ފްލެޓް ލިސްޓް އަންނަ ހަފުތާގައި އިއުލާންކޮށް، މި އަހަރު ނިމުމުގެ ކުރިން ހަވާލުކުރަނީ

ގެދޮރުވެރިޔާ ސްކީމްގެ ދަށުން ހުޅުމާލޭ ދެވަނަ ފިޔަވަހީގައި އިމާރާތްކުރާ 4،000 ފްލެޓު ލިބޭ މީހުންގެ ލިސްޓް އަންނަ ހަފުތާގައި އިއުލާންކޮށް، މި އަހަރު ނިމުމުގެ ކުރިން ފްލެޓްތައް ހަވާލު ކުރާނެ ކަމަށް ހައުސިން މިނިސްޓަރު ޑރ. އަލީ ހައިދަރު ވިދާޅުވެއްޖެ އެވެ.

ޕީއެސްއެމްގެ "ރާއްޖެ މިއަދު" ޕްރޮގްރާމްގައި މިނިސްޓަރު ރޭ ވިދާޅުވީ މިހާރު ކުރަމުން އަންނަނީ 4،000 ފްލެޓަށް އެދި ހުށަހަޅާފައިވާ ފޯމްތައް އަލުން އިވެލުއޭޓް ކުރުމުގެ މަސައްކަތް ކަމަށެވެ.

މިނިސްޓަރު ވިދާޅުވި ގޮތުގައި ހުރިހާ ފޯމެއް އިވެލުއޭޓްކޮށް ނިމުމުން އަންނަ ހަފުތާ ތެރޭގައި ފުލެޓް ލިބޭ މީހުންގެ ވަގުތީ ލިސްޓް އިއުލާންކުރާނެ އެވެ. އަދި އެ ލިސްޓަށް ޝަކުވާ ހުށަހެޅުމުގެ ފުރުސަތު ވެސް ހުޅުވާލާނެ ކަމަށް މިނިސްޓަރު ވިދާޅުވި އެވެ.

"ވަގުތީ ލިސްޓަށް ޝަކުވާގެ ފުރުސަތު ވެސް ހުޅުވާލާފައި އެ މަސައްކަތް އެއްކޮށް ނިންމާފައި އިރާދަކުރެއްވިއްޔާ ފުލެޓްތައް ހަވާލުކުރާނަން މިއަހަރު ނިމުމުގެ ކުރިން،" ހައިދަރު ވިދާޅުވި އެވެ.

ގެދޮރުވެރިޔާ ސްކީމްގެ ފްލެޓްތައް ލިބޭ މީހުންގެ ދާއިމީ ލިސްޓް ނެރުނީ ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރު ނިމެން ދެ ދުވަހަށް ވެފައި އޮއްވަ އެވެ. ވަގުތީ އެއްބަސްވުން ހަދައި ފްލެޓްތައް ހަވާލުކުރަން ފެށުމުން އޭސީސީން އެކަން ހުއްޓުވީ އެވެ.

ފްލެޓް ލިސްޓާ ގުޅޭ ގޮތުން އެ ކޮމިޝަނަށް ހުށަހެޅި ގިނަ އަދަދެއްގެ ޝަކުވާތައް ވެސް ބަލައި، ހިންގި ތަހުގީގަކަށް ފަހު، ބުނެފައި ވަނީ 4،000 ފްލެޓް ލިބުނު މީހުންގެ ތެރެއިން 60 ޕަސެންޓް މީހުންނަކީ ޝަރުތު ހަމަނުވާ މީހުން ކަމަށެވެ. އާ ކޮމިޓީއެއް ހަދައި، މި ސަރުކާރުން ލިސްޓު މުރާޖައާ ކުރަން ފެށީ ބޮޑެތި މައްސަލަތަކެއް ފެންމަތިވުމުންނެވެ.

ގެދޮރުވެރިޔާ ސްކީމްގެ ދަށުން ހުޅުމާލެ 2 ގައި އަންނަނީ 17-18 ބުރީގެ 32 ޓަވަރު އިމާރާތްކުރަމުންނެވެ. ކޮންމެ ފްލޯއެއްގައި އަށް އެޕާޓްމެންޓް ހުންނާނެ އެވެ. އޭގެ ތެރޭގައި ދެ ކޮޓަރީގެ 1،200 ފްލެޓާއި ތިން ކޮޓަރީގެ 2،800 ފްލެޓް ހިމެނެ އެވެ.

އެ ހުރިހާ ޓަވަރެއްގެ މަސައްކަތް އަންނަ އަހަރުގެ މެދު ތެރެއަށް ނިމޭނެ ކަމަށް، އެ ފްލެޓުތައް ހަދަމުން އަންނަ ފަހި ދިރިއުޅުން ކޯޕަރޭޝަން (އެފްޑީސީ)ން ވަނީ ބުނެފަ އެވެ. އޭގެ ތެރެއިން އިންޑިއާ ސަރުކާރުގެ ލޯންގެ އެހީގައި އިމާރާތްކުރި 700 ފްލެޓު ނިންމައި މިހާރު ވަނީ ސަރުކާރާ ހަވާލުކޮށްފަ އެވެ.