ފުޓްބޯޅައިގެ ކުރީގެ ގަދަ ބާރު ހުރާ އަލުން ގަލޮޅު ދަނޑަށް

ދިވެހި ފުޓްބޯޅައިގައި ކުރީގެ އެންމެ މަޝްހޫރު އެއް ރަށް، ކ. ހުރާ އިން އަލުން ދަނޑަށް ނުކުންނަން ތައްޔާރުވެއްޖެ އެވެ.

މާލޭގައި އަންނަ މަހު ބާއްވާ ނައިންޓީ ޕްލަސް ގޯލްޑް ކަޕްގައި ވާދަކުރަން އެ ރަށުން އަންނަނީ ތައްޔާރުވަމުންނެވެ. ޓީމުގެ ކޯޗުކަމަށް ހަމަޖައްސާފައިވަނީ އެ ރަށަށް ނިސްބަތްވާ ފުޓްބޯޅަ ލެޖެންޑް މައުސޫމް އަބްދުލްޣަފޫރު (މާސޭ) އެވެ.

ހުއްރިއްޔާ ސްޕޯޓްސް ކްލަބްގެ ނަމުގައި ނުކުތް ހުރާގެ ޓީމުން ވަނީ 1999 އާއި 2000 ވަނަ އަހަރު ޕޮމިސް ކަޕް ކާމިޔާބުކޮށްފަ އެވެ. އޭގެ ފަހުން 2005 ގައި ދިވެހި ލީގުގެ ޗެމްޕިއަންކަން ވެސް ހޯދި އެވެ. އެކަމަކު އޭގެ ފަހުން ފުޓްބޯޅައިން އަޑިއަޅާލައިގެން ދިޔައީ އެވެ. ޖެހިގެން އައި އަހަރު އެ ޓީމު ރެލިގޭޓް ވުމުން ފުރަތަމަ ޑިވިޝަނަށް އަލުން އަރަން ދެ ފަހަރެއްގެ މަތިން މަސައްކަތް ކުރި އެވެ. އެކަމަކު ކާމިޔާބެއް ނުލިބުނެވެ.

އޭގެ ފަހުން އެ ރަށަށް ނިސްބަތްވާ އެހެން ޓީމެއް ކަމަށްވާ "ހުރަވީ" އިން ތިން ވަނަ ޑިވިޝަނުގައި ވާދަކޮށް ރަނގަޅު ކާމިޔާބުތަކެއް ހޯދި އެވެ.

ހުރާ މި ފަހަރު ވާދަކުރާ ގޯލްޑް ކަޕަކީ އަމިއްލަ ބަޔަކު އިންތިޒާމުކޮށްގެން ފުޓްބޯޅައިގެ ފޯރި އަލުން ގެންނަން ރާވާ މުބާރާތެކެވެ. މާލޭގައި އޮންނަ މި މުބާރާތުގައި ރާއްޖޭގެ އެކި ރަށްރަށުން ވާދަކުރެ އެވެ.

އޭރު ހުއްރިއްޔާއިން ރާއްޖޭގެ ފުޓްބޯޅައިގައި ހޯދި ކާމިޔާބުތަކުގައި ހިއްސާވި މާސޭގެ ކޯޗުކަމުގައި ހުރާ އަލުން ދަނޑަށް ނުކުންނަ އިރު ގޮންޖެހުންތަކެއް އެބަހުއްޓެވެ.

"އަހަރެމެން ކުޅުނު އިރު އެ އޮތް ފޯރި އާއި އެ އެކުވެރިކަމެއް މިހާރަކު ނެތް،" އޭނާ ބުންޏެވެ.

އެކަމަކު މަސައްކަތް ކޮށްފިނަމަ ފުޓްބޯޅަ މެދުވެރިކޮށް އަލުން އެކުވެރިކަން ރަށަށް ގެނެސްދެވިދާނެ ކަމަށް އޭނާ ގަބޫލުކުރެ އެވެ.

ގައުމީ ޓީމަށް އޭރު ހުރައިން ނެރުނު ކުޅުންތެރިންނަކީ ރާއްޖޭގެ އޭރުގެ އެންމެ ވަރުގަދަ ނަންތަކެވެ. މާސޭ އާއި ހުރާގެ އޭރުގެ ކެޕްޓަން އަބްދުﷲ އިބްރާހިމް (އަބުޅޯ) އާއި މަޝްހޫރު އަލީ ޝިހާމާއި ކުރީގެ ގޯލްކީޕަރު އިސްހާގް އީސާ އާއި އިސްމާއީލް ނަސީމް (ކޭޑީ) އަކީ ގައުމީ ޓީމުގައި އޭރު އެންމެ ނަގާ ކިޔާ ކުޅުންތެރިންނެވެ.

އެކަމަކު މިހާރު ގައުމީ ޓީމުގައި އެ ރަށަށް ނިސްބަތްވާ އެއްވެސް ކުޅުންތެރިޔަކު ނެތެވެ. ފުރަތަމަ ޑިވިޝަންގެ ކްލަބްތަކުގައި ވެސް ހުރާގެ ކުޅުންތެރިން މަދެވެ.

މާސޭ ބުނީ، ރަސްމީ ފުޓްބޯޅަ މުބާރާތްތަކުން ހުރާގެ ޓީމު ނުފެނުނަސް ހުނަރުވެރި ކުޅުންތެރިން އުފެދުމަށް މަޑުޖެހުމެއް ނާންނަ ކަމަށެވެ.

"ޓެލެންޓް ވައިސްކޮށް މިހާރު އެބަތިބި މާ ހުނަރުވެރި ކުޅުންތެރިން. އަހަރެމެން ކުޅުނު އިރަށް ވުރެ މިހާރު ތިބި ކުޅުންތެރިން އެ ހުނަރު އެބަހުރި މާ ބޮޑަށް ވެސް،" އޭނާ ބުންޏެވެ.

އެ ރަށަށް ނިސްބަތްވާ ފުޓްބޯޅައިގެ މީހުންގެ ތެރެއިން ކޯޗިންގެ ސީ ލައިސެންސް އޮތީ އޭނާ އަތުގަ އެވެ. ހުރާގެ ކޯޗުކަން އޭނާއާ ހަވާލު ކުރީ އެހެންވެ އެވެ. އެކަމަކު އޭނާ ބުނީ ބިދޭސީ ކޯޗެއް ގެނައުމަށް އޭނާ ހިޔާލު ދީފައި ވާނެ ކަމަށެވެ.

"ފުރަތަމަ ދުވަހު ވެސް ކުޅުންތެރިންނާ ބައްދަލުކޮށްފަ ވެސް އަހަރެން ބުނިން އަހަރެމެންނަށް މިކަން އެންމެ ރަނގަޅަށް ކުޅެވޭނީ ބިދޭސީ ކޯޗެއްގެ އެހީ ލިބިގެންނޭ،" އޭނާ ބުންޏެވެ.

ހުރާގެ ރަންޒަމާނުގައި އެ ޓީމަށް ކޯޗުކޮށްދިނީ މޫސާ މަނިކު (ކުޑަމޫސަ) އެވެ. އަދި ފަހުން އެމެރިކާ ކޯޗެއް ވެސް އެ ޓީމުގައި މަސައްކަތްކުރި އެވެ. ލީގު ކާމިޔާބުކުރީ ސްލޮވާކިއާގެ ވަލްޑަމިއާ ގޮފާގެ ކޯޗުކަމުގަ އެވެ.