ފިރިހެން އޯޕަން ބައިގެ ތަށި ހޫދު ހޯދައިފި، ޖޫނިއާ ޗެމްޕިއަންކަން ޔަސީން އަށް

ދިވެހި ސާފް ލީގުގެ ރަންނަމާރި ޗެލެންޖްގެ ޗެމްޕިއަންކަން ހޫދު އަހްމަދު (ހޫބްޒް) ހޯދައިފި އެވެ.

މިއީ ރަންނަމާރި ޗެލެންޖްގެ ތަށި، ހޫދު ހޯދި ދެވަނަ ފަހަރެވެ. އެ މުބާރާތް މީގެ ކުރިން އޭނާ ކާމިޔާބުކޮށްފައި ވަނީ 2021 ގަ އެވެ.

މިއަދު ހަވީރު ނިމުނު، މުބާރާތުގެ ފިރިހެން އޯޕަން ފައިނަލުގައި އޭނާއާ ދެކޮޅަށް ނުކުތީ ޒުވާން ކަޔާން އަބްދުﷲ އަރީފެވެ.

ފައިނަލުގެ ހީޓްގައި ހަތްރާޅުގައި އަޅައި ތަޖުރިބާކާރު ހޫދު ވަނީ 11.25 ސްކޯ ކޮށްފަ އެވެ. ހަމަ ހަތް ރާޅުގައި އެޅި ކަޔާން ވަނީ ހޫދުއާ ވަރަށް ގާތުން ވާދަކޮށްފަ އެވެ. އޭނާ އަށް ލިބުނީ 10.05 އެކެވެ.

ހޫދުގެ ތިންވަނަ ރާޅާއި ހަތަރު ވަނަ ރާޅުގައި އޭނާ ވަނީ މަތިން ސްކޯކޮށްފަ އެވެ. ހަތަރުވަނަ ރާޅުގައި 6.25 ހޯދި އެވެ. ތިންވަނަ ރާޅުގައި ފަސް ޕޮއިންޓް ހޯދި އެވެ.

ވަކިވަކި ރާޅުތަކުން ތަފާތު ބޮޑުކޮށް، ކަޔާން އަށް ޕޮއިންޓް ހޯދޭ ގޮތެއް ނުވި އެވެ. އޭނާ އެންމެ ގިނަ ޕޮއިންޓް ހޯދީ ދެވަނަ ރާޅުގަ އެވެ. އެ ފަހަރު 4.25 އޭނާ ސްކޯ ކުރި އެވެ.

ކަޔާން ފައިނަލަށް ދަތުރު ކުރީ، ސެމީ ފައިނަލުގައި އޭނާގެ ބައްޕަ އަބްދުﷲ އަރީފް (ފުކޫ) ބަލި ކުރުމަށް ފަހު އެވެ. ސެމީ ގައި ކަޔާން ވަނީ 9.20 ސްކޯ ކޮށްފަ އެވެ. އޭނާގެ ބައްޕަ އަށް ހޯދުނީ 6.75 އެވެ.

ސެމީގައި ހޫދު ވާދަކުރީ އަހްމަދު އާގިލް (އަންމަޑޭ) އާ ދެކޮޅަށެވެ. ވާދަވެރިކޮށް ދިޔަ އެ ހީޓްގައި ހޫދު މޮޅުވީ 14.75 ންނެވެ. އަންމަޑޭ އަށް ހޯދުނީ 13.75 ޕޮއިންޓެވެ.

އަށާރަ އަހަރުން ދަށުގެ ޖޫނިއާ ފައިނަލުގައި ވެސް ކަޔާން އަރީފް ވާދަކުރި އެވެ. އެ ކެޓަގަރީގެ ފައިނަލު، އޭނާ ބަލިކޮށް ކާމިޔާބު ކުރީ ޔަސީން އަހްމަދެވެ.

އަންހެން ޗެމްޕިއަންކަން މިފަހަރު ވެސް ހޯދީ މަރިޔަމް ރިހާލް އާޔާ ނަސީމެވެ. އަދި މާސްޓާސް ބައިގެ ޗެމްޕިއަންކަން ހޯދީ އަހުމަދު މައުރޫފް އެވެ.

މުބާރާތުގެ ޓީމު އިވެންޓްގެ ފައިނަލުގައި ރ. ރަސްމާދޫ ބަލިކޮށް، ޗެމްޕިއަންކަން ހޯދީ މާލޭ ޓީމެވެ.