ދަތި ހާލުގައި އުޅޭ މީހުންނަށް ހިޔާވަހި ސްކީމުން ގެދޮރުގެ ތަނަވަސްކަން ހޯދޭނެ: ހައިދަރު

ސަރުކާރުން ހުޅުވާލި "ހިޔާވަހި ފައިނޭންސިން ސްކީމް" އާ އެކު ދަތި ހާލުގައި ދިރިއުޅޭ ވަރަށް ގިނަ މީހުންނަށް ގެދޮރުގެ ތަނަވަސްކަން ލިބޭނެ ކަމަށް ހައުސިން މިނިސްޓަރު ޑރ. އަލީ ހައިދަރު ވިދާޅުވެއްޖެ އެވެ.

އިސްލާމީ މަރުކަޒުގައި މިއަދު ބޭއްވި ރަސްމިއްޔާތުގައި މިނިސްޓަރު ވިދާޅުވީ ރާއްޖޭގައި ބޯހިޔާވަހި ކަމެއް ނެތް މީހުންނަށް ބޯހިޔާވަހިކަން ހޯދައިދިނުމަކީ މި ސަރުކާރުން އެންމެ އިސްކަމެއް ދޭ އެއް ވައުދު ކަމަށެވެ.

އޭނާ ވިދާޅުވި ގޮތުގައި އެ ފުރުސަތު ފަހިކޮށްދޭން ހިންގާ ހިޔާވަހި ސްކީމް ކުރިއަށް ގެންދާނީ ތިން ކެޓަގަރީއަށް ބަހާލައިގެންނެވެ. އެ ސްކީމުގެ ތަފްސީލްތައް މި ހަފުތާގެ ތެރޭގައި ގެޒެޓު ކުރާނެ ކަމަށް ވެސް ވިދާޅުވި އެވެ.

އަންނަ އަހަރު ސަރުކާރުގެ އެންމެ ބޮޑު އިސްކަމެއް ގެދޮވެރިކަމަށް ހާއްސަކޮށް، އެކަމަށް ބަޖެޓުގައި ޖުމްލަ 4.8 ބިލިއަން ރުފިޔާ ކަނޑައަޅާފައިވެ އެވެ. އޭގެ ތެރެއިން ހައުސިން ލޯން ދޭން ބަޖެޓުގައި އެއް ބިލިއަން ރުފިޔާ ހިމަނާފައިވެ އެވެ.

"މިއީ، ރާއްޖޭގެ އެކި ރަށްރަށުގައި ގެދޮރު ނޭޅި، އަޅަން ހުރި ގޯތިތަކުގައި ގެދޮރު އިމާރާތް ކުރުމަށް ފަސް އިންސައްތައިގެ ސާވިސް ޗާޖެއްގައި ފައިސާ ދޫކުރުމަށް އެކުލަވާލާފައިވާ ހިޔާވަހި ފައިނޭންސް ސްކީމު،" އޭނާ ވިދާޅުވި އެވެ.

ސްކީމުގައި ހިމެނޭ ކެޓަގަރީތައް:

- ހުރިހާ ރަށަކަށް ދޫކުރާ އެއް މިލިއަން ރުފިޔާގެ ސްކީމް

- އާބަން ސަރަހައްދުތަކަށް ދޫކުރާ ތިން މިލިއަން ރުފިޔާގެ ސްކީމް

- މާލެ ސަރަހައްދަށް ދޫކުރާ ހަ މިލިއަން ރުފިޔާގެ ސްކީމް

އެ ސްކީމުގެ ދަށުން ލޯނު ނަގާ ފަރާތްތަކުން ލޯނު އަނބުރާ ދެއްކުމަށް 25 އަހަރު ލިބޭނެ އެވެ. އެއް މިލިއަން ރުފިޔާގެ ސްކީމުގައި ބައިވެރިވާ ފަރާތްތަކުން އިކުއިޓީގެ ގޮތުގައި އެއްވެސް އަދަދެއް ދައްކަން ނުޖެހޭނެ އެވެ. ނަމަވެސް، އާބަން ސަރަހައްދުތަކުގެ ލޯނު ނަގާ ފަރާތްތަކުން އިކުއިޓީއަށް ފަސް ޕަސެންޓް އަދި މާލެއިން ގެދޮރު އަޅަން ލޯނު ނަގާ ފަރާތްތަކުން އިކުއިޓީގެ ގޮތުގައި 10 ޕަސެންޓު ބަހައްޓަން ޖެހޭނެ އެވެ.

"ރަށްރަށަށް ދޫކުރާ ލޯނުތަކަށް އެއްވެސް އިކުއިޓީއެއް ދައްކާކަށް ނުޖެހޭނެ. ނަމަވެސް ޝަރީއާގެ އުސޫލުތަކާ އެއްގޮތަށް އަމަލު ކުރުމަށްޓަކައި ނޮމިނަލް ކޮންޓްރިބިއުޝަނެއް ދައްކަން ޖެހޭނެ. އެގޮތުން މިނިސްޓްރީން އާންމުކުރާ ރަސްމީ އަގުތަކެއް މަތިން ބަންޑާރަ ގޯތި އަމިއްލަ ކުރުމުގެ އަގު ނެގޭނެ،" މިނިސްޓަރު ވިދާޅުވި އެވެ.

ހައިދަރު ވިދާޅުވީ، މާލެ ސަރަހައްދުން ލޯނު ނަގާ ފަރާތްތަކުގެ ތެރެއިން ކުދި ގޯތިތައް އެއްކޮށްގެން ގެދޮރު އަޅާ ފަރާތްތަކަށް އިސްކަން ދޭން ނިންމާފައިވާ ކަމަށެވެ. އެގޮތުން 600 އަކަ ފޫޓަށް ވުރެ ކުދި ގޯތިތައް އެއްކޮށްލައިގެން އިމާރާތް ކުރެވޭނެ ކަމަށް އޭނާ ވިދާޅުވި އެވެ.

"އެފަދަ ފަރާތްތަކަށް ހަ މިލިއަން ރުފިޔާގެ އިތުރުން އެއް ކުރެވޭ ކޮންމެ ބިމަކަށް އެއް މިލިއަން ރުފިޔާ އިތުރު ކުރެވޭނެ. މި އުސޫލުން އެންމެ ބޮޑު އަދަދެއް ދޫކުރެވޭނީ 10 މިލިއަން ރުފިޔާއާ ހަމައަށް،" މިނިސްޓަރު ވިދާޅުވި އެވެ.