ޖިހާދުގެ މައްސަލަ ބަލައިނުގަތް ނިންމުން ރިވިއުކުރަން ހުށަހަޅަނީ

ކުރީގެ ނައިބު ރައީސް އަބްދުﷲ ޖިހާދުގެ މައްޗަށް ކުރާ ދައުވާގެ އިސްތިއުނާފު މައްސަލަ ބަލައިނުގަންނަން ހައި ކޯޓުން ނިންމި ނިންމުން ރިވިއު ކުރަން ފަނޑިޔާރުންގެ މަޖިލީހަށް ހުށަހަޅަން ޕްރޮސިކިއުޓާ ޖެނަރަލްގެ އޮފީހުން ނިންމައިފި އެވެ.

ޖިހާދުގެ މައްޗަށް ދައުލަތުން ކުރި ދައުވާ ކުރިއަށް ނުގެންދެވޭނެ ކަމަށް ކްރިމިނަލް ކޯޓުން ނިންމި ނިންމުން އިސްތިއުނާފުކުރަން ދައުލަތުން ހައި ކޯޓަށް ހުށަހެޅި މައްސަލަ އަނބުރާ ފޮނުވާލަން ހައި ކޯޓުން ދެ ފަހަރެއްގެ މަތިން ވަނީ ނިންމައިފަ އެވެ.

ކުރިން މައްސަލަ އަނބުރާ ފޮނުވާލަން ނިންމީ ޖިހާދު މިހާރު ދިރިއުޅުއްވާ އެޑްރެސް ސާފު ނުވުމުންނެވެ. އޭނާ ދިރިއުޅުއްވާ އެޑްރެސް ކަމަށް ޕީޖީ އޮފީހުން ކޯޓަށް ފޮނުވި އެޑްރެހުގައި ޖިހާދު ދިރިނޫޅުއްވާ ކަމަށް އެ ގެއަށް ޗިޓް ހަވާލުކުރަން ދިއުމުން ވަނީ ބުނެފަ އެވެ.

ހައި ކޯޓުން އޭރު ވަނީ ޖިހާދަށް ޗިޓް ފޮނުވޭނެ އިންތިޒާމް ހަމަޖެއްސުމަށް ފަހު، އަލުން މައްސަލަ ހުށަހަޅަން ޕީޖީ އޮފީހުން ބޭނުންވާ ނަމަ އެ ފުރުސަތު އޮތް ކަމަށް ބުނެ މައްސަލަ އަނބުރާ ފޮނުވާލައިފަ އެވެ. އެހެންވެ، ދެވަނަ ފަހަރަށް ދައުލަތުން އެ މައްސަލަ ހުށަހެޅީ މިމަހުގެ 15 ވަނަ ދުވަހު އެވެ.

ނަމަވެސް، ހައި ކޯޓުން މިދިޔަ ހަފުތާގައި ނިންމީ އެ މައްސަލަ އަލުން ހުށަހަޅަން ދިން މުއްދަތު މި މަހުގެ 13 ވަނަ ދުވަހަށް ހަމަވެފައިވާ ކަމަށެވެ. އަދި ދައުލަތުން އެ މައްސަލަ އަލުން ހުށަހެޅީ މުއްދަތު ހަމަވިތާ ދެ ދުވަސް ފަހުން ކަމަށްވާތީ އެ މައްސަލަ ބަލައިނުގަނެވޭނެ ކަމަށް ރަޖިސްޓްރާގެ ނިންމެވުމުގައިވެ އެވެ.

ޕީޖީ އޮފީހުން ބުނީ ހައި ކޯޓުގެ ރަޖިސްޓްރާގެ އެ ނިންމުން ރިވިއުކޮށްދޭން އެދި އެ ކޯޓުގެ ފަނޑިޔާރުންގެ މަޖިލީހަށް ހުށަހަޅަން ނިންމާފައިވާ ކަމަށެވެ.

މޯލްޑިވްސް އިންޓަނޭޝަނަލް ފައިނޭޝަލް ސާވިސް އޮތޯރިޓީގެ ޗެއާމަންގެ މަގާމުގައި މިހާރު ހުންނެވި ޖިހާދުގެ މައްޗަށް ދައުލަތުން ދައުވާކުރީ 2013 ވަނަ އަހަރު ފިނޭންސް މިނިސްޓަރަކަށް ހުންނެވިއިރު، ފުށިދިއްގަރުފަޅުގެ އެއްބަސްވުމުގައި ސަރުކާރުގެ ފަރާތުން ސޮއި ކުރެއްވުމުގައި ދައުލަތަށް ފައިދާނުވާ ގޮތަށް އަމަލު ކުރެއްވި ކަމަށް ބުނެ އެވެ. އެ މައްސަލާގައި ޖިހާދުގެ މައްޗަށް ކުރީ ދައުލަތަށް ފައިދާވާން އޮތް ކަމެއްގައި އެ ނޫން ގޮތަކަށް އަމަލު ކުރުމުގެ ދައުވާ އެވެ.

އެ މައްސަލަ ކްރިމިނަލް ކޯޓުން ކުރިއަށް ނުގެންދެވޭނެ ކަމަށް ނިންމީ ތަހުގީގުގައި ގޯސްތަކެއް ހަދާފައި ވާތީ ކަމަށް ބުނެ އެވެ. ޕީޖީ އޮފީހުން ބުނި ގޮތުގައި، އެ މައްސަލަ ހައި ކޯޓުގައި އިސްތިއުނާފްކުރީ ކްރިމިނަލް ކޯޓުގެ ނިންމުން ބިނާކުރި އަސާސެއް ނެތުމާއި އެކަށީގެންވާ މިންވަރަށް ސަބަބު ބަޔާންކޮށްފައި ނެތުމުންނެވެ.

އެހެންވެ، ޕީޖީން ހައި ކޯޓުގައި އެދެނީ އެ މައްސަލަ ދަށު ކޯޓުން އަލުން ބަލަން އަމުރުކޮށް ދިނުމަށެވެ.