ގުޅިފަޅުން ގޯތި ލިބޭ މީހުންގެ މެދުގައި އަލުން ގުރު ނަގަން ފަށައިފި

ގުޅިފަޅުގެ ގޯތިތައް އެތަނުގެ އާ ލޭންޑް ޔޫސް ޕްލޭނާ އެއްގޮތަށް ބަދަލުކުރުމަށް، ގޯތި ލިބުނު މީހުންގެ މެދުގައި އަލުން ގުރުނަގަން ފަށައިފި އެވެ.

ގުޅިފަޅާއި ގިރާވަޅު ފަޅުން ހިއްކާ ބިމުން ގޯތި ލިބުނު މީހުންނަށް މީގެ ކުރިން ވަނީ ގޯތި ލިބޭ ތަން ކަނޑައަޅައި ގޯތިތަކުގެ ރަޖިސްޓްރީ ވެސް ހަވާލުކޮށްފަ އެވެ. ނަމަވެސް، މުޅި ގުޅިފަޅުގެ ލޭންޑް ޔޫސް ޕްލޭން މިހާރު ވަނީ އެއްކޮށް ބަދަލުވެފަ އެވެ.

އެހެންވެ، ގޯތިތައް ދޫކުރާ ސަރަހައްދުތައް ވެސް ބަދަލުވެ ހައުސިން މިނިސްޓްރީން ނިންމީ ގޯތި ލިބޭ މީހުންގެ މެދުގައި އަލުން ގުރުނަގާށެވެ. ދަރުބާރުގޭ ރަންނަބަނޑޭރި މާލަމުގައި އަލުން ގުރުނަގަން ފެށީ މިއަދު ހެނދުނު 9:00 ގަ އެވެ.

ހައުސިން މިނިސްޓްރީން ބުނީ މިއަދު ގުރު ނަގަނީ ގުޅިފަޅުން ގޯތި ލިބުނު އެންމެންގެ މެދުގައި ކަމަށެވެ.

ގުޅިފަޅުން މިހާރު ދޫކުރަން ނިންމާފައި ވަނީ 3،520 ގޯއްޗެވެ. މީގެ ތެރޭގައި ގިރާވަޅު ފަޅުން ލިބުނު ގޯތި ގުޅިފަޅަށް ބަދަލުކުރަން ލިބުނު ފުރުސަތުގައި އެ ގޯތި ބަދަލުކުރި މީހުން ވެސް ހިމެނެ އެވެ.

ގުޅީފަޅުން ދޫކުރާ ގޯތިތަކުގެ ތަފްސީލުތައް:

- 1،250 އަކަފޫޓުގެ 669 ގޯތި

- 1،650 އަކަފޫޓުގެ 1،234 ގޯތި

- 2،050 އަކަފޫޓުގެ 916 ގޯތި

- 2،450 އަކަފޫޓުގެ 473 ގޯތި

- 2،850 އަކަފޫޓުގެ 158 ގޯތި

- 3،250 އަކަފޫޓުގެ 49 ގޯތި

- 3،650 އަކަފޫޓުގެ 21 ގޯތި

ގިރާވަރު ފަޅުން ގުޅިފަޅަށް ގޯތި ބަދަލުކޮށްދޭން، 2،210 މީހުން އެދިފައިވެ އެވެ.

ގިރާވަރުފަޅުގެ ލޭންޑް ޔޫސް ޕްލޭނަށް ބަދަލު ގެނައުމުން އެތަނުން ދޫކޮށްފައިވާ އަދަދަށް ގޯތި ނުނެގޭތީ، ގިރާވަރު ފަޅުން 1،347 ގޯތި ގުޅިފަޅަށް ބަދަލުކުރަން މިދިޔަ އޭޕްރިލް މަހު ނިންމި އެވެ. އަދި އެކަމަށް އެދުނު މީހުންގެ މެދުގައި ގުރު ނަގައި ވެސް އޮތީ ނިންމައިފަ އެވެ.

ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި، 2019 ވަނަ އަހަރުގެ ތެރޭގައި ވަނީ ނެދަލެންޑްސްގެ ބޮސްކާލިސް ކުންފުންޏާ ހަވާލުކޮށްގެން ގުޅިފަޅުން 150 ހެކްޓަރުގެ ބިން ހިއްކައިފަ އެވެ. އެ މަސައްކަތް ނިމުނީ މި އަހަރު އެވެ.

ނަމަވެސް، ރައީސް ޑރ. މުހައްމަދު މުއިއްޒު ވަނީ ގުޅިފަޅުން އަދި އިތުރު 85 ހެކްޓަރުގެ ބިން ހިއްކަން ނިންމަވައިފަ އެވެ.

ކޮންސްޓްރަކްޝަން މިނިސްޓްރީން އިއްޔެ ބޭއްވި ޕްރެސް ކޮންފަރެންސްގައި މިނިސްޓަރު ޑރ. އަބްދުﷲ މުއްތަލިބް ވިދާޅުވީ ގުޅިފަޅުން އިތުރަށް ހިއްކުމަށް ބޭނުންވާ ފައިސާ އަދިވެސް ހަމަނުޖެހޭ ކަމަށެވެ. އޭނާ ވިދާޅުވީއެމްޓީސީސީއާ އެކު އެމްއޯޔޫއެއްގައި ސޮއިކޮށް ފައިނޭންސް ހޯދުމުގެ މަސައްކަތް ކުރަމުން އަންނަ ކަމަށެވެ.

ގުޅިފަޅުން އިތުރަށް ހިއްކަން ނިންމާފައިވާ ސަރަހައްދަކީ ވަރަށް ފުންކޮށް އޮންނަ ތަނަކަށް ވާތީ، އެތަން ހިއްކަން ހިނގާ ހަރަދު ބޮޑުވާނެ ކަމަށް ވަނީ އަންދާޒާކުރެވިފަ އެވެ.