ޓްރަމްޕުގެ ވިސްނުމަކީ "ޣައްޒާ ސާފުކޮށްލުން"

މެދުއިރުމަތީގައި ސުލްހަ ގާއިމުކުރުމަށް ފަލަސްތީނުގެ ޣައްޒާ "ސާފުކޮށްލަންވީ" ކަމަށާއި އެތަނުގެ ރައްޔިތުން މިސްރާއި އުރުދުން އަށް ގެންދަންވީ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

ޣައްޒާގައި އިޒްރޭލުން ދިން ހަމަލާތަކަށް ފަހު މިހާރު އެއީ "ޑެމޮލިޝަން ސައިޓް" އެއް ގޮތަށް ސިފަކޮށް ޓްރަމްޕް ވިދާޅުވީ ޣައްޒާގެ އާންމުން ގެންދިއުމާ ބެހޭ ގޮތުން މިސްރުގެ ރައީސް އަބްދުލްފައްތާހް އައް ސީސީ އާއި އުރުދުންގެ ރަސްގެފާނު އަބްދުﷲ އާ މިހާރު ވާހަކަ ދައްކަވާފައިވާ ކަމަށެވެ.

"އަޅުގަނޑުގެ އެދުމަކީ މިސްރުން ވސް އަދި އުރުދުން އިން ވެސް މީހުން ގެންދިއުން،" އެއާފޯސް ވަންގައި ނޫސްވެރިންނާ ބައްދަލުކުރައްވައި ޓްރަމްޕް ވިދާޅުވި އެވެ.

"މި ދައްކަނީ ގާތްގަނޑަކަށް ދޮޅު މިލިއަނެއްހާ މީހުންގެ ވާހަކަ. އަޅުގަނޑުމެން ހަމަ އެއްކޮށް ސާފުކޮށްލާނީ. ތިޔަބޭފުޅުންނަށް އެނގިވަޑައިގަންނަވާނެ، ޒަމާނުއްސުރެ، އެސަރަހައްދުގައި ވަރަށް ގިނަ ހަމަނުޖެހުންތައް ވަނީ ހިނގާފައި. އަޅުގަނޑަކަށް ނޭނގެ، ކޮންމެވެސް ކަމެއް ވާން އެބަޖެހޭ."

އޮކްޓޫބަރު 7، 2023 ގައި އިޒްރޭލުގެ ދެކުނުގެ ސަރަހައްދަށް ހަމާސް ޖަމާއަތުން ދިން ހަމަަލާއާ އެކު ފެށި ހަނގުރާމައިގެ ސަބަބުން ޣައްޒާގެ 2.4 މިލިއަން މީހުންގެ ތެރެއިން ގިނަ މީހުންގެ ގެދޮރު އެތައް ފަހަރަކު ވަނީ ގެއްލި ހާލުގައި ޖެހިފަ އެވެ.

ޓްރަމްޕް ވިދާޅުވީ ޣައްޒާގެ ރައްޔިތުން "ވަގުތީ ގޮތުން ނުވަތަ ދިގު މުއްދަތަކަށް" ބަދަލުކުރެވިދާނެ ކަމަށެވެ. ޣައްޒާ އަކީ މިހާރު އެއްކޮށް ހަލާކުވެފައިވާ ތަނެއް ކަމަށާއި އެތަނުގައި މީހުން ދަނީ މަރުވަމުން ކަމަށް އޭނާ ވިދާޅުވި އެވެ.

"އެހެންވެ އަޅުގަނޑު ބޭނުންވަނީ އަރަބި ބައެއް ގައުމަކާ ގުޅިގެން، އެހެން ތަނެއްގައި ބޯހިޔާވަހިކަން ހަމަޖައްސައިދީ، ހާލަތު ބަދަލުކޮށް، ސުލްހަވެރިކަމާ އެކު އުޅެވޭނެ ގޮތެއް ހޯދައިދޭން."

ޓްރަމްޕް މިހެން ވިދާޅުވި އިރު ޣައްޒާގައި ހަމަލާތައް ހުއްޓާލުމަށް ވީ އެއްބަސްވުމާ އެކު އާންމުން މިހާރު ދަނީ އެ މީހުންގެ ގެދޮރު ހުރި ހިސާބުތަކަށް ދާން މަސައްކަތްކުރަމުންނެވެ. އެކަމަކު އިޒްރޭލުން ދަނީ އެކަމަށް ވެސް ހުރަސްއަޅަމުންނެވެ.