ތައުލީމަށް ހިދުމަތްކުރުމުގެ އެންމެ މަތީ ޝަރަފު ޑރ. ޒާހިރަށް އަރުވައިފި

ދިވެހިރާއްޖޭގެ ތައުލީމަށް ހިދުމަތްކުރުމުގެ އެންމެ މަތިވެރި ޝަރަފު ކުރީގެ އެޑިއުކޭޝަން މިނިސްޓަރު އަދި މިހާރުގެ އިސްލާމީ ޔުނިވާސިޓީގެ ޗާންސެލަރު ޑރ. މުހައްމަދު ޒާހިރު ހުސެއިނަށް، ރައީސް ޑރ. މުހައްމަދު މުއިއްޒު މިރޭ އަރުވައިފި އެވެ.

ދިވެހި ދައުލަތުގެ މަތިވެރި އިއްޒަތް ކަމަށްވާ ނިޝާން އިއްޒުއްދީނުގެ އިއްޒަތުގެ ވެރިކަން ވެސް ދައުލަތުން އަރުވާފައިވާ ޒާހިރަށް، ތައުލީމީ ރޮނގުގެ އެންމެ މަތިވެރި ޝަރަފް ދެއްވީ، ޖުމްހޫރީ ދުވަހުގެ މުނާސަބަތުގައި މިހާރު ކުރިއަށް ގެންދާ ރަސްމީ ޖަލްސާގަ އެވެ.

ޒާހިރަށް މި ޝަރަފް ދެއްވަން ރައީސް މުއިއްޒު ނިންމެވީ ދިވެހިރާއްޖޭގެ ތައުލީމީ ތަރައްގީ އަށާއި ރާއްޖޭގައި ތައުލީމު ފުޅާކުރެއްވުމަށާއި ތައުލީމީ ރޮނގުން ރާއްޖޭގެ ރައްޔިތުން ހޭލުންތެރިކުރެއްވުމަށް އިހްލާސްތެރިކަމާއެކުގައި، ގިނަގުނަ ހިދުމަތްތަކެއް ކޮށްދެއްވާފައިވާތީ، އެކަމުގެ އަގު ވަޒަންކުރެއްވުމުގެ ގޮތުންނެވެ.

ފުވައްމުލަކަށް އުފަން ޒާހިރު ތައުލީމަށް ހިދުމަތްކުރައްވަން ފެއްޓެވީ މިސްރުގެ އަލް އަޒްހަރު ޔުނިވާސިޓީން ކިޔަވާވިދާޅުވެގެން ރާއްޖެ ވަޑައިގަތުމަށް ފަހު 1971 ވަނަ އަހަރު އަމީނިއްޔާ ސްކޫލުގެ އިސްލާމް ޓީޗަރެއްގެ ގޮތުންނެވެ. އެ މަނިކުފާނަކީ އޭރު ދަރިވަރުންގެ މެދުގައި ވަރަށް މަގުބޫލު ޓީޗަރެކެވެ.

އޭގެ ދޮޅު އަހަރެއްހާ ދުވަސް ފަހުން އޭރުގެ ރައީސް އިބްރާހިމް ނާސިރު ވަނީ ސިޔާސަތު ރޭއްވެވުމާއި ތަންފީޒުކުރެއްވުމުގައި ޒާހިރު މުހިއްމު ކަމަށް ފެނިވަޑައިގެން އެޑިއުކޭޝަން މިނިސްޓްރީގެ ވަކީލަކަށް ހަމަޖައްސަވައިފަ އެވެ. އަދި 1976 ވަނަ އަހަރު އެ މިނިސްޓްރީގެ ނާއިބަކަކަށް އައްޔަން ކުރެއްވެވި އެވެ.

އެއީ ރާއްޖޭގެ އަތޮޅުތަކަށް ތައުލީމު ފުޅާކުރެއްވުމަށް ސަރުކާރުން މުހިއްމު މަޝްރޫއުތަކެއް ފައްޓަވަން ބޭރުގެ އެހީ ހޯއްދެއްވި ދުވަސްވަރެވެ. ޒާހިރު ވެވަޑައިގަތީ އެ މަޝްރޫއުތަކުގެ އާރުކާޓީއަށެވެ. އެ މަޝްރޫއު ރޭއްވެވުމުން ފެށިގެން، އަތޮޅު މަދަރުސާތައް އިމާރާތް ކުރުމާއި ދަރިވަރުން ހަމަކުރުމުގެ މަސައްކަތުގައި ޒާހިރު އަމަލީ ގޮތުން އުޅުއްވި އެވެ.

އޭގެ ފަހުން ރާއްޖޭގެ ވެރިކަމާ ހަވާލުވެވަޑައިގެންނެވި މައުމޫނަށް ވެސް ޒާހިރު ވެވަޑައިގަތީ މުހިއްމު ބޭފުޅަކަށެވެ. އެހެންވެ ޒާހިރަށް އެޑިއުކޭޝަން މިނިސްޓަރުކަން ދެއްވައި އިތުރު މަސްއޫލިއްޔަތުތައް ހަވާލުކުރެއްވެވި އެވެ. ރާއްޖޭން ލިޔަންކިޔަން ނުދަތުމުގެ ނިސްބަތް ދަށްކުރަން ފެށި އަސާސީ ތައުލީމު މަޝްރޫއުގެ އެއް މޭސްތިރިއަކީ ޒާހިރެވެ. އެއީ ރާއްޖޭގެ ތާރީހުގައި ވެސް މިހާތަނަށް ހިންގި އެންމެ ކާމިޔާބު އެއް ތައުލީމީ މަޝްރޫއެވެ.

އެ ދުވަސްވަރު ޒާހިރު ހިންގެވި އަނެއް މަޝްރޫއަކީ ޓީޗަރުން ތަމްރީން ކުރުމެވެ. އޭގެ ސަބަބުން ރާއްޖޭގެ އެކި ހިސާބުތަކަށް ބޭނުންވާ ދިވެހި ޓީޗަރުން ހޯދުމަށް ފަސޭހަވި އެވެ. މީގެ އިތުރުން ރާއްޖޭގައި ޒަމާނީ މުގައްރަރެއް އެކުލަވައިލީ ވެސް ޒާހިރު އިސްކޮށް ހުންނަވައިގެންނެވެ.

ޒާހިރަކީ ރާއްޖޭގައި އަރަބި ތައުލީމު ފެތުރުމަށް ވެސް އިސްކަންދެއްވި ބޭފުޅެކެވެ. އެ މަނިކުފާނު މިހާރު ޗާންސެލަރުކަން ކުރައްވަމުން އަންނަ އިސްލާމީ ޔުނިވާސިޓީގެ ފެށުން ކަމަށްވާ މައުހަދުއްދިރާސަތުލް އިސްލާމިއްޔާގެ ފެށުމުގައި ޒާހިރު މުހިއްމު ދައުރެއް އަދާކުރެއްވި އެވެ.

ރާއްޖޭގައި އޭ ލެވެލަށް ކިޔަވައިދޭ މައި މަރުކަޒު ކަމަށްވާ މިހާރުގެ ސީއެޗްއެސްސީ ނުވަތަ އޭރުގެ ގޮތުން ނަމަ އެސްއީސީ އަކީ ވެސް ޒާހިރުގެ ދުރުވިސްނެވުމުގެ މަތިން އުފެއްދި ސްކޫލެކެވެ.

ޒާހިރު ވަނީ ރާއްޖޭގެ އެޑިއުކޭޝަން މިނިސްޓަރުކަން 10 އަހަރާއި ނުވަ މަހަށް ވުރެ ގިނަ ދުވަހު ކުރައްވައިފަ އެވެ. ފަހުން ވަނީ ރައީސް އޮފީހުގެ މިނިސްޓަރުކަމާއި ޔޫތު އެންޑް ސްޕޯޓްސް މިނިސްޓަރުކަން ކުރެއްވި އެވެ. އެ މަގާމުގައި ހުންނަވައިގެން، ރާއްޖޭގެ ކުޅިވަރު ތަރައްގީ ކުރުމަށް ގިނަ މަސައްކަތްތަކެއް އެ މަނިކުފާނު ކުރެއްވެވި އެވެ.

ޒާހިރު ވަނީ ސަރުކާރުގެ ބުރަ ޒިންމާތައް އަދާކުރައްވަމުން ވެސް ވަގުތު ހުސްކުރައްވައިގެން، ޕީއެޗްޑީ ފާސް ނަންގައިފަ އެވެ.

ގައުމީ ޔުނިވާސިޓީގެ ޗާންސެލަރުކަން ވެސް ކުރައްވާފައިވާ ޒާހިރަކީ ރާއްޖޭގެ ޒަމާނީ ނޫސްވެރިކަމުގެ ބައްޕަ އެވެ. އެމަނިކުފާނު ނެރުއްވި "ހަވީރު" ނޫހަކީ ރާއްޖޭގެ ނޫސްވެރިކަމުގެ ރަން ޒަމާނުގެ އެންމެ އަލިގަދަ ނޫހެވެ.