އޭސީސީ އާއި އީސީގެ މިނިވަންކަމާ މެދު ޑިމޮކްރެޓްސް އިން ކަންބޮޑުވެއްޖެ

އިލެކްޝަންސް ކޮމިޝަނާއި އެންޓި ކޮރަޕްޝަން ކޮމިޝަން (އޭސީސީ) ގެ ރައީސުންނާއި ނައިބު ރައީސުން ކަނޑައަޅައި އައްޔަންކުރުމުގެ ބާރު ރައީސަށް ލިބިދޭ ގޮތަށް ގާނޫނަށް ބަދަލު ގެނައުމަށް ސަރުކާރުން ހުށަހެޅުމުން ދަ ޑިމޮކްރެޓްސް އިން ރޭ ކަންބޮޑުވުން ފާޅުކޮށްފި އެވެ.

އެ މައްސަލައާ ގުޅިގެން އެ ޕާޓީން ނެރުނު ބަޔާނެއްގައި ބުނީ، އީސީ އާއި އޭސީސީގެ ރައީސުންނާއި ނައިބު ރައީސުން ކަނޑައަޅައި އައްޔަން ކުރުމުގެ ބާރު ރައީސަށް ލިބިދޭ ގޮތަށް ގާނޫނަށް ބަދަލު ގެނައުމަށް ސަރުކާރުގެ ފަރާތުން މަޖިލީހަށް ބިލްތަކެއް ހުށަޅާފައިވުމަކީ އިންތިހާ އަށް ކަންބޮޑުވާ ކަމެއް ކަމަށެވެ.

އެ ބަޔާނުގައި ބުނީ އެ އިރެއްގައި އޮންނަ ސަރުކާރަށް ނިސްބަތްވާ ފަރާތެއް ވެސް ބައިވެރިވާ އާންމު އިންތިހާބުތައް ބާއްވާ ކޮމިޝަނާއި ސަރުކާރަށް ވެސް އަމާޒުވާ ކޮރަޕްޝަނާއި ފަސާދައިގެ މައްސަލަތައް ބެލުމަށް އޮންނަ ކޮމިޝަންތަކެއް ކަމަށެވެ. އެ ދެ ކޮމިޝަނުގެ މިނިވަންކަމާއި މުސްތަގިއްލުކަން މުހިއްމުވެފައި ލާޒިމުވަނީ ސަރުކާރުގެ ނުފޫޒެއްގައި ނުޖެހި އެ މަސްއޫލިއްޔަތުތަކާއި ޒިންމާތައް އެ ކޮމިޝަންތަކުން އަދާކުރަންޖެހޭތީ ކަމަށް މި ބަޔާނުގައިވެ އެވެ.

އެކަމަކު އެ ކޮމިޝަނުތަކަށް ރައީސުންނާއި ނައިބުން ކަނޑައެޅުމުގެ ބާރު ރައީސަށް ދިނުމަކީ އެ ތަންތަނުގެ މުސްތަގިއްލު ކަމަށް އަސަރު ކުރާނެ ކަމެއް ކަމަށް ޑިމޮކްރެޓްސް އިން ބުންޏެވެ.

"ނަމަވެސް ސަރުކާރުގެ ފަރާތުން ރައްޔިތުންގެ މަޖިލީހަށް މިހާރު ހުށަހަޅާފައިވާ ބިލުތަކުން ރައީސުލްޖުމްހޫރިއްޔާ އެ 2 ކޮމިޝަނުގެ ރައީސުންނާއި ނައިބު ރައީސުން ކަނޑައަޅައި އައްޔަނުކުރާގޮތަށް ބަދަލުކުރުމަކީ އެ ކޮމިޝަންތަކުގެ މުސްތަގިއްލުކަމަށް ލޮޅުންއަރުވާލާކަމެކެވެ،" ބަޔާނުގައިވެ އެެވެ.

ޑިމޮކްރެޓްސް އިން ބުނީ ރައްޔިތުންގެ އިންތިހާބީ ހައްގުތަކުގެ އިންސާފުވެރިކަމާއި މިނިވަންކަން ކަށަވަރުކުރުމުގެ ޒިންމާއަދާކުރަންޖެހޭ އީސީ އާއި ރައްޔިތުންގެ މާލިއްޔަތާއި ދައުލަތް ހިންގުމުގެ ތެރޭގައި ހިންގާ ކޮރަޕްޝަނާއި ފަސާދަ، މިނިވަންކަމާއެކު ބަލައި ފިޔަވަޅު އެޅުމުގެ ޒިންމާ އަދާކުރަންޖެހޭ އޭސީސީގެ މަސައްކަތުގެ ތެރެއަށް ރައީސް ވަދެވަޑައިގަތުމަކީ މައްސަލައެއް ކަމަށެވެ.

އެހެންވެ، އެއީ ހިންގުމުގެ ޑިމޮކްރެޓިކް އަސާސްތަކާއި ގާނޫނުއަސާސީގެ ރޫހަށް ބަލާއިރު ތަންދޭކަމެއް ނޫން ކަމަށް އެ ޕާޓީން ދެކެ އެވެ.

"އެހެންކަމުން މިކަމަކީ ހިންގުމުގެ ޑިމޮކްރެޓިކް އަސާސްތައްވެސް އަދި ގާނޫނުއަސާސީގެ ރޫހަށް ބަލާއިރު ވެސް ތަންދޭކަމެއް ނޫންކަމަށް ދެކެމެވެ،" ކަންބޮޑުވުން ފާޅުކޮށް ނެރެފައިވާ ބަޔާނުގައި ބުންޏެވެ.

އިލެކްޝަންސް ކޮމިޝަނާއި އެންޓީ ކޮރަޕްޝަން ކޮމިޝަންގެ ގާނޫނު މިހާރު ބުނާ ގޮތުން، އެ ކޮމިޝަންތަކުގެ ރައީސާއި ނައިބު ރައީސް އައްޔަން ކުރާނީ، ކޮމިޝަންގެ ޖަލްސާގައި މެމްބަރުގެ ތެރޭގައި ނަގާ ވޯޓަކުން ހޮވޭ މެމްބަރެކެވެ.

އޭސީސީގެ ގާނޫނަށް އިސްލާހު ގެނައުމުގެ ބިލް ސަރުކާރުގެ ފަރާތުން ހުށަހެޅުއްވީ ފެލިދޫ ދާއިރާގެ ޕީއެންސީގެ މެންބަރު އާދަމް ޒާހިރެވެ. އީސީގެ ގާނޫނަށް އިސްލާހު ހުށަހެޅުއްވީ ކެލާ ދާއިރާގެ ޕީއެންސީގެ މެންބަރު އަބްދުﷲ ޝަރީފެވެ.

މި ދެ ބިލުގެ ފުރަތަމަ ކިޔުން މަޖިލީހުގެ މިއަދުގެ ޖަލްސާގައި އިއްވާފައިވާއިރު، އެ ދެ ކޮމިޝަނުގެ ރައީސާއި ނައިބު ރައީސް އައްޔަން ކުރުމުގެ މާއްދާ އަށް ހުށަހަޅާފައިވާ އިސްލާހުގައި ވަނީ ކޮމިޝަންގެ މެމްބަރުންގެ ތެރެއިން ކޮމިޝަނުގެ ރައީސަކާއި ނައިބު ރައީސެއް ރައީސުލްޖުމްހޫރިއްޔާ އައްޔަން ކުރަން ވާނެ އެވެ.

އެކަމަކު އެ ދެ ކޮމިޝަނުގެ ރައީސް އަދި ނައިބު ރައީސްގެ މަގާމަށް އައްޔަން ކުރާ މީހެއްގެ ނަން މަޖިލީހަށް ހުށަހަޅަން ޖެހޭނެ ކަމަށް ވެސް އެ ދެ އިސްލާހުގައި ބުނެފައިވެ އެވެ.