ފެނަކައިގެ ކުރީގެ އެމްޑީ ސައީދުގެ ޕާސްޕޯޓް ހިފަހައްޓައިފި

ފެނަކަ ކޯޕަރޭޝަންގެ ކުރީގެ މެނޭޖިން ޑިރެކްޓަރު އަހުމަދު ސައީދު މުހައްމަދުގެ ޕާސްޕޯޓް ކްރިމިނަލް ކޯޓުން ހިފަހައްޓައިފި އެވެ.

ސައީދުގެ ޕާސްޕޯޓް ހިފެހެއްޓީ އޭނާއަށް ތުހުމަތުކުރެވޭ ހިޔާނާތުގެ މައްސަލަތަކަކާ ގުޅިގެން އެންޓި ކޮރަޕްޝަން (އޭސީސީ)ން ކުރާ ތަހުގީގަށް، އެ ކޮމިޝަނުން އެދިގެންނެވެ. މިކަން އޭސީސީން ވަނީ ކަށަވަރުކޮށްދީފަ އެވެ.

ސައީދުގެ ޕާސްޕޯޓް ހިފަހައްޓާފައިވަނީ މި މަހުގެ ނުވަ ވަނަ ދުވަހު އެވެ.

ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަމުގައި ސައީދު ފެނަކަ ހިންގެވިއިރު ހިޔާނާތުގެ ވަރަށް ބޮޑެތި ތުހުމަތުތައް އެ ކުންފުންޏަށް ކުރި އެވެ. ވަކި ބަޔަކަށް ނާޖާއިޒު މަންފާ ލިބޭ ގޮތަށް ޕްރޮޖެކްޓް ހަވާލުކުރުން ފަދަ ކޮރަޕްޝަންގެ ގިނަ މައްސަލަތަކެއް ފެނަކައިގެ މުވައްޒަފުން ވެސް އޭސީސީއަށް ހުށަހެޅި އެވެ.

އެކަމަކު އެ މައްސަލަތައް ތަހުގީގުކޮށް އެކަށީގެންވާ ފިޔަވަޅެއް އޭސީސީން އޭރު ނާޅަ އެވެ.

ވެރިކަން ބަދަލުވެ ފެނަކައިގެ އާ މެނޭޖްމަންޓަށް ގިނަ މައްސަލަތަކެއް ފާހަގަވެގެން އަލުން އޭސީސީއަށް ވަނީ ހުށަހަޅައިފަ އެވެ. އޭގެތޭރޭގައި ވަކި ބަޔަކަށް ފައިދާވާ ގޮތަށް ފެނަކަ ކުންފުނިން އަމަލުކޮށްފައިވާ ގިނަ މައްސަލަތަކެއް ހިމެނެ އެވެ.

މަގާމުގެ ނާޖާއިޒު ފައިދާ ނަގައި، އިންހައުސްކޮށް ކޮށްފައިވާ 60 ކޮންސްޓްރަކްޝަން ޕްރޮޖެކްޓުގެ ތެރެއިން 25 ޕްރޮޖެކްޓުގެ މައްސަލަ އޭސީސީއަށް ހުށަހަޅާފައިވެ އެވެ. އޭސީސީ އަށް ހުށަހެޅި މައްސަލަތަކުގެ ތަފްސީލަށް ބަލާއިރު، އެ މަޝްރޫއުތަކުގެ ތެރޭގައި ހިމެނެނީ އިން-ހައުސްކޮށް ކުރުމަށް އެކި ރަށްރަށުގައި އިންޖީނުގެ އެޅުމާއި ޕަވާ ސްޓޭޝަން އަދި އޮފީސް އިމާރާތް އެޅުމުގެ މަޝްރޫއުތަކެވެ.

އެ 25 މަޝްރޫއު ހިންގުމަށް ބީއޯކިޔުއެއް އަދި މާކެޓުގެ އަގުތަކަށް ބަލާފައި ނުވާއިރު، އޭގެ ތެރެއިން މަދު މަޝްރޫއެއް ފިޔަވައި، ގިނަ މަޝްރޫއުތަކުގެ މަސައްކަތުގެ 50 ޕަސެންޓާ ގާތަށް ވެސް ނުނިމެ އެވެ. އެ ޕްރޮޖެކްޓްތަކަށް ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގެ ދުވަސްވަރު ދޫކޮށްފައިވާ ފައިސާގެ ޖުމްލަ އަދަދު 508 މިލިއަން ރުފިޔާއަށް ވުރެ އިތުރެވެ.

އެ ކުންފުނީގެ މިހާރުގެ މެނޭޖިން ޑިރެކްޓަރު މުއާޒް މުހައްމަދު ރަޝީދު ވިދާޅުވެފައިވާ ގޮތުގައި، އެކި މަރުހަލާތަކުގައި ހުރި މަޝްރޫއުތައް ނިންމަން ބިލިއަނެއްހާ ރުފިޔާ އިތުރަށް ހަރަދުކުރަންޖެހޭނެ އެވެ.

ކުންފުނި ތެރޭގައި އިންޖީނާއި ޖެންސެޓްތައް ގަތުމުގެ ނާޖައިޒު ބޮޑު ވިޔަފާރިއެއް އުފައްދާފައިވާ ކަމަށާއި އެ މައްސަލަތައް ވެސް އޭސީސީއަށް ހުށަހަޅާނެ ކަމަށް އޭނާ އޭރު ވިދާޅުވެފައިވެ އެވެ.

ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގެންނެވިއިރު، ހިޔާނާތުގެ ތުހުމަތާ އެކު އެންމެ ބޮޑަށް އަޑިއަޅާލާފައިވާ އެއް ކުންފުންޏަކީ ފެނަކަ އެވެ. އެ ތަނަށް ބޭނުން ނުވާ އަދި މަސައްކަތް ނުވެސް ފަށާ ކަންކަމަށް އިތުރަށް އެތައް މުވައްޒަފުންނެއް ނަގާފައިވާ ކަމަށް މިހާރުގެ މެނޭޖުމަންޓުން ބުނެފައިވެ އެވެ.