މުވައްޒަފަކު ވަކިކުރީ ވިސިލްބްލޯ ކޮށްގެނެއް ނޫން: ޕޯސްޓް

މޯލްޑިވްސް ޕޯސްޓް ލިމިޓެޑް (ޕޯސްޓް އޮފީސް) މުވައްޒަފަކު ވަޒީފާއިން ވަކިކުރީ ވިސިލްބްލޯ ކުރި މައްސަލާގައި ނޫން ކަމަށް އެ ކުންފުނިން ބުނެފި އެވެ

ޕޯސްޓާ ގުޅޭ ކޮރަޕްޝަންތަކެއް ވިސިލްބްލޯ ކުރި މީހަކު ވަޒީފާއިން ވަކިކުރި މައްސަލާގައި ނުވަ ލައްކަ ރުފިޔާއިން ޕޯސްޓް ޖޫރިމަނާ ކުރަން ހިއުމަން ރައިޓްސް ކޮމިޝަނުން އޮތީ ނިންމައިފަ އެވެ.

އެކަމާ ގުޅިގެން ޕޯސްޓުން ނެރުނު ބަޔާނެއްގައި ބުނީ އެ މުވައްޒަފު ވަކިކުރީ މަސައްކަތުގެ ޕާފޯމެންސާއި އަހުލާގާ ގުޅުންހުރި މައްސަލަތަކެއްގައި ކަމަށެވެ.

"އެ މުވައްޒަފު އޮފީހަށް ވަނީއްސުރެ، ގާތްގަނޑަކަށް 10 މަހަަށް ދެމިގެންދިޔަ މަރުހަލާތަކުގައި ނަސޭހަތާއި އިންޒާރު ދިނުމާއިއެކު ޕާފޯމަންސް އިމްޕްރޫވްމެންޓް ޕްލޭނެއްގެ ދަށުން ގެނައުމުން ވެސް އެއްވެސް ބަދަލެއް ގެނެސްފައި ނުވާތީ ވަކިކުރެވިފައިވާ މުވައްޒަފެއް،" ޕޯސްޓު އޮފީހުގެ ބަޔާނުގައިވެ އެވެ.

އެ މުވައްޒަފު ވަޒީފާއިން ވަކިކުރުމާ ހަމައަށް އެޅުނު ހުރިހާ ފިޔަވަޅެއް ވެސް އަޅާފައި ވާނީ ވަޒީފާއާ ބެހޭ އުސޫލުގެ ދަށުން ކަމަށް ވެސް އެ ބަޔާނުގައިވެ އެވެ.

އެ މުވައްޒަފާ ގުޅޭގޮތުން ޕޯސްޓުން ކުރި ތުހުމަތުތައް

- އެ މުވައްޒަފު ވަޒީފާއަށް ނެގުމުގެ ކުރިން އެ ކުންފުނީގެ ސެކެޓްރީގެ މަގާމަށް ކުރިމަތިލައި އެ މަގާމަށް ނުހޮވުމުން ނުރުހުން ފާޅުކުރުން

- ޕްރޮބޭޝަން މުއްދަތުގައި ހުރެ، އެ ކުންފުނީގެ އިސް މަގާމުތަކަށް ކުރިމަތިލައި، އެ މަގާމުތަކުގެ އިންޓަވިއުއަށް ނުކިޔައިގެން ހިތްހަމަނުޖެހުން ފާޅުކުރުން

- އެ ހިތްހަމަ ނުޖެހުންތައް މެނޭޖިންގް ޑިރެކްޓަރު (އެމްޑީ) ގެންދިއުމުގެ ބޭނުމުގައި އޮފީހުން ބޭރުގެ އިއްޒަތްތެރި ބޭފުޅަކު ފޮނުވައި އެމްޑީއަށް އިއްވި

- އޭނާ ބޭނުންވި ގޮތަށް ކަންތައް ވެފައި ނުވާތީ އެކަ

މިހާރު ހުރި މަގާމަށްވުރެ ރަނގަޅު މަގާމަކަށް ބަދަލުކޮށް ވީހާ އަވަހަކަށް ކޮށްދޭން އެދުން

- އެ އޮފީހަށް ގެނައި އިއްޒަތްތެރި ބޭފުޅާ ލައްވައި މެނޭޖިން ޑިރެކްޓަރަށް ބިރުދެއްކުން

ކޮރަޕްޝަންގެ މައްސަލަ އެއް ޕޯސްޓް އޮފީހަށް އަމާޒުވާއިރު ޕޯސްޓާ ގުޅޭ ގޮތުން އެންޓި ކޮރަޕްޝަން ކޮމިޝަނުން މިވަގުތު އަންނަނީ އެ ކުންފުންޏާ ގުޅޭ ހަ މައްސަލައެއް ބަލަމުންނެވެ.

އެ ކުންފުނިން ވަނީ ވެލާނާ އިންޓަނޭޝަނަލް އެއާޕޯޓުގައި ހުރި ޕޯސްޓު އޮފީހުގައި ބަހައްޓައިގެން މުދާ ވިއްކާ ވާހަކަ އާއި ވެރިންގެ މަސްލަހަތު ހިމެނޭ ގޮތަށް ހާޒީރީ ކަންކަން ބަދަލުކުރި ވާހަކަ ދޮގު ކޮށްފަ އެވެ.

މެނޭޖިން ޑިރެކްޓަރަށް ލިބޭ މުސާރައަށްވުރެ ބޮޑު މުސާރައެއް ނަގާ ކަމަށް ބުނާ ވާހަކަ އަކީ ވެސް ހަގީގަތާ ހިލާފު ވާހަކައެއް ކަމަށާއި އެމްޑީގެ ގާތް މީހުންނަށް ޕްރޮމޯޝަން ދޭ ވާހަކަ ވެސް ވަނީ ދޮގުކޮށްފަ އެވެ.