ސިކްސް ސެންސަސް ލާމު ރިސޯޓުގެ ޖެނެރަލް މެނޭޖަރަކަށް ހަމަލާދީފި

ލ. އަތޮޅު ރިސޯޓެއްގެ އިސް މަގާމެއްގައި ހުރި މީހަކަށް ހަމަލާދީ މާރާމާރީ ހިންގި މައްސަލައެއް ފުލުހުން ބަލަން ފަށައިފި އެވެ.

އެނގިފައިވާ ގޮތުގައި ހަމަލާ ދީފައިވަނީ އެ އަތޮޅުގައި ހިންގާ ސިކްސް ސެންސަަސް ލާމު ރިސޯޓުގެ ޖެނެރަލް މެނޭޖަރަށެވެ.

ފުލުހުން ބުނީ ލ. އަތޮޅުގެ ރިސޯޓުގެ އިސް މަގާމެއް އަދާކުރާ މީހަކު ރިސޯޓުގައި ބައިސްކަލެއްގައި ދުއްވާފައި ދަނިކޮށް ފަހަތުން މީހަކު ގޮސް، އޭނާގެ ބޮލުގައި އެއްޗަކުން ޖަހައި މާރާމާރީ ހިންގާފައިވާ ކަމަށެވެ.

އެ މައްސަލަ އިއްޔެ ރިޕޯޓްކުރި ނަމަވެސް މިހާތަނަށް އެއްވެސް މީހަކު ހައްޔަރުކޮށްފައި ނުވާ ކަމަށް ފުލުހުން ބުންޏެވެ.

ފުލުހުން ބުނީ އެ މައްސަލަ ތަހުގީގު ކުރަމުންދާ ކަމަށެވެ.