ކިންގްސް ކުންފުންޏަށް ކުރާ ދައުވާތައް މުރާޖައާ ކުރުމަށް ފަހު ވެސް ނިންމީ ދައުވާ ކުރިއަށް ގެންދަން

ކިންގްސް ކެޕިޓަލް ކުންފުނިން އިންވެސްޓްމަންޓް ސްކީމެއް ތައާރަފްކޮށް، ގިނަ ބައެއްގެ އަތުން ފައިސާ އަތުލި މައްސަލާގައި އެ ކުންފުނީގެ މެނޭޖިން ޑިރެކްޓަރު އަލްހާން ފަހުމީ އާއި އޭނާގެ ދެ ކޮއްކޮއިންގެ މައްޗަށް ކުރާ ދައުވާތަކުގެ މައްސަލަ ރިވިއުކޮށް، ދައުވާތައް ކުރިއަށް ގެންދަން ޕްރޮސެކިއުޓާ ޖެނެރަލް އައްބާސް ޝަރީފް ނިންމަވައިފި އެވެ.

ކިންގްސް ކެޕިޓަލްސްއިން ގިނަ ބައެއްގެ އަތުން ފައިސާ ނަގައިގެން ހިންގި ސްކީމްގެ މައްސަލާގައި އަލްހާންގެ އިތުރުން ދައުލަތުން ދައުވާ ކުރަނީ އޭނާގެ ކޮއްކޮ ޝަޒްބާން ފަހުމީ އާއި ޝަހުބާން ފަހުމީގެ މައްޗަށެވެ. އެ މީހުންގެ މައްޗަށް ޓެކުމުގެ 13 ދައުވާއެއް ދައުލަތުން ކުރެ އެވެ.

އެ މައްސަލާގައި ޖިނާއީ ދައުވާތައް ރިވިއުކުރަން ކިންގްސްގެ ފަރާތުން ޕީޖީގައި ވަނީ އެދިފަ އެވެ.

އެކަމާ ގުޅިގެން ޕީޖީ އޮފީހުން މިއަދު ބުނީ، އެ މައްސަލަ ބެލިއިރު މައްސަލާގައި ހިމެނޭ ދައުވާތައް މުރާޖައާކޮށް، އެ ދައުވާތަކަށް ބަދަލެއް ގެންނަން ޖެހޭފަދަ ސަބަބެއް ނުވަތަ ހާލަތެއް އޮތް ކަމަށް ނުފެންނަ ކަމަށް ޕީޖީ ނިންމަވާފައިވާ ކަމަށެވެ.

މި މައްސަލާގައި މީގެ ކުރިން މައްސަލާގައި ކިންގްސް ކުންފުނީގެ އެކައުންޓްތައް ބޭންކުން ހިފެހެއްޓި އެވެ. ނަމަވެސް ސިވިލް ކޯޓުން ފަހުން ހުކުމް ކޮށްފައިވަނީ ބޭންކުން ކިންގްސް ކުންފުނީގެ ބޭންކް އެކައުންޓްތައް ހިފެހެއްޓީ ގާނޫނާ ހިލާފަށް ކަމަށެވެ.