ޖަރުމަނުގައި ހަމަލާދިން ސައޫދީ މީހާ ވީ މޮޔައަކަށް

މީގެ ދެ ހަފްތާއެއްހާ ދުވަސް ކުރިން ޖަރުމަނުގެ ކްރިސްމަސް މާކެޓެއްގެ ތެރެއަށް ކާރެއްގައި ވަދެގަނެ މީހުންގެ ގައިގައި ޖައްސައި ހަމަލާދިން މީހާ ސައޫދީ އަރަބިއްޔާގެ މީހާ އަކީ "ނަފްސާނީ ބަލި މީހެއް" ކަމަށް މިހާރު ބެލެވޭ ކަމަށް ޖަރުމަނުގެ އިންޓީރިއާ މިނިސްޓަރު ނޭންސީ ފައިސަރު ވިދާޅުވެއްޖެ އެވެ.

ނޫސްވެރިންނާ ވާހަކަ ދައްކަވަމުން ފައިސަރު ވިދާޅުވީ ހަމަލާދޭންޖެހޭ އެއްވެސް މަގްސަދެއް އަދި ހޯދިފައި ނުވާ ކަމަށާއި ނަމަވެސް ނަފްސާނީ މައްސަލަތަކެއް ފާހަގަވެފައިވާ ކަމަށެވެ.

އޭނާ ވިދާޅުވީ ނަފްސާނީ ގޮތުން މައްސަލަތަކާ ދިމާވެ... ކޮންސްޕިރެސީ ތިއަރީތަކާ ގުޅުވައިގެން ކުށުގެ އަމަލުތައް ހިންގަފާނެ މީހުން ދެނަގަންނަންޖެހޭ ކަމުގެ ފިލާވަޅެއް މިކަމުން ލިބޭ ކަމަށެވެ.

"އެފަދަ ހަމަލާދޭ މީހުންނަކީ އެއްވެސް ތްރެޓް ޕްރޮފައިލަކަށް ނުފެތޭ ބައެއް،" ސަލާމަތީ ހިދުމަތްތަކަށް އެމީހުންނާ ކުރިމަތިލުމަށް "އެހެނިހެން އިންޑިކޭޓާތަކާއި އެކްޝަން ޕްލޭންތަކެއް" ބޭނުންވާނެ ކަމަށް ވެސް މިނިސްޓަރު ވިދާޅުވި އެވެ.

ފަސް މީހަކު މަރުވެ އެތައް ބަޔަކު ޒަހަމްވި ހަމަލާ ދިން ތާލިބް ޖަވާދު އަލް އަބްދުލްމުހްސިން، 50، އަކީ ނަފްސާނީ ބަލީގެ ހާއްސަ ޑޮކްޓަރެކެވެ. އިސްލާމް ދީން ދޫކޮށް މުރުތައްދުވެ އޭނާ ސައޫދީގެ އެހެން މީހުން ވެސް އެ މަގަށް ގެންދަން މަސައްކަތްކުރަމުން ދަނިކޮށް ހައްޔަރުކުރަން އުޅުމުން 2006 ވަނަ އަހަރު ޖަރުމަނަށް ގޮސް ސިޔާސީ ހިމާޔަތް ހޯދީ އޭގެ 10 އަހަރު ފަހުންނެވެ. އޭނާ އަކީ ނުރައްކަލަކަށް ވެދާނެ ކަމަށް ސައޫދީން ކުރިން ވެސް އޮތީ ޖަރުމަނަށް އަންގައިފަ އެވެ.