްފަ އެވެ.

ގުޅިފަޅު ހިއްކުން ނެދަލެންޑްސްގެ ބޮސްކާލިސް ކުންފުންޏާ ހަވާލުކުރީ ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަމުގައި އޮކްޓޯބަރު 17، 2019 ގަ އެވެ. އެއީ ދެ ބިލިއަން ރުފިޔާ އަށް 65 ހެކްޓަރު ހިއްކާށެވެ. ނަމަވެސް، ރައީސް ޑރ. މުހައްމަދު މުއިއްޒު ނިންމަވާފައި ވަނީ ގުޅިފަޅަށް 85 ހެކްޓަރު އިތުރުކޮށް، ދެވަނަ ފިޔަވަހިން 150 ހެކްޓަރު އިތުރު ކުރާށެވެ. އެ ބައި ހިއްކުމުގެ މަސައްކަތް މިހާރު ވެސް އަންނަނީ ކުރަމުންނެވެ.