ކައުންސިލްތަކުގެ ބްލޮކް ގްރާންޓް ދެ ބިލިއަނަށް އިތުރު ކުރަނީ

ލޯކަލް ކައުންސިލްތަކަށް ދައުލަތުގެ އަންނަ އަހަރުގެ ބަޖެޓުން ބްލޮކް ގްރާންޑުގެ ގޮތުގައި ދޭ އަދަދު އިތުރު ކުރަން ފިނޭންސް މިނިސްޓްރީން ރައްޔިތުންގެ މަޖިލީހަށް ލަފާދީފި އެވެ.

އެ މިނިސްޓްރީން މަޖިލީހަށް ފޮނުވާފައިވާ ސިޓީގައިވާ ގޮތުން، ކައުންސިލްތަކުގެ ބްލޮކް ގްރާންޓަށް 700 މިލިއަން ރުފިޔާ ކޮންޓިންޖެންސީ ބަޖެޓުން އިތުރު ކުރުމަށް ހަމަޖައްސާފައިވާ ކަމަށެވެ.

މިދިޔަ ހަފުތާގައި މަޖިލީހަށް ފޮނުވާފައިވާ ބަޖެޓުގައި ކައުންސިލްތަކުގެ ބްލޮކް ގްރާންޓްގެ ގޮތުގައި ބަޖެޓުގައި ހިމަނާފައިވަނީ 1.4 ބިލިއަން ރުފިޔާ އެވެ. ފަހުން އިތުރުކުރި 700 މިލިއަން ރުފިޔާއާ އެކު، އެ އަދަދު 2.1 ބިލިއަން ރުފިޔާ އަށް އަރަ އެވެ.

ކައުންސިލްތަކުގެ ބްލޮކް ގްރާންޓުގެ ގޮތުގައި މި އަހަރު 2.2 ބިލިއަން ރުފިޔާ ކަނޑައަޅާފައިވެ އެވެ. އެހެންވެ، އަންނަ އަހަރަށް ވެސް އަލުން ހަމަޖައްސާފައިވަނީ މި އަހަރާ ގާތްގަނޑަކަށް އެއް އަދަދެކެވެ.

ކައުންސިލްތަކުގެ ބްލޮކް ގްރާންޓް ބޮޑުކުރަން ނިންމީ، ކައުންސިލްތަކުން އެކަމާ ގުޅިގެން ކަންބޮޑުވުން ފާޅުކުރުމާ ގުޅިގެންނެވެ.

މިދިޔަ ހަފުތާގައި ރައީސް ޑރ. މުހައްމަދު މުއިއްޒު ވިދާޅުވީ، ބްލޮކް ގްރާންޓުގެ ދަށުން ސަރުކާރުން ކައުންސިލްތަކަށް ދިނުމަށް ކަނޑައަޅާފައިވާ ފަސް ޕަސެންޓު އަންނަ އަހަރުގެ ބަޖެޓުގައި ހިމަނާނެ ކަމަށެވެ. އޭގެ އިތުރަށް ލޯކަލް ޓޫރިޒަމުން ވަކި ޕަސެންޓެއް ކައުންސިލުތަކަށް ދިނުމަށް ގާނޫނަށް ގެންނަން ޖެހޭ އިސްލާހުތައް ގެނައުމަށް ފޮނުވާނެ ކަމަށް އެ މަނިކުފާނު ވިދާޅުވި އެވެ.

"އަދި އޭގެ އިތުރަށް ވެސް އަޅުގަނޑު އިރާދަކުރެއްވިއްޔާ ކުރިއަށް އޮތް ހަފުތާއެއް ދެ ހަފުތާއެއް ތެރޭގައި އިއުލާން ކުރާނަން ވަރަށް ބައިވަރު އަދި ވަރަށް މުހިންމު، ގާނޫނުގައި ލިޔެވިފައި ހުރި މިއަދާ ހަމައަށް ކައުންސިލްތަކާ ހަވާލުނުކޮށް ހުރި ކަންތައްތަކެއް،" ރައީސް ވިދާޅުވި އެވެ.

އަންނަ އަހަރަށް ލަފާކުރާ ބަޖެޓުގެ ކޮންޓިންޖެންސީގެ ގޮތުގައި ކުރިން ކަނޑައަޅާފައި އޮތީ 950 މިލިއަން ރުފިޔާ އެވެ. އޭގެ ތެރެއިން 700 މިލިއަން ކައުންސިލްގެ ގްރާންޓަށް ކަނޑައެޅުމުގެ ކޮންޓިންޖެސީ ބަޖެޓު 250 މިލިއަން ރުފިޔާ އަށް ކުޑަވާނެ އެވެ. ކޮންޓިންޖެންސީ ބަޖެޓަކީ، ހާއްސަ ހާލަތްތަކުގައި މިސާލަކަށް، ކާރިސާއެއް ނުވަތަ އެ ނޫން ވެސް ހާލަތެއްގައި ދައުލަތުގެ ބަޖެޓުން ހަރަދު ކުރަން ކަނޑައަޅާފައިވާ އަދަދެކެވެ.

އަލަށް ގެނައި ބަދަލާ އެއްގޮތަށް ބަޖެޓުގައި ބްލޮކް ގްރާންޓު ހިސާބު ކޮށްފައިވާ ގޮތާއި އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގައި ކަނޑައަޅާފައިވާ މިންގަނޑުން ބްލޮކް ގްރާންޓު ކަނޑައެޅުމުން ވަކިވަކިން ކައުންސިލްތަކަށް ބްލޮކް ގްރާންޓުގެ ގޮތުގައި އަންނަ އަހަރު ލިބޭ މިންވަރާއި އަންނާނެ ކަމަށް ލަފާ ކުރާ ބަޖެޓުގެ އަންދާޒާތަކުގެ ތަފްސީލު ވެސް ފިނޭންސް މިނިސްޓްރީގެ ސިޓީއާ އެކު ހިމަނާފައިވެ އެވެ.

ކައުންސިލްތަކުގެ ބްލޮކް ގްރާންޓުގެ އެންމެ ބޮޑު އަދަދެއް ދެނީ ސިޓީ ކައުންސިލްތަކަށެވެ. ކައުންސިލްތަކަށް ހިލޭ އެހީ ދޭ އަދަދު ކަނޑައަޅަނީ ދައުލަތުގެ އާމްދަނީގެ ބައިތަކާ ގުޅުވައިގެންނެވެ.