ހުރިހާ އަތޮޅެއްގައި އެސްޓީއޯގެ ރޭޓުން ތެޔޮ ވިއްކަން ފިއުލް ސްޓޯރޭޖު ގާއިމްކުރަނީ

ތެލަކީ އަސާސީ ބާވަތެއްގެ ގޮތުގައި ކަނޑައަޅައި, އެސްޓީއޯ އިން ނިންމާ އަގުތަކުގައި ތެޔޮ އަދި ޑީސަލް ލިބޭނެ ގޮތް ހަމަޖެއްސުމަށް ރާއްޖޭގެ ކޮންމެ އަތޮޅެއްގައި ފިއުލް ސްޓޯރޭޖް ގާއިމުކުރުމުގެ މަޝްރޫއު މިއަދު އިފުތިތާހު ކޮށްފި އެވެ.

އެ މަޝްރޫއު އިފްތިތާހު ކޮށްދެއްވީ ރައީސް ޑރ. މުހައްމަދު މުއިއްޒެވެ.

ހަތަރު ފިޔަވައްސަކަށް ބަހާލައިގެން ކުރިއަށް ގެންދާ މަސައްކަތުގެ ފުރަތަމަ ފިޔަވަހީގައި ސްޓޯރޭޖް ސެޓަޕް ގާއިމުކުރީ މި އަހަރު ހުޅުމާލޭގަ އެވެ. ދެވަނަ ފިޔަވަހީގެ ދަށުން އަންނަ އަހަރުގެ ފެބްރުއަރީ މަހު ތިން ރަށެއްގައި މި ފެސިލިޓީ ގާއިމުކުރާނެ އެވެ. އަދި އަންނަ އޮކްޓޯބަރު މަހު ފަސް ރަށެއްގައި މި ސެޓަޕް ގާއިމުކުރުމަށް ވަނީ ހަމަޖެހިފަ އެވެ. ބާކީ 11 ރަށުގައި ސެޓަޕްތައް ގާއިމްކޮށް ނިންމާނީ ޖެނުއަރީ 2026 ގަ އެވެ.

ފިއުލް ސްޓޯރޭޖް ފެސިލިޓީ ސެޓަޕް ހަދަނީ:

1- ހުޅުމާލެ

2- ޅ. ފެލިވަރު

3- ގއ. ކޫއްޑޫ

4- ސ. ހުޅުމީދޫ

5- ހއ. އިހަވަންދޫ

6- ހދ. ހަނިމާދޫ

7- ފ. ނިލަންދޫ

8- ގދ. ފަރެސްމާތޮޑާ،

9- ފުވައްމުލައް

10- ށ. މިލަންދޫ

11- ރ. ދުވާފަރު

12- ބ. ތުޅާދޫ

13- އއ. މަތިވެރި

14- އދ. މާމިގިލީ

15- އދ. މަހިބަދޫ

16- ވ. ފެލިދޫ

17- މ. މުލައް

18- ދ. ކުޑަހުވަދޫ

19- ތ. ހިރިލަންދޫ

20- ލ.. ގަން

21- ނ. މަނަދޫ

މި މަޝްރޫއު އިފްތިތާހުކުރުމަށް ބޭއްވި ރަސްމިއްޔާތުގައި އެސްޓީއޯގެ މެނޭޖިން ޑިރެކްޓަރު ޝިމާދު އިބްރާހިމް ވިދާޅުވީ މަސްވެރިންނާއި އާއްމުންނަށް އެސްޓީއޯ ރޭޓުގައި ތެޔޮ ފޯރުކޮށްދިނުމަކީ ރައީސް މުއިއްޒުގެ ވައުދުފުޅެއް ކަމަށެވެ. އެއީ ހުރިހާ ރައްޔިތުން ޝާމިލުވާ ގޮތަށް ރައީސް ގެންނަވަން މަސައްކަތްޕުޅު ކުރައްވާ ތަރައްގީގެ މުހިންމު ބައެއްގެ ގޮތުގައި ޝިމްހާދު ސިފަކުރެއްވި އެވެ.

އޭނާ ވިދާޅުވީ މިއަދު ފެށި މަޝްރޫއުގެ ދަށުން ކޮންމެ އަތޮޅަކުން ވެސް މަދުވެގެން އެއް ރަށުގައި އެސްޓީއޯގެ ރޭޓުގައި ތެޔޮ ފޯރުކޮށްދޭނެ ކަމަށެވެ. މި މަޝްރޫއަށް ރާއްޖޭގެ އެކި ހިސާބުތަކުގައި މަސްދޯނިފަހަރު ހަރަކަތްތެރިވާ އަދަދު ބެލުމަށް ދިރާސާކޮށްފައިވާ ކަމަށް ވިދާޅުވި އެވެ.

"އަޅުގަނޑުމެންގެ ދިރާސާއިން ދައްކާ ގޮތުގައި އެންމެ ގިނައިން މަސްއޮޑިދޯނިފަހަރު ހަރަކާތްތެރިވަނީ މާލެ ސަރަހައްދުގައި. އެހެންވެ، މި އަހަރުގެ ޖޫން މަހު ވާނީ ހުޅުމާލޭގައި ސެޓަޕް ގާއިމުކޮށް، މަސްވެރިންނަށް އެސްޓީއޯ ރޭޓުގައި ތެޔޮ ލިބޭނެ ގޮތް ވާނީ ހަމަޖައްސާފައި،" އޭނާ ވިދާޅުވި އެވެ.

ޝިމާދު ވިދާޅުވިގޮތުގައި، މަސްދޯނިފަހަރު ގިނަ އަދަދަކަށް ހަރަކާތްތެރިވާ ފެލިވަރާއި ކޫއްޑު އަށް މިހާރު ވެސް ހެޔޮ އަގުގައި ތެޔޮ ފޯރުކޮށްދެ އެވެ. އަދި މި ތަންތަނުގައި ވެސް އެސްޓީއޯ ސެޓަޕް ގާއިމުކޮށް، އެސްޓީއޯ ރޭޓުގައި ތެޔޮ ފޯރުކޮށްދިނުމަށް މިނިސްޓްރީތަކުގެ އެއްބާރުލުން ބޭނުންވާ ކަމަށް ވިދާޅުވި އެވެ.

"މިހާރު ވެސް ވަރަށް ބޮޑު އެހީތެރިކަމެއް މިނިސްޓްރީން ލިބިފައިވޭ. އަޅުގަނޑުމެންގެ ސެޓަޕް ހެދުމަށް ވަރަށް ގިނަ ރަށްރަށުގެ ބަނދަރުމަތިން ވެސް އަޅުގަނޑުމެންނަށް ވަނީ ބިން ކަނޑައަޅައި ދީފައި. އަޅުގަނޑުމެންގެ އަމާޒަކީ 2026 ވަނަ އަހަރުގެ ޖެނުއަރީ މަހަށް މިހާރު ކަނޑައަޅާފައި ހުރި ރަށްރަށުގައި މި ސެޓަޕް ގާއިމުކޮށް ހިދުމަތް ދިނުން." ޝިމާދު ވިދާޅުވި އެވެ.

މިއަދުގެ ރަސްމިއްޔާތުގައި ފިޝަރީޒް މިނިސްޓަރު އަހުމަދު ޝިޔާމް ވިދާޅުވީ މަސްވެރިންނަށް ހުރި ހުރިހާ ދަތިތަކެއް ހައްލުކޮށްދިނުމަށް ރައީސް މުއިއްޒު ހާއްސަ އިސްކަމެއް ދެއްވާ ކަމަށެވެ.

"މި ވެރިކަމުގެ ފުރަތަމަ ތިން އަހަރުގައި މަސްވެރިންނަށް ހުރި ހުރިހާ ދަތިތައް ހައްލުކޮށްދޭނަން." މިނިސްޓަރު ވިދާޅުވި އެވެ.

މިއަދު އިފްތިތާހު ކުރި މަޝްރޫއުގެ ދަށުން 20 ރަށެއްގައި ފިއުލް ސްޓޯރޭޖް ކަނޑައަޅާނެ އެވެ.