ޖަލަށް ނުލައިފި ނަމަ 2028 ގައި ވާދަ ކުރާނަން: ޔާމީން

މި ފަސް އަހަރުގެ ތެރޭގައި ޖަލު ހުކުމެއްގައި ބަންދު ނުކޮށްފި ނަމަ ކުރިޔަށް އޮތް ރިޔާސީ އިންތިހާބުގައި ވާދަ ކުރައްވާނެ ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެ އެވެ.

ރާއްޖެ ޓީވީ އަށް ދެއްވި އިންޓަވިއުއެއްގައި، 2028 ގެ އިންތިހާބުގައި ވާދަ ކުރާނެތޯ ޕްރެޒެންޓަރު ސުވާލު ކުރުމުން ޔާމީން ވިދާޅުވީ "އަޅުގަނޑު ޖަލަށް ނުލާނެތޯ" އެވެ.

އާރަށް ކުއްޔަށް ދޫކުރުމުގެ މުއާމަލާތާ ގުޅިގެން ރިޝްވަތު ގަބޫލު ކުރައްވައި، މަނީ ލޯންޑާ ކުރެއްވި ކަމަށް ބުނެ އެ މަނިކުފާނުގެ މައްޗަށް 11 އަހަރުގެ ޖަލު ހުކުމެއް އިއްވާފައި ވަނިކޮށް، އެ ހުކުމް ބާތިލް ކުރުމަށް ފަހު، ހައި ކޯޓުން ވަނީ އެ މައްސަލަ ކްރިމިނަލް ކޯޓުގައި އަލުން ބަލަން އަމުރުކޮށްފަ އެވެ.

ނަމަވެސް ހައި ކޯޓުގެ ހުކުމުގައި އާ ހެކިތަކެއް ބަލައިނުގަނެވޭނެ ކަމަށް ނިންމާފައިވާތީ އެ ބައި ދައުލަތުން އޮތީ ސުޕްރީމް ކޯޓުގައި އިސްތިއުނާފް ކޮށްފަ އެވެ. އެ މައްސަލާގެ އަޑުއެހުން މި މަހުގެ 20 ވަނަ ދުވަހު ބޭއްވުމަށް ވަނީ ތާވަލްކޮށްފަ އެވެ.

ޔާމީން ވިދާޅުވީ އެމަނިކުފާނާ ގުޅޭ ޝަރީއަތްތައް މިހާރު މަޑު ޖެހިފައިވާ ކަމަށާއި ރަނގަޅު ގޮތުގައި އެ ހުރިހާ ކަމެއް ގޮސްފި ނަމަ ޖަލު ހުކުމެއް އަންނަން ޖެހޭ އެއްވެސް ސަބަބެއް ނޯންނާނެ ކަމަށެވެ.

އެ މައްސަލަތަކުގައި އެންމެ ބޮޑު އެއް ހެކިވެރިއެއްގެ ގޮތުގައި ދައުލަތުން ބޭނުން ކުރާ ކުރީގެ ނައިބު ރައީސް އަހުމަދު އަދީބަކީ ހެކި ބަސް ނުދެވޭނެ ވަރުގެ ފާސިގެއް ކަމަށް ސުޕްރީމް ކޯޓުން ވެސް ކަނޑައަޅާފައިވާ ކަމަށް ޔާމީން ވިދާޅުވި އެވެ.

އެ މީހުންގެ ހެކި ބަސް ނަގައިގެން އިތުރު ހެއްކެއް ނެތި ޝަރުއީ ހަމަތަކުގެ މަތިން އިންސާފުވެރިކޮށް ގޮސްފި ނަމަ އޭނާގެ މައްޗަށް ހުކުމެއް ނާންނާނެ ކަމަށް ވެސް ޔާމީން ވިދާޅުވި އެވެ.

ހުކުމެއް ނައިސްފި ނަމަ ވާދަ ކުރައްވާނެތޯ ސުވާލު ކުރުމުން ޔާމީން ވިދާޅުވީ އެކަމާ މެދު "އެއްވެސް ޝައްކެއް ނެތް" ކަމަށެވެ.

ވެރިކަމަށް ކުރިމަތިލާނީ ދެ ކަމެއް ކުރަން ކަމަށާއި އެއީ ޗާގޯސް ހޯދުމާއި އިންޑިއާ ސިފައިން ބޭލުން ކަމަށް ޔާމީން ވިދާޅުވި އެވެ.

"މި ދެ ކަންތައް އެކަނި ހައްލު ކުރަން ވެސް ހިދުމަތުގެ އިތުރު ފުރުސަތެއް ބޭނުން،" ޔާމީން ވިދާޅުވި އެވެ.

އެ ދެ މައްސަލަ ހައްލު ކުރާނެ އެއްވެސް ލީޑަރެއް މިހާރު ނެތް ކަމަށާއި މި ސަރުކާރުން ވެސް ހެޔޮ ނިޔަތެއްގައި އެކަން ކުރާ ތަނެއް ނުފެންނަ ކަމަށް ޔާމީން ވިދާޅުވި އެވެ.

އެމްއެމްޕީއާރުސީގެ ހިޔާނާތާ ގުޅިގެން ޔާމީންގެ މައްޗަށް ދައުލަތުން ދައުވާ ކުރަނީ ވ. އާރަށް ކުއްޔަށް ދޫކުރުމުގެ މުއާމަލާތާ ގުޅިގެންނާއި ރ. ފުއްގިރި ކުއްޔަށް ދޫކުރުމުގެ މުއާމަލާތާ ގުޅިގެން ރިޝްވަތު ގަބޫލު ކުރުމުގެ ދައުވާ އާއި މަނީ ލޯންޑްރިންގެ ދައުވާ އެވެ. އެ ދައުވާތައް ސާބިތުވެއްޖެ ނަމަ ދިގު ޖަލު ހުކުމެއް އަންނާނެ އެވެ.