ދަރިވަރުންގެ ލޯނުގެ ފައިސާގެ ބެކްލޮގް ހުސްކޮށްފިން: މިނިސްޓަރު

މަތީ ތައުލީމުގެ ލޯނު ލިބުނު ދަރިވަރުންނަށް ދޫކުރަން ޖެހޭ ފައިސާގެ ބެކްލޮގް މިހާރު ދޫކޮށް ނިންމާފައިވާ ހަޔާ އެޑިއުކޭޝަން މިނިސްޓަރު ޑރ. މަރިޔަމް މާރިޔާ ވިދާޅުވެއްޖެ އެވެ.

ލޯނު ފައިސާ ދޫކުރުން ވަރަށް ބޮޑަށް ލަސްވެ، ދަރިވަރުން ޝަކުވާކުރީ މިދިޔަ ސެޕްޓެމްބަރު މަހު އެވެ. ފައިސާ ދޫކުރުމާއި ޖަވާބު ދިނުމުގައި ލަސްތަކެއް ދިމާވީ ދަރިވަރުންގެ އަދަދު ގިނަވުމުން ކަމަށް މިނިސްޓްރީން އޭރު ބުންޏެވެ.

މިދިޔަ ބުރާސްފަތު ދުވަހު "މިހާރު" އަށް ދެއްވި އިންޓަވިއުއެއްގައި މިނިސްޓަރު ވިދާޅުވީ ބޭރަށް ކިޔަވަންދާ ދަރިވަރުންގެ ތެރެއިން ފައިސާ ދޫކުރުމުގައި އިސްކަންދެނީ އެންމެ އަވަހަށް ފުރަން ޖެހޭ ދަރިވަރުންނަށް ކަމަށެވެ.

"މިސާލަކަށް އަންނަ އަހަރުގެ ޖެނުއަރީގައި ދާން މި އޮތީ ހޮވިފައި. އެ ކުދިން އެބަ ބޭނުންވޭ މި މަހު [އޮކްޓޫބަރުގައި]. އެގޮތަކަށް އެކަމެއް ނުވާނެ. ސިސްޓަމެއް ހަދާފައި އޮންނާނެ، އަޅުގަނޑުމެން އެންމެ އިސްކަން މި ދެނީ އެންމެ ކުރިން ދާން އޮންނަ ކުދިންނަށް. ހަފުތާއަކުން ހަފުތާއަކުން ފައިސާ ދޫކުރަމުން މި ގެންދަނީ،" މިނިސްޓަރު ވިދާޅުވި އެވެ.

ފައިސާ ދޫކުރުމުގައި ލަސްވާން ދިމާވާ އަނެއް ސަބަބެއް ކަމަށް މިނިސްޓަރު ވިދާޅުވީ ދަރިވަރުން ފޮނުވަންޖެހޭ ޑޮކިއުމަންޓް ތައް ހަމަ ނުވުމާއި އެ ލާން ޖެހޭ ގޮތަށް ނުލާތީ ކަމަށެވެ.

މިދިޔަ އޮކްޓޫބަރު މަހުގެ ނިޔަލަށް ދަރިވަރުންނަށް ދޫކުރަން ޖެހޭ ފައިސާގެ އެއްވެސް ބެކްލޮގެއް ނުހުންނާނެ ކަމަށް އޭނާ ވިދާޅުވި އެވެ. "ބެކްލޮގްގެ ގޮތުގައި އަޅުގަނޑުމެން މި ބަލަނީ ދަރިވަރު އެދުނު ފައިސާގެ ތެރެއިން ނުދެވި ހުރި ފައިސާއަށް، ކޮންމެ ސެމިސްޓާއަކަށްވާ ފައިސާ އަޅުގަނޑުމެން ދޫކުރަމުން މި ގެންދަނީ. ދިމާވި މައްސަލައަކާ ގުޅިގެން އެ ފައިސާ ދަރިވަރުންނަށް ދޫނުކުރެވި ހުރީ،" މިނިސްޓްރީގެ އޮފިޝަލަކު ވިދާޅުވި އެވެ. "އެ ކުދިންނަށް ދޫކުރަން ހުރި އެއްވަނަ ޕޭމެންޓް، ނުވަތަ ދެވަނަ ޕޭމެންޓް، އެގޮތަށް ދޫނުކުރެވި ހުރި ފައިސާ ދޫކޮށް ނިމުނު ވާހަކަ އެއީ ބެކްލޮގް ހުސްވުން."

ބޭރުގައި ކިޔަވަން ތިބި ދަރިވަރުންނާއި ފުރަން ވެފައި ތިބި ދަރިވަރުންގެ ލޯނުގެ ހާލަތު ރައީސް ޑރ. މުހައްމަދު މުއިއްޒު ވަރަށް ގާތުން ބައްލަވަމުން ގެންދަވާ ކަމަށް ވެސް މާރިޔާ ވިދާޅުވި އެވެ.

މިއަހަރު ލޯނަށް ހުޅުވާލި 500 ފުރުސަތަށް އެދި 1،709 ދަރިވަރަކު ކުރިމަތިލި އެވެ. ހަޔާ އެޑިއުކޭޝަން މިނިސްޓްރީން ނިންމާފައި ވަނީ އެ ހުރިހާ ދަރިވަރުންނަށް ލޯނު ދޭށެވެ. އޭގެ ތެރޭގައި އަމިއްލަ ހަރަދުގައި ބޭރުގައި ކިޔަވަމުންދިޔަ ބައެއް ދަރިވަރުން ވެސް ލޯނަށް އެދި ކުރިމަތިލުމުން ޝަރުތު ހަމަވާ ކަމަށް ނިންމައި ލޯނު ދޭން އޮތީ ނިންމައިފަ އެވެ.