ރައީސް، މުލީ އެއާޕޯޓް ހުޅުއްވައިދެއްވައިފި

ރައީސް ޑރ. މުހައްމަދު މުއިއްޒު، މ. އަތޮޅުގެ ފުރަތަމަ އެއާޕޯޓް މުލީގައި މިއަދު ހުޅުއްވައިދެއްވައިފި އެވެ.

ރައީސް މުއިއްޒު މުލި އެއާޕޯޓް ހުޅުއްވައިދެއްވީ މިއަދު ހެނދުނު މި ރަށުގައި ބޭއްވި ހާއްސަ ރަސްމިއްޔާތެއްގަ އެވެ.

މުއްޔަށް ރައީސް ވަޑައިގަތުމުން މި ރަށުގެ ރައްޔިތުން ވަނީ އެއާޕޯޓުން އެ މަނިކުފާނަށް ހޫނު މަރުހަބާއެއް ކިޔައިފަ އެވެ.

މި ރަސްމިއްޔާތުގައި ރައީސްގެ ކެބިނެޓް މިނިސްޓަރުން ވެސް ބައިވެރިވެވަޑައިގަތެވެ.

ރީޖަނަލް އެއާޕޯޓްސް ކުންފުނިން ހިންގާ މުލި އެއާޕޯޓަށް ޓެސްޓު ފްލައިޓް ޖެއްސީ މިދިޔަ މަހު 25 ގަ އެވެ.

މުލީ އެއާޕޯޓަކީ ރާއްޖޭގައި ހުޅުވި 19 ވަނަ އެއާޕޯޓެވެ. އަދި 14 ވަނަ ޑޮމެސްޓިކް އެއާޕޯޓެވެ.

މިއީ ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން 2021 ވަނަ އަހަރު އެމްޓީސީސީއާ ހަވާލުކޮށްގެން ހެދި އެއާޕޯޓެކެވެ. އެ ކުންފުންޏާ މަސައްކަތް ހަވާލުކުރީ 212 މިލިއަން ރުފިޔާއަށެވެ. އެކަމަކު ބަޖެޓުގެ ދަތިކަމާ ހެދި އެ މަސައްކަތް ނުނިމި ދިގުލައިގެން ދިޔައީ އެވެ. ފަހުން ކުރި ހަރަދުތަކާ އެކު މުޅި ޕްރޮޖެކްޓަށް 540 މިލިއަން ރުފިޔާ ހަރަދު ކޮށްފައިވެ އެވެ.

ރީޖަނަލް އެއާޕޯޓްސް އިން ބުނެފައިވާ ގޮތުގައި، މުލި އެއާޕޯޓުގެ ކޮމާޝަލް އޮޕަރޭޝަންތައް ފެށުމަށް، ރާއްޖޭގެ އެތެރޭގެ ދަތުރުތައް ކުރާ މޯލްޑިވިއަން އާއި ވިލާ އަދި މަންތާ އެއާލައިނަށް އެ ފުރުސަތު ހުޅުވާލާފައިވާ ކަމަށެވެ.

އިންފްރާސްޓްރަކްޗަރު މިނިސްޓްރީން ބުނީ، މީހުން ދިރިއުޅޭ 8 ރަށް މ. އަތޮޅުގައި އޮންނައިރު އެ އަތޮޅުގެ 5،000 އަށް ވުރެ ގިނަ މީހުންނަށް މުލީ އެއާޕޯޓާ އެކު އިޖުތިމާއީ އަދި އިގުތިސާދީ ގޮތުން ކުރިއެރުންތަކެއް ލިބޭނެ ކަމަށެވެ.

މޯލްޑިވިއަން އިން މި މަހު ވަނީ މި އެއާޕޯޓަށް ކޮމާޝަލް ދަތުރުތައް ފަށައިފަ އެވެ. އެއީ ކޮންމެ ހޮނިހިރު ދުވަހު ބާއްވާ ފްލައިޓެކެވެ. މި ވަގުތު އެއްކޮޅު ޓިކެޓެއްގެ އަގަކީ ހުރިހާ ޓެކްސްއެއް ހިމަނައިގެން 999ރ. ކަމަށް މޯލްޑިވިއަން އިން ބުންޏެވެ.

"މި ވަގުތު ހަފުތާއަކު އެއް ފްލައިޓު މުއްޔަށް މި ބާއްވަނީ. އެކަމަކު ތަރުހީބަށް ބަލާފައި ފްލައިޓުތައް އިތުރު ކުރާނެ،" އެ އެއާލައިންގެ އިސްވެރިއަކު މިއަދު ވިދާޅުވި އެވެ.

މުލި އެއާޕޯޓު މަޝްރޫއުގެ ދަށުން ވަނީ 14 ހެކްޓަރުގެ ބިންހިއްކައި، 1،812 މީޓަރު ސަރަހައްދެއްގެ ގޮނޑުދޮށް ހިމާޔަތްކޮށްފަ އެވެ. އަދި ޕެސެންޖާ ޓާމިނަލަކާ އެކު، 1،500 މީޓަރު ދިގު އަދި 30 މީޓަރު ފުޅާ ރަންވޭއެއް ހަދާފައިވެ އެވެ.

މުލީ އެއާޕޯޓު ހަދާފައި ވަނީ އެއްފަހަރާ 150 ފަސިންޖަރުންނަށް ހިދުމަތް ދެވޭ ގޮތަށެވެ. ރޭގަނޑު ވެސް ފްލައިޓުތައް ޖެއްސޭ ގޮތަށް ހެދި އެ އެއާޕޯޓުގައި ފަޔާ ސްޓޭޝަން ޓަވަރާ އެކު ސަލާމަތީ އިތުރު ކަންކަން ވަނީ ގާއިމްކޮށްފަ އެވެ.