ފަލަސްތީނަށް ދޭ އިންސާނީ އެހީ ހުއްޓުވާތީ ހުށަހެޅި މައްސަލާގައި ރާއްޖޭން ބަޔާންދީފި

ފަލަސްތީނުގެ ބިންތަކުގައި އދ. އާއި އެހެނިހެން ބައިނަލްއަގްވާމީ ޖަމްއިއްޔާތަކުން ތިބުން ހުއްޓުވައި، ފަލަސްތީނަށް އެހީވާން އެ ފަރާތްތަކުން ހިންގާ ހަރަކާތްތަކަށް އިޒްރޭލުން ހުރަސް އަޅަމުންދާތީ އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ) ގެ އިސްތިޝާރީ ލަފަޔަކަށް އެދި ހުށަހަޅާފައިވާ މައްސަލާގައި ރާއްޖެއިން އެ ކޯޓަށް ލިޔުމުން ބަޔާނެއް ހުށަހަޅައިފި އެވެ.

އެ މައްސަލައަކީ ފަލަސްތީނުގެ އާންމުންނަށް ފޯރުކޮށްދެމުންދާ އިންސާނީ އެހީތެރިކަމަށް ހުރަސް އަޅައި، ފަލަސްތީނުގެ ރެފިއުޖީންނަށް އިންސާނީ އެހީތެރިކަން ފޯރުކޮށްދޭ އދ. ގެ މައި ޖަމްއިއްޔާ ކަމުގައިވާ ޔުނައިޓެޑް ނޭޝަންސް ރިލީފް އެންޑް ވާކްސް އޭޖެންސީ ފޯ ޕަލަސްޓައިން ރެފިއުޖީސް ގެ މަސައްކަތްތައް ހުއްޓުވާލުމަށް އިޒްރޭލްގެ ގާނޫނު ހަދާ މަޖިލީހުން ނިންމުމުން އައިސީޖޭއަށް ހުށަހެޅި މައްސަލަ އެކެވެ.

ގައްޒާގައި އިންސާނީ އެހީތެރިކަން ފޯރުކޮށްދިނުމަށްޓަކައި ހަރަކާތްތެރިވަމުންދާ ފަރާތްތަކަށް އަމާޒުކޮށް އިޒްރޭލުން ހަމަލާތައް ދެމުންގެންދާތީ އެ ގައުމުން އުފުލަންޖެހޭ ޒިންމާތަކާ ގުޅޭގޮތުން އައި.ސީ.ޖޭ. ގެ އިސްތިޝާރީ ލަފަޔަކަށް އެދި ހުށަހެޅުމަށް އ.ދ. ގެ އާންމު މަޖިލީހުގެ ޤަރާރަކުން ޑިސެންބަރު، 2024 ގައި ފާސްކޮށްފައިވެ އެވެ.

އެ މައްސަލާގައި ބައިވެރިވެ ރާއްޖޭން މިދިޔަ ބުރާސްފަތި ދުވަހު ހުށަހެޅި ބަޔާނުގައި، އިންޓަނޭޝަނަލް ހިއުމަނިޓޭރިއަން ލޯ އާއި އިންސާނީ ހައްގުތަކާބެހޭ ބައިނަލްއަގުވާމީ ބައެއް މުއާހަދާތަކުގެ ދަށުން އިޒްރޭލްގެ ޒިންމާތައް ފާހަގަކޮށްފައިވެ އެވެ.

އދ. ގެ މެންބަރެއްގެ ހައިސިއްޔަތުން އިޒްރޭލްގެ މައްޗަށް އޮތް ޒިންމާތައް ބަޔާންކޮށް، އދ. ގެ އެހީ ދޭ ޖަމިއްޔާގެ މަސައްކަތްތައް އިޒްރޭލުން ހުއްޓުވުން މަނާކުރާ ބައިނަލްއަގުވާމީ ގާނޫނީ އުސޫލުތަކުގެ މައްޗަށް ރާއްޖޭގެ ބަޔާނުގައި ވަނީ އަލިއަޅުވާލައިފަ އެވެ.

އިޒްރޭލްގެ ބާރުގެ ދަށަށް ގެނެސްފައިވާ ފަލަސްތީނުގެ ބިންތަކުގައި އިޒްރޭލް ހިންގަމުންދާ އަމަލުތަކުގެ ސަބަބުން ފަލަސްތީނުގެ އާންމު ރައްޔިތުންނަށް ލިބެންޖެހޭ އަސާސީ ހިދުމަތްތަކާއި އަސާސީ ހައްގުތަކުން މަހުރޫމްވެ އަދި ފަލަސްތީނުގެ އަމިއްލަ ދައުލަތެއް ބިނާކުރުމަށާއި ހަމަޖެހުމަށް ހުރަސް އެޅެމުންދާ ކަމަށާއި އަދި އެއީ ބައިނަލްއަގްވާމީ ގާނޫނުތަކާ ޚިލާފު ޖަރީމާތަކެއް ކަން ވެސް ރާއްޖޭން ވަނީ ފާހަގަކޮށްފަ އެވެ.

ފަލަސްތީނާއި އިޒްރޭލް މައްސަލައަށް އޮތް ހަމައެކަނި ހައްލަކީ، 1967 ވަނަ އަހަރުގެ ކުރިން އޮތް ސަރަހައްދީ އިންތަކުގެ މައްޗަށް ބިނާކޮށް، އިރުމަތީ ގުދުސް ވެރިރަށެއްގެ ގޮތުގައި ކަނޑައަޅައި، މިނިވަން، މުސްތަގިއްލު އަދި އަމިއްލަ ސިޔާދަތީ ބާރު ހިނގާ ފަލަސްތީނުގެ ދައުލަތެއް ގާއިމުކުރުން ކަން ރާއްޖޭން ވަކާލާތުކުރެ އެވެ.

މިކަމަށް ފަލަސްތީނުގެ ރައްޔިތުންގެ ކުރާ މަސައްކަތަށް އެއްބާރުލުން ދިނުމުގައި ދިވެހި ދައުލަތް ސާބިތުކަމާއެކު ދެމި އޮންނާނެ ކަމުގެ ޔަގީންކަން ރާއްޖޭން ވަނީ ދީފަ އެވެ.