ޕީއެސްއެމްގެ ޗެއާޕާސަނަކަށް ނަމްޒާ، މެނޭޖިން ޑިރެކްޓަރަކަށް ނަސްރީން

ޕަބްލިކް ސާވިސް މީޑިއާގެ ޗެއާޕާސަނަކަށް ލޯކަލް ގަވަމެންޓުގެ ޑެޕިއުޓީ މިނިސްޓަރު އާމިނަތު ނަމްޒާ އަދި އެ ކުންފުނީގެ މެނޭޖިން ޑިރެކްޓަރަކަށް އިބްރާހިމް ނަސްރީން މިއަދު އައްޔަންކޮށްފި އެވެ.

ޕްރައިވަޓައިޒޭޝަން ބޯޑުން ބުނީ ޕީއެސްއެމްގެ ބޯޑާއި ޗެއާޕާސަންގެ މަގާމަށް، ޕްރެޒެންޓަރު ނަމްޒާ ހަމަޖައްސާފައިވާ ކަމަށެވެ.

މެނޭޖިން ޑިރެކްޓަރަަކަށް އައްޔަންކުރެއްވި ނަސްރީން ދައުލަތުގެ މީޑިއާއާ ގުޅިވަޑައިގަތީ މީގެ 14 އަހަރު ކުރިންނެވެ. މި މުއްދަތުގެ ތެރޭގައި އޭނާ ވަނީ ޗީފް ކޮމާޝަލް އޮފިސަރުކަމާއި އީ-ކޮމާސްގެ ޑިރެކްޓަރުކަން ވެސް ފުރުއްވައިފަ އެވެ.

ޕީއެސްއެމްގެ ހިންގަން ނަސްރީން އައްޔަންކުރެއްވިއިރު އޭނާ ހުންނެވީ ކުންފުނީގެ ސޭލްސް އެންޑް މާކެޓިން ޑިރެކްޓަރަކަށެވެ.

އޭނާ ވަނީ މެލޭޝިއާގައި ބިޒްނަސް އިން މިދިޔަ ޖޫން މަހު ޕީއެޗްޑީ ފުރިހަމަކުރައްވައިފަ އެވެ.

އެ ކުންފުނީގެ ޗެއާޕާސަނަކަށް އެންމެ ފަހުން ހުންނެވީ އިބްރާހިމް ހިލްމީ އެވެ. އެ މަގާމަށް އޭނާ ހަމަޖެއްސެވީ ކުރީގެ ސަރުކާރުން ޖެނުއަރީ، 2019 ގަ އެވެ. އެކަމަކު، ވެރިކަން ބަދަލުވުމުން މިދިޔަ ޖެނުއަރީ މަހު ބޯޑުން ވަކިކުރީ އެވެ.

ދައުލަތުގެ މީޑިއާ ހިންގަން ނަސްރީން ހަމަޖެއްސެވީ، އެ މަގާމުގައި ހުންނެވި މުހައްމަދު ސައީދު މިދިޔަ އަންގާރަ ދުވަހު އިސްތިއުފާ ދެއްވުމުންނެވެ. މަގާމަށް އައްޔަންކުރެއްވިތާ ހަތަރު މަސް ވާން އުޅެނިކޮށް ސައީދު ވަކިވެވަޑައިގަތީ ސިއްހީ ސަބަބުތަކާ ހެދި އެވެ.