މަސްލަހަތު ފުށުއަރާ ހާލަތްތަކުގައި އަމަލުކުރާނެ ގޮތް ކަނޑައަޅަން އޭސީސީގެ ގައިޑްލައިނެއް

މަސްލަހަތު ފުށުއަރާ ހާލަތްތަކުގައި އަމަލުކުރާނެ ގޮތްތައް ކަނޑައެޅުމުގެ އިރުޝާދު ހިމެނޭ ގައިޑްލައިނެއް އެންޓި ކޮރަޕްޝަން ކޮމިޝަން (އޭސީސީ) އިން މިއަދު ނެރެފި އެވެ.

ބައިނަލްއަގުވާމީ އެންޓި-ކޮރަޕްޝަން ދުވަސް ފާހަގަކުރަން ބޭއްވި ރަސްމިއްޔާތުގައި، އެ ގައިޑްލައިން ނެރެދެއްވީ ޖޭއެސްސީގެ ކުރީގެ ރައީސް އަދި ރައްޔިތުންގެ މަޖިލީހުގެ ގުރައިދޫ ދާއިރާގެ މެމްބަރު ހުސެއިން ރިޒާ އެވެ.

އޭސީސީން ބުނީ ދައުލަތުގެ އޮފީސްތަކާއި ސަރުކާރު އަދި ސަރުކާރު ހިއްސާވާ ކުންފުނިތަކަށް ހާއްސަކޮށްގެން ނެރުނު ގައިޑްލައިންގެ ބޭނުމަކީ ކޮރަޕްޝަން ހުއްޓުވަން ގައުމީ ފެންވަރުގެ އުސޫލުތައް އެކުލަވާލުމާއި މަސްލަހަތު ފުށުއަރާ ހާއްސަ ހާލަތްތަކާއި ރިސްކް ބޮޑު ފަރާތްތައް ދެނެގަނެ އަމަލުކުރާނެ ގޮތުގެ އުސޫލެއް ހެދުން ކަމަށެވެ.

އޭގެ އިތުރުން ނަޒާހަތްތެރިކަމާއި ޖަވާބުދާރީވުމުގެ ސަގާފަތެއް އިދާރާތަކުގައި ގާއިމްކުރުމަކީ ވެސް އެއް ބޭނުން ކަމަށް އޭސީސީން ބުންޏެވެ.

ސިޔާސަތުތައް ބައްޓަންކުރާނެ ގޮތަކީ:

- މަސްލަހަތު ފުށުއަރާ ނުވަތަ ފުށުއަރާފާނެ ހާލަތްތައް އަދި ގުޅުންތައް ތަފްސީލީކޮށް ބަޔާންކުރުން

- ރިސްކް ބޮޑު ދާއިރާތައް ކަނޑައެޅުން

- މުވައްޒަފުންނަށް ލިބޭ ހަދިޔާ/މަންފާއާ މެދު އަމަލުކުރާނެ ގޮތް ކަނޑައެޅުން

- ވަޒީފާގެ ގޮތުން މަސްލަހަތު ފުށުއަރާ ހާލަތްތައް ދެނެގަތުމާއި އެކަންކަން ހިއްސާކުރަން ޖެހޭކަން މުވައްޒަފުންނަށް އަންގައިދިނުން

- މައުލޫމާތު ހާމަކުރުމާއި އާއްމުކުރުން

- މުވައްޒަފުންގެ ދައުރު ކަނޑައެޅިގެން ބަޔާންކުރުން

- ހޭލުންތެރި ކުރުމާއި ވިޔަނުދިނުމަށް މުވައްޒަފުންނާ ގުޅިގެން މަސައްކަތްކުރުން

އެ ގައިޑްލައިންގެ އިސްބަހުގައި ކޮމިޝަންގެ ރައީސް އާދަމް ޝާމިލް ވިދާޅުވީ އެ ފިޔަވަޅުތައް އެޅުމުގެ ސަބަބުން މުއައްސަސާތަކަށް ކުރިމަތިވެދާނެ ރިސްކްތައް ނައްތާލެވ،ި ޒިންމާދާރުކަމާއެކު ނިންމުންތައް ނިންމޭކަން ކަށަވަރުކުރެވޭނެ ކަމަށެވެ. އޭގެ އިތުރުން ދައުލަތުންދޭ ހިދުމަތްތަކާއި އިދާރީ ނިޒާމުތަކުގެ މައްޗަށް އާއްމުންގެ އިތުބާރު ބޮޑުވެގެން ދާނެކަން އޭނާ ފާހަގަ ކުރެއްވި އެވެ.