ރީރަޖިސްޓްރީ ނުކުރާތީ 101 މަރުކަޒެއްގެ ސަނަދުތައް ގަބޫލު ނުކުރަން އެމްކިއުއޭއިން ނިންމައިފި

މަތީ ތައުލީމާއި ތަމްރީނުގެ ގާނޫނުގެ ދަށުން މަތީ ތައުލީމާއި ތަމްރީނު ދޭ 101 މަރުކަޒަކުން ރީރަޖިސްޓްރީ ކޮށްފައި ނުވާތީ، އެ ތަންތަނުން ހިންގާ ކޯސްތަކާއި ސަނަދުތައް ބަލައިނުގަތުމަށް މޯލްޑިވްސް ކޮލިފިކޭޝަން އޮތޯރިޓީ (އެމްކިއުއޭ) އިން ނިންމައިފި އެވެ.

އެމްކިއުއޭ އިން ކުރި އިއުލާނެއްގައި ބުނީ މަތީ ތައުލީމާއި ތަމްރީނުގެ ދޭ ގާނޫނުގެ ދަށުން އެ ހިދުމަތްދޭ މަރުކަޒުތައް ހިންގޭނީ ހަޔާ އެޑިއުކޭޝަން މިނިސްޓްރީގައި ރަޖިސްޓްރީވުމަށްފަހު އެވެ.

އެކަމަކު މިއަދާ ހަމައަށް 101 ތަނަކުން ރީރަޖިސްޓްރީ ކޮށްފައި ނުވާތީ އެ ތަންތަނުގެ ލިސްޓެއް މިނިސްޓްރީން އެމްކިއުއޭ އަށް ފޮނުވާފައިވާ ކަމަށް އެ އޮތޯރިޓީން ބުންޏެވެ.

އެހެންވެ، އެ ކޮލެޖުތަކާއި އިންސްޓިޓިއުޓްތަކުން ރީރަޖިސްޓްރީވެފައި ނުވާތީ، އެތަންތަނަށް ކުރިން ހުއްދަ ދިން ޕްރޮގްރާމުތަކުގެ ހުއްދަ ގަބޫލު ނުކުރާނެ ކަމަށް އެމްކިއުއޭ އިން ބުނެ އެވެ.

"މަތީ ތައުލީމާއި މަސައްކަތްތެރިކަމާއި ހުނަރުތައް ތަރައްގީކުރުމާ ބެހޭ ވުޒާރާގެ ދަފްތަރު (ކޮލެޖުތަކާއި އިންސްޓިޓިއުޓްތަކުގެ ދަފްތަރު) ގައި ރަޖިސްޓްރީކޮށްފައި ނުވާ މަރުކަޒުތަކުގެ ލިސްޓުގައި ހިމެނޭ 101 މަރުކަޒަކުން ކުރިން ހުއްދަދީގެން ހިންގަމުން އައި ޕްރޮގްރާމްތައް މިއަދުން ފެށިގެން މަތީ ތައުލީމާއި ތަމްރީނުގެ ގާނޫނުގެ 21 ވަނަ މާއްދާގެ ބ ގެ ދަށުން މި އޮތޯރިޓީން ގަބޫލު ނުކުރާނެ ވާހަކަ ދަންނަވަމެވެ،" އެ އިއުލާނުގައިވެ އެވެ.

އެ ޕްރޮގްރާމުތަކުގެ ހުއްދަ މިއަދުން ފެށިގެން ގަބޫލު ނުކުރިޔަސް، އެ ޕްރޮގްރާމުތަކުން ކިޔަވާފައިވާ އަދި އެމްކިއުއޭ އަށް މިހާތަނަށް ބެޗް އޮޑިޓަށް ފޮނުވާފައިވާ ދަރިވަރުންގެ ސަނަދުތައް ގަބޫލުކުރާނެ ކަމަށް އެމްކިއުއޭއިން ބުންޏެވެ.

އެ އިއުލާނާ އެކު އެމްކިއުއޭއިން ވަނީ ސަނަދުތައް ގަބޫލުކުރަން ނިންމި 101 މަރުކަޒުގެ ލިސްޓެއް ވެސް އާންމުކޮށްފަ އެވެ. އޭގެ ތެރޭގައި ހިމެނެނީ ޑައިވިން އިންސްޓިޓިއުޓްތަކާއި ގުރުއާން ކްލާސްތަކާއި ދިވެހި ކެބިން ކްރޫ އެކަޑަމީ އާއި ގްލޯނެޓް އަދި ކައްކާ ކޯސްތަކާއި އެކި ކަހަލަ ތަމްރީނުދޭ މަރުކަޒުތަކެވެ.