އާ އަހަރާ ދިމާކޮށް ޑްރަގްސް އަތުލައިގަތުމަށް ބޮޑު އޮޕަރޭޝަނެއް ފަށައިފި

އާ އަހަރާ ދިމާކޮށް މަސްތުވާތަކެތި ބޭނުން ކުރުމާއި ވިއްކުން އިތުރުވާނެ ކަމަށް ލަފާ ކުރެވޭތީ ފުލުހުންގެ ހާއްސަ އޮޕަރޭޝަނެއް މިއަދު ފަށައިފި އެވެ.

ފުލުހުން ސޯޝަލް މީޑިއާގައި ކުރި ޕޯސްޓުގައި ބުނީ މި ދުވަސްވަރު ބަނގުރަލާއި މަސްތުވާތަކެތި ބޭނުންކޮށް، ވިޔަފާރިކުރުން އިތުރުވެގެންދާނެ ކަމަށް ބެލެވޭ ކަމަށެވެ. އެހެންވެ، ޑްރަގްސް އެންފޯސްމަންޓް ޑިޕާޓްމަންޓް (ޑީއީޑީ) އާއި ހުޅުމާލެ ޕޮލިހާއި މެރިން ޕޮލިސް އަދި ކ. އަތޮޅުގެ ޕޮލިސް ސްޓޭޝަންތައް ގުޅިގެން އޮޕަރޭޝަނެއް ފަށާފައިވާ ކަމަށެވެ.

އެ އޮޕަރޭޝަނުގައި ހުޅުމާލެ ފަޅުތެރެ ޕެޓްރޯލް ކުރުމާއި ރަށުތެރެއަށް ބަނގުރާ އަރުވައި އަދި އެ ބާވަތްތައް ވިއްކާ ކަމަށް ޝައްކު ކުރެވޭ ކެފޭތަކާއި ރެސްޓޯރެންޓްތައް މޮނީޓާކޮށް، ގާނޫނާއި ގަވާއިދާ ހިލާފުވާ ފަރާތްތަކާ މެދު ފިޔަވަޅު އަޅާނެ ކަމަށް ފުލުހުން ބުންޏެވެ.

އާ އަހަރުގެ ޕާޓީތަކާ ދިމާކޮށް މާލެ ސަރަހައްދާއި ލޯކަލް ޓޫރިޒަމްގެ އޮންނަ ރަށްރަށާއި ސަފާރީތަކުން މަސްތުވާތަކެތި އަތުލައިގަނެ އެވެ.

ރާއްޖެއަށް އެތެރެކުރި ތަކެއްޗާއި އެކި ރަށްރަށުގައި ހިންގި އޮޕަރޭޝަންތަކުން ޖުމްލަ 183 ކިލޯއަށް ވުރެ ގިނަ މަސްތުވާތަކެތި އަދި 8400 އަށްވުރެ ގިނަ ބަނގުރާ ފުޅި ވަނީ މިދިޔަ އެއް އަހަރުގެ ތެރޭގައި ވަނީ އަތުލައިގެންފަ އެވެ. އެ ތަކެތީގެ މަގުމަތީ އަގު 385 މިލިއަން ރުފިޔާއަށް އަރަ އެވެ.