ޣައްޒާއަށް ސުލްހަ ގެންނަން ޓްރަމްޕާ އެކު މަސައްކަތްކުރަން ތައްޔާރު: އައްބާސް

ފަލަސްތީނުގެ ޣައްޒާގައި "އިންސާފުވެރި އަދި ދާއިމީ ސުލްހައެއް" ގާއިމުކުރުމަށް އެމެރިކާގެ އިންތިހާބީ ރައީސް ޑޮނަލްޑް ޓްރަމްޕާ އެކު މަސައްކަތްކުރެއްވުމަށް ތައްޔާރަށް ހުންނެވި ކަމަށް ފަލަސްތީނުގެ ރައީސް މަހްމޫދު އައްބާސް ވިދާޅުވެއްޖެ އެވެ.

"އައްބާސް ވަނީ ޓްރަމްޕަށް މަރުހަބާ ވިދާޅުވެ، ބައިނަލްއަގްވާމީ އުސޫލުތަކުގެ މައްޗަށް ބިނާވެފައިވާ އިންސާފުވެރި އަދި ފުރިހަމަ ސުލްހައެއް ގާއިމުކުރުމަށް ޓްރަމްޕާއެކު މަސައްކަތްކުރަން ތައްޔާރަށް ހުންނެވި ކަމަށް ވިދާޅުވެފައި" ކަމަށް އައްބާސްގެ އޮފީހުން ނެރުނު ބަޔާނުގައި ބުންޏެވެ.

އެ ބަޔާނުގައި ބުނެފައިވާ ގޮތުގައި ސުލްހަޔަށްޓަކައި ގުޅިގެން މަސައްކަތް ކުރައްވާނެ ކަމުގެ ޔަގީންކަން ޓްރަމްޕް ވެސް ދެއްވި އެވެ.

"ހަނގުރާމަ ހުއްޓުވުމަށް މަސައްކަތް ކުރައްވާނެ ކަމަށާއި، ސަރަހައްދުގައި ސުލްހަ ގާއިމުކުރުމަށް ރައީސް އައްބާސް އާއި މި ސަރަހައްދާއި ކަމާ ގުޅުން ހުރި އެހެން ފަރާތްތަކާ އެކު އެކު މަސައްކަތް ކުރައްވަން ތައްޔާރަށް ހުންނެވި ކަމަށް ޓްރަމްޕް ވިދާޅުވި އެވެ." ބަޔާނުގައިވެ އެވެ.

އިޒްރޭލުން ޣައްޒާގައި މިހާތަނަށް ހިންގި އެންމެ އަނިޔާވެރި އަމަލުތައް ކުރިއަށް ދަނިކޮށް ޓްރަމްޕް ކުރިއަށް ގެންދިޔަ ރިޔާސީ ކެމްޕެއިނުގައި ފަލަސްތީނުގެ މައްސަލަ ހައްލުކުރައްވަން މަސައްކަތްކުރައްވާނެ ކަމަށް ވިދާޅުވި އެވެ. ނަމަވެސް އިޒްރޭލަކީ އެމެރިކާގެ "އެންމެ ގާތް ބައިވެރިޔާ" ކަމަށް ވިދާޅުވެ އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ހަމާސް ނައްތާލާނެ ކަމުގެ ޔަގީންކަން އެބަ އޮތް ކަމަށް ވެސް ޓްރަމްޕް ވިދާޅުވެފައިވެ އެވެ. -- އޭއެފްޕީ