އެމްޕީއެލްގެ މެނޭޖިން ޑިރެކްޓަރަކަށް ރިޝްވާން އައްޔަންކޮށްފި

އެމްޕީއެލްގެ މެނޭޖިން ޑިރެކްޓަރަކަށް، އައިޖީއެމްއެޗްގެ ކުރީގެ ޑެޕިއުޓީ ސީއީއޯ މުހައްމަދު ރިޝްވާން މިއަދު އައްޔަންކޮށްފި އެވެ.

ޕްރައިވެޓައިޒޭޝަން ބޯޑުން ސޯޝަލް މީޑިއާގައި ކުރި ޕޯސްޓުގައި ބުނީ އެމްޕީއެލްގެ މެނޭޖިން ޑިރެކްޓަރު އަދި ބޯޑު ޑިރެކްޓަރުގެ މަގާމަށް ހ، ހަބަރުގެ، މުހައްމަދު ރިޝްވާން ހަމަޖައްސާފައިވާ ކަމަށެވެ.

ވިޔަފާރި ބަނދަރު ހިންގާ ކުންފުނީގެ މެނޭޖިން ޑިރެކްޓަރުގެ މަގާމު ހުސްވީ، އެ ޒިންމާތައް އަދާކުރައްވަމުން ގެންދެވި މުހައްމަދު ވަޖީހު އިބްރާހިމް މިދިޔަ އާދިއްތަ ދުވަހުގެ ރޭ މަގާމުން ވަކިކުރުމުންނެވެ.

މި ސަރުކާރު ވެރިކަމާ ހަވާލުވެ، އެމްޕީއެލްގެ މެނޭޖިން ޑިރެކްޓަރުގެ މަގާމަށް ފުވައްމުލަކަށް އުފަން ވަޖީހު އައްޔަން ކުރެއްވީ ނޮވެމްބަރު 28، 2023 ގަ އެވެ.

ރިޝްވާން ވަނީ ކުރީގެ ރައީސް އަބްދުﷲ ޔާމީންގެ ވެރިކަމުގައި އައިޖީއެމްއެޗްގެ ޑެޕިއުޓީ ސީއީއޯކަން ކުރައްވައިފަ އެވެ. އޭގެ ކުރިން އޭނާ ހުންނެވީ ފުލުހުންގެ ޑެޕިއުޓީ ކޮމިޝަނަރަކަށެވެ. އެ މަގާމުން އޭނާ އިސްތިއުފާ ދެއްވީ ޖުލައި، 2011 ގަ އެވެ. އައިޖީއެމްއެޗުގެ ޑެޕިއުޓީ ސީއީއޯގެ މަގާމަށް ފަހު، މިދިޔަ ދުވަސްތަކުގައި ރިޝްވާން އުޅުއްވީ އަމިއްލަ ވިޔަފާރީގެ ތެރޭގަ އެވެ.