މުލީ އެއާޕޯޓް އަންނަ މާޗް މަހު ހުޅުވަނީ

މ. މުލީ އެއާޕޯޓުގެ މަސައްކަތް އެއްކޮށް ނިންމާފައިވާ ކަމަށާއި އަންނަ މާޗް މަހުގެ ފުރަތަމަ ދުވަހު އެއާޕޯޓު ހުޅުވުމަށް މަސައްކަތް ކުރަމުން އަންނަ ކަމަށް ރީޖަނަލް އެއާޕޯޓްސް ކުންފުނީގެ މެނޭޖިން ޑިރެކްޓަރު އަހުމަދު މުބީން މިއަދު ވިދާޅުވެއްޖެ އެވެ.

އެ އެއާޕޯޓް އަޅަން ކުރީގެ ސަރުކާރުން 2021 ވަނަ އަހަރު ހަވާލުކުރީ އެމްޓީސީސީއާ އެވެ. އެއް އަހަރުގެ ތެރޭގައި މަސައްކަތް ނިންމަން އެ ކުންފުންޏާ ހަވާލުކުރީ 212 މިލިއަން ރުފިޔާއަށެވެ. އެކަމަކު، ބަޖެޓުގެ ދަތިކަމާ ހެދި މަސައްކަތް ދިގުލައިގެން ދިޔައީ އެވެ.

މުބީން "މިހާރު" އަށް ވިދާޅުވީ އެއާޕޯޓުގެ ކޮންސްޓްރަކްޝަން މަސައްކަތް އެއްކޮށް ނިންމާފައިވާ ކަމަށެވެ. އަދި މިހާރު ކުރަމުން އަންނަނީ ޓާމިނަލް އަދި އެއާޓްރެފިކް ކޮންޓްރޯލް ޓަވަރުގެ ފިނިޝިން މަސައްކަތްތައް ކަމަށް އޭނާ ވިދާޅުވި އެވެ.

"އެ މަސައްކަތްތައް ވެސް ހުރީ ނިމުމާ ކައިރީގައި،" މުބީން ވިދާޅުވި އެވެ.

އޭނާ ވިދާޅުވީ އެއާޕޯޓް ހުޅުވުމަށް ބޭނުންވާ ފަޔަ ލޮރީ ގަންނަން އޯޑަރު ދީފައިވާ ކަމަށެވެ. އަދި އެ ތަކެތި ލިބުމުން މާޗް މަހުގެ އެއް ވަނަ ދުވަހު ޓެސްޓް ފްލައިޓް ޖައްސައި، އެއާޕޯޓު ހުޅުވަން ތައްޔާރުވަމުން އަންނަ ކަމަށް އޭނާ ވިދާޅުވި އެވެ.

މުލީ އެއާޕޯޓް މަސައްކަތްތައް ނިންމައި މިދިޔަ ޖުލައި މަހު ވެސް އެއާޕޯޓު ހުޅުވަން ރީޖަނަލް އެއާޕޯޓުން މަސައްކަތްކުރި އެވެ. އެކަމަކު އޭރު އެ މުއްދަތަށް މަސައްކަތް ނިންމާފައެއް ނުވެ އެވެ.

މުލީ އެއާޕޯޓު ހިންގުމަށް ސަރުކާރުން ދާދިފަހުން ވަނީ ރީޖަނަލް އެއާޕޯޓް ކުންފުންޏަށް އަންގައިފަ އެވެ.