"އެތައް އެކުވެރިންނެއް ވަކިވެދިޔައީ މާ އަވަހަށް"

އަބަދުވެސް ގާތްކޮށް އުޅޭ ތެލެސީމިއާ އާއިލާގެ މެމްބަރުންނަށް މި ހިތާމަ ކިތަންމެ ފަހަރަކު ކުރިމަތިވެއްޖެ އެވެ. މޯލްޑިވިއަން ތެލެސީމިއާ ސޮސައިޓީގެ ޗެއާޕާސަން ޖީހާން ސަލީމްގެ އުދާސްތައް ބަންޑުންވެގެން ދިޔަ ސަބަބަކީ އެއީ އެވެ.

އުމުރުން 31 އަހަރުގައި އިބްރާހިމް ޝަމްއޫން މިދިޔަ އަންގާރަދުވަހު މަރުވުމަކީ އޭނާގެ އަމިއްލަ އާއިލާ އަށް ފޫނުބެދޭނެ ގެއްލުމެކެވެ. ލޭ އަޅާ ކުދިންގެ ގޮތުގައި ޝަމްއޫންގެ ދެ ފިރިހެން ކޮއްކޮ ވެސް މީގެ ކުރިން ވަނީ، އެކަކު 2008ގައި އަދި އަނެކަކު 2010 ގައި، ފުރާވަރުގައި މަރުވެފަ އެވެ.

އެ ހިތާމައިގައި، ވޭތުވެދިޔަ އަހަރުތައް ޝަމްއޫން ހޭދަކުރި ގޮތާއި ތެލެސީމިއާ ސޮސައިޓީގެ އެގްޒެކެޓިވް ކޮމިޓީގެ މެމްބަރެއްގެ ގޮތުގައި އޭނާ ކުރި ޚިދުމަތްތަކާއި ލޭ އަޅާ ޒުވާނެއްގެ ގޮތުގައި ފަހު ވަގުތާ ޖެހެންދެން އޭނާ ކުރި ހިތްވަރު ޝަމްއޫންގެ ގާތް އެންމެން ވަނީ ދެކިފަ އެވެ. އޭގެ ތެރޭގައި ޖީހާން ހިމެނިވަޑައިގަންނަވަ އެވެ.

މިއީ އާ މަރަކަށް ވިޔަސް އާ ހިތާމައެއް ނޫނެވެ. އަބަދުވެސް ތަކުރާރުވަމުންދާ ހިތްދަތިކަމެކެވެ.

"އެތަކެއް އެކުވެރިންނެއް މާ އަވަހަށް އަހަންނާ ވަކިވެގެން ހިނގައްޖެ،" ޝަމްއޫންގެ މަރުގެ ހިތާމައިގައި ފޭސްބުކްގައި ލިޔުއްވި ޕޯސްޓެއްގައި، ގިނަ އަދަދެއްގެ ތެލެސީމިއާ ކުދިންނާއި ޒުވާނުން ޅަ އުމުރުގައި މަރުވަމުންދާ ކަން ފާހަގަކުރައްވައި، ޖީހާން ވިދާޅުވި އެވެ.

"އަހަންނަށް ކުރެވެނީ ކޮން އިހުސާސެއް ކަމެއް އަހަންނަކަށް ވެސް ނޭނގޭ. އަންނަނީ ރުޅި ކަމެއް، ނުވަތަ ކަމެއް ނުކުރެވޭތީ ވަނީ ދެރަ ކަމެއް ވެސް ނޭނގޭ."

ޝަމްއޫންގެ މަރާ ގުޅިގެން މިފަދަ އެތައް ޝުއޫރެއް ފާޅުކޮށްފައިވެ އެވެ. ސޯޝަލް މީޑިއާ އިން ދޭތެރެ ދޭތެރެ އިން ފެންނަ އެންމެ ހިތާމަވެރި އެއް ކަމަކީ މި އެވެ. ތެލެސީމިއާ ކުއްޖަކު ނުވަތަ ޒުވާނަކު މަރުވެގެން އުޅޭ ވާހަކަ އެވެ. ތެލެސީމިއާ ސޮސައިޓީގެ އެގްޒެކެޓިވް ކޮމެޓީގެ މެމްބަރެއް ކަމަށްވާ އައިޝަތު ޝިފްނީޒް ޝާކިރު ސިފަކުރެއްވި ގޮތުން ނަމަ، ތެލެސީމިއާ އާއިލާ އަށް "ގަބޫލުކުރަން ޖެހިފައިވާ ހިތްފަޅައިގެންދާ ފަދަ ހިތި ހަގީގަތަކީ، މީހަކު އެންމެ ފަހު ފަހަރަށް ފެންނާނީ ކޮން އިރަކުކަން ނޭނގު"މެވެ.

މޯލްޑިވިއަން ބްލަޑް ސާވިސަސްގެ ތަފާސްހިސާބުތަކަށް ބަލާ އިރު ވޭތުވެދިޔަ ދެ އަހަރާއި މި އަހަރު މަރުވި ތެލެސީމިއާ ކުދިންނާއި ޒުވާނުންގެ އަދަދު 13 އަށް އަރަ އެވެ. އެއީ 2015ގައި ތިނެއް، 2016ގައި ހައެއް އަދި މި އަހަރުގެ މިހާތަނަށް ހަތަރެކެވެ. މަރުވެފައި ވަނީ އުމުރުން ތިން އަހަރާއި 31 އަހަރާ ދެމެދުގެ ކުދިންނާއި ޒުވާނުންނެވެ.

ރަނގަޅު ފަރުވާ ލިބޭ ނަމަ ތެލެސީމިއާ ކުދިންނަށް ވެސް އާދައިގެ ދިރިއުޅުމަކާއި ދިގު އުމުރެއް ލިބޭނެ ކަން، އެފަދަ ކުދިންގެ ހައްގުތަކަށް ވަކާލާތުކުރައްވާ، ޖީހާން ފަދަ ބޭފުޅުން އަބަދުވެސް ފާހަގަކުރައްވަ އެވެ. އެކަމަށް ބޭނުންވާ ޚިދުމަތްތައް ރާއްޖޭގައި އެކަށީގެންވާ ގޮތެއްގައި ގާއިމްވެފައި ނެތުމުގެ ކަންބޮޑުވުން ތެލެސީމިއާ އާއިލާ އިން ފާޅުކުރެ އެވެ. އަދި ގަވާއިދުން ފަރުވާ ހޯދަން އަމިއްލަ އަށް ނުވަތަ އާއިލާތަކުން ވަރަށް ބޮޑަށް ސަމާލުކަން ދޭން ޖެހޭ އިރު އެ ހޭލުންތެރިކަން ވެސް ވަރަށް މުހިއްމެވެ.

"އަހަރެންގެ އެކުވެރިންނާ ދިމާއަށް މޫނު އަނބުރައި، ހުރިހާ ކަމެއް ވެސް ރަނގަޅުވާނެއޭ ބުނެވޭކަށް ނެތް. ހުރިހާ ކަމެއް ރަނގަޅެއް ނޫން،" ރާއްޖެ އިން ޗައިނާ އަށް ކަނޑައަޅާފައި ހުންނަވާ ސަފީރު މުހައްމަދު ފައިސަލްގެ އަނބިކަނބަލުން ޖީހާން އެ ގައުމުގައި ހުންނަވައިގެން ފޭސްބުކްގައި ލިޔުއްވާފައިވެ އެވެ.

"އެކަމަކު، އިބްރާހިމް ޝަމްއޫން ބުނި ގޮތަށް، އަހަރެމެން މަސައްކަތްކުރަން އެބަ ޖެހޭ. އޭނަގެ އެންމެ ފަހު މެސެޖު އަހަންނަށް ފޮނުވީ މީގެ ދެތިން ދުވަސް ކުރިން. އޭގައި ބުނެފައި އޮންނަނީ 'ދެރަ ގޮތެއް މެދުވެރިއެއް ނުކުރައްވާނެ'އޭ. އެ ބަސްކޮޅުން އަހަރެން ހިތްވަރު ހޯދާނަން."