ކިންގްސް ކުންފުނީގެ މައްސަލަ އަލްހާނާއި ދެ ކޮއްކޮ އަށް ދައުވާކުރާ މައްސަލަ ރިވިއުކުރަން ޕީޖީގައި އެދެނީ

ކިންގްސް ކެޕިޓަލް ކުންފުނިން އިންވެސްޓްމަންޓް ސްކީމެއް ތައާރަފްކޮށް، ގިނަ ބައެއްގެ އަތުން ފައިސާ އަތުލި މައްސަލާގައި އެ ކުންފުނީގެ މެނޭޖިން ޑިރެކްޓަރު އަލްހާން ފަހުމީ އާއި އޭނާގެ ދެ ކޮއްކޮއިންގެ މައްޗަށް ކުރާ ދައުވާތަކުގެ މައްސަލަ ރިވިއުކުރަން ޕްރޮސެކިއުޓާ ޖެނެރަލްގެ އޮފީހުގައި އެދެން ނިންމައިފި އެވެ.

ކިންގްސް ކެޕިޓަލްސްއިން ގިނަ ބައެއްގެ އަތުން ފައިސާ ނަގައިގެން ހިންގި ސްކީމްގެ މައްސަލާގައި އަލްހާންގެ އިތުރުން ދައުލަތުން ދައުވާ ކުރަނީ އޭނާގެ ކޮއްކޮ ޝަޒްބާން ފަހުމީ އާއި ޝަހުބާން ފަހުމީގެ މައްޗަށެވެ. އެ މީހުންގެ މައްޗަށް ޓެކުމުގެ 13 ދައުވާއެއް ދައުލަތުން ކުރެ އެވެ.

އެ މައްސަލާގެ މިއަދުގެ އަޑުއެހުމުގައި ދިފާއީ ވަކީލް ވިދާޅުވީ ޖިނާއީ ދައުވާތައް ރިވިއުކުރަން އެދުމުގެ ފުރުސަތު ޕްރޮސެކިއުޓާ ޖެނެރަލްގެ އޮފީހުން ހުޅުވާލާފައިވާތީ އެ މައްސަލަ ރިވިއުކުރަން ހުށަހަޅަން ނިންމާފައިވާ ކަމަށެވެ.

އެހެންވެ، އެކަމާ މެދު ގޮތެއް ނިމެންދެން ޝަރީއަތް މަޑުޖައްސާލަން ވަކީލް އެދިވަޑައިގަތެވެ.

ނަމަވެސް އެ މައްސަލަ ބައްލަވާ ގާޒީ އިސްމާއިލް ޝަފީއު ވިދާޅުވީ ދައުވާ އަނބުރާ ނުގެންދަހާ ހިނދަކު އެ ޝަރީއަތް ކުރިއަށް ގެންދަވާނެ ކަމަށެވެ. އެހެންވެ، ކޮންމެހެން އެ މައްސަލަ މަޑުޖައްސާލަން ނުޖެހޭނެ ކަމަށް ގާޒީ ވިދާޅުވި އެވެ.

ގާޒީ ވިދާޅުވީ އެ މައްސަލާގެ ދިފާއީ ވަކީލެއްގެ ގޮތުގައި ކުރީގެ ބަންޑާރަ ނައިބު އާޒިމާ ޝަކޫރު ފޯމު ހުށަހަޅުއްވާފައި ވިޔަސް، އޭނާގެ ސޮއި ފޯމުގައި ނެތުމުން ވަކީލެއްގެ ގޮތުގައި އައްޔަން ނުކުރެވޭ ކަމަށެވެ. ނަމަވެސް އަލުން ފޯމު ހުށަހެޅުމުން ވަކީލެއްގެ ގޮތުގައި ބައިވެރިވެވޭނެ ކަމަށް ގާޒީ ވިދާޅުވި އެވެ.

އާޒިމާ ނެތީސް، މައްސަލަ ކުރިއަށް ގެންދަން ބޭނުންނުވާ ކަމަށް ދައުވާލިބޭ މީހުން ބުނުމުން، ގާޒީ ވަނީ އަޑުއެހުން އަންނަ އާދިއްތަ ދުވަހަށް ފަސްކުރަން ނިންމަވައިފަ އެވެ. އެ ދުވަހު ދައުވާ އަށް ޖަވާބުދާރީވާން ޖެހޭނެ ކަމަށް ގާޒީ ވިދާޅުވި އެވެ.

އެ މައްސަލާގެ މިއަދުގެ އަޑުއެހުމަށް އަލްހާން ހާޒިރު ވެފައެއް ނުވެ އެވެ. ގާޒީ ވިދާޅުވީ ސިއްހީ ސަބަބަކާ ހެދި، ހާޒިރު ނުވެވޭނެ ކަން އަލްހާން ކޯޓަށް އަންގާފައިވާ ކަމަށާއި ނަމަވެސް އޮންނަ އުސޫލުގެ ތެރެއިން މެޑިކަލް ފޯމު ހުށަހަޅަން ޖެހޭނެ ކަމަށެވެ.

އެ މައްސަލާގައި ކިންގްސް ކުންފުނީގެ އެކައުންޓްތައް ބޭންކުން ހިފެހެއްޓި އެވެ. ނަމަވެސް ސިވިލް ކޯޓުން ފަހުން ހުކުމް ކޮށްފައިވަނީ ބޭންކުން ކިންގްސް ކުންފުނީގެ ބޭންކް އެކައުންޓްތައް ހިފެހެއްޓީ ގާނޫނާ ހިލާފަށް ކަމަށެވެ.